Mahmoud A.
نبذة عني
السلام عليكم ، إسمي محمود حسين (مهندس إتصالات)، اختبرت إمتحان الآيلتس يوم ٨/يونيو/ ٢٠٢٤ و أحرزت سكور ٧.٥ الحمدلله.
ملحوظه:
-لم أسجل في أي كورس أو معهد يعني الموضوع كله عبارة عن self studying.
- لمن بدأت التحضير كان مستواي تقريباً B2، و اتدربت لمدة ثلاثة شهور ومن ثم اخدت الاختبار
نبذة بسيطة عن اقسام الاختبار:
١/ الاستماع (٣٠ دقيقه+ ١٠ دقائق لنقل الاجابات)
٢/ القراءة (٦٠ دقيقه)
٣/ الكتابة (٦٠ دقيقه)
٤/ التحدث ( من ١١ إلى ١٧ دقيقة)
Listening
تقريباً دة اسهل module ممكن الواحد يجيب فيه سكور عالي عشان كدة كنت مركز عليه، في البداية كنت بجيب بين ٦ و ٦.٥ .. بديت اسمع لي بودكاست اسمو The English Level Up .. بعد فترة حسيت انو بقى ساهل شديد ف غيرت لي بودكاست مستواهو اعلى شويه اسمو Luke's English podcast و بعد فترة برضو بقى لي ساهل ف بقيت العب في السرعة، بقيت اسمع بي سرعة 1.5 و 1.75
- ملاحظة الاتنين British Accent
* لو داير تجيب درجة محترمة في الlistening اسمع كتير ، قدر ما تلقى فرصة اسمع بس و بعد فترة حتلاحظ الفرق.
٢/ Reading
اكتر حاجه كنت خايف منها عشان ال time management و التفاصيل دي، لمن بديت احضر للامتحان ما كنت قادر اجيب اكتر من 5.5 اصلا، بقيت افتش ف المصادر وبديت اقرا المجلات و الصحف العالمية زي الBBC و غيرها. المهم بديت في الحاجة دي و عملت دفتر بتاع vocabularies بكتب فيو الكلمات الجديدة ، لكن بعد فترة بسيطة حسيت انو الموضوع ما فعال بالطريقة الانا دايرها زايد انو مرات بتواجهني articles صعبه شديد ، تاني رجعت النت و بقيت افتش في طريقه اقدر اطور بيها الريدنج و في النهاية بقيت على انو اقرا الامتحانات القديمه كلها و دي الحاجة العملتها. بديت من Cambridge 1 لحدي Cambridge book 10 و رجعت للاختبارات.
اختبرت تقريباً خمسة او سته امتحانات لقيت درجاتي بقت بين 6.5 و 7، طوالي واصلت باقي الكتب لحدي Cambridge 18 و بعداك اتوكلت على الامتحان
* بالنسبة لل techniques، ف قناة في اليوتيوب اسمها د.نجلاء نور ، شفت طريقه الليسننج و الريدنج كلها من هنا، لكن مرات ف حاجات ما بتزبط زي مثلاً سؤال ال matching headings، ف الحالة دي برجع النت افتش لمن القى التكنيك الزابط
٣/ Writing
دي اصغب مرحلة لي اي زول بفكر ف الامتحان دة ، اعتمدت على قناتين ف اليوتيوب IELTS ADVANTAGE + IELTS WITH LIZ
بالنسبة ل part 1 ف البداية قريت كل انواع الأسئلة ف موقع IELTS Advantage و برضو الموقع دة فيهو sample answers ممكن الواحد يستفيد منها، بعد عرفت طريقه الكتابه كيف بقيت اتدرب بي انو بحدد تايمر زي زمن الامتحان الحقيقي و بعداك بمشي chatgpt بشوف الأخطاء وكدة ، طبعا بعد تكتب مرتين تلاته كدة بيظهر ليك نمط بتاع اخطاء ، مثلاً بالنسبة لي كانت عندي مشكله في ال proposition+ articles+ subject verb agreement + punctuation
٤/ Speaking
دة اكتر حاجه انا اهملتها و بديت اتدرب قبل الامتحان بأيام فقط، طبعا ما كان عندي speaking partner و الزمن اصلا بقى ضيق، نزلت كتاب للأستاذ عبدالرحمن حجازي جزاه الله خير الجزاء.
فيهو الأسئله المتوقعه ، بقرا السؤال ، بسجل الاجابه ف التلفون ، براجع التسجيل عشان اشوف الأخطاء وين.
ف البداية الموضوع كان صعب لكن بعد ايام لقيت انو الspeaking بقى احسن من اول. الكتاب صغير يمكن كلو ٦٤ صفحه و طبعا انا الزمن ما كفاني و قريت تقريباً لحدي صفحه ٤٠، بعد الامتحان لقيت نفس السؤال بتاع بارت ٢ و بارت ٣ ف نهاية الكتاب.
