المساعد الشخصي الذكي

معظم البوتات بترد. ده بينفذ.

مساعد شخصي بالذكاء الاصطناعي بيشتغل من محادثة تيليجرام عادية. تبعتله رسالة مكتوبة أو نوتة صوتية، بالعربي أو الإنجليزي، وهو يفهم المطلوب وينفذه فعلاً على حساباتك — يحجز في تقويمك، يبعت إيميلاتك، ويجيبلك ملفاتك من على جهازك.

المواعيد

بيقرا تقويم جوجل ويقولك جدولك في أي يوم أو أسبوع. ولما تطلب منه يحجز، بيراجع الأول لو في حاجة على نفس المعاد — لو لقى تعارض بيقولك بإيه، ويسألك تعمل إيه، بدل ما يحجز فوقه. بيحدد الوقت والمدة، ويضيف المدعوين لو ذكرتهم بأسمائهم.

الإيميل

بيكتب الإيميل بالنيابة عنك من فكرة بسيطة تقولهاله، وبيجيب عنوان الشخص من شيت جهات الاتصال بدل ما تكتبه انت. وقبل ما يبعت، بيعرض عليك المرسل إليه والموضوع وأول سطور الرسالة ويستنى موافقتك. وبيقدر كمان يقرا رسالة أو محادثة موجودة ويلخصهالك.

ملفاتك على الجهاز

تقوله "دورلي على السيرة الذاتية" وهو يلاقيها. بعدها تختار: يفتحها قدامك على الكمبيوتر، أو يبعتها كمرفق — على الإيميل لأي شخص، أو على شات التيليجرام نفسه.

البحث

لما السؤال يحتاج معلومة محدثة — أخبار، أسعار، حاجة حصلت قريب — بينده على وكيل بحث منفصل، ويرد من اللي رجع فعلاً ومعاه المصادر، مش من معلومات قديمة.

الصوت

بيفهم النوتة الصوتية العربية، ويقدر يرد بصوت عربي طبيعي. تقدر تتعامل معاه وانت ماشي من غير ما تكتب حرف.

الذاكرة واللغة

كل محادثة ليها سياقها، فتقدر تقول "ابعتهاله" وهو عارف تقصد مين وإيه. بيرد بالعربية الفصحى، ويتحول للإنجليزية لو اتكلمت إنجليزي، من غير ما تطلب منه.

ورسالة واحدة تكفي لأكتر من مهمة

تقدر تقول "احجزلي مقابلة بكرة الساعة ٢، وابعتله إيميل يفكره بالمعاد، وابعتلي السيرة الذاتية هنا" — يفهم إن دي تلات مهام مختلفة، ينفذهم بالترتيب الصح، ويرجع لك بنتيجة كل واحدة فيهم.

التقنيات

n8n · AI Agent · Telegram Bot API · Google Calendar · Gmail · Google Sheets · Whisper للتفريغ الصوتي · ElevenLabs للصوت العربي · نماذج لغوية عبر OpenRouter و Google Vertex AI

تفاصيل من التنفيذ

كل قدرة sub-workflow مستقل بمدخلات محددة، فإضافة قدرة جديدة ما بتلمسش باقي النظام.

الملفات بتتعامل بمعرّف (id) مش بمسار — الوكيل ما بيشوفش مسار أي ملف أصلاً، فمافيش طريقة يوصل بيها لحاجة بره المجلد المسموح، حتى لو الموديل غلط.

المرفقات بتتبني جوه الـ sub-workflow نفسه، لأن أداة الوكيل بترجع نص مش ملفات — الفرق ده هو اللي بيخلي المرفق يوصل بدل ما العميل يستلم إيميل فاضي.

التواريخ بتتحسب بتوقيت القاهرة مع التوقيت الصيفي أوتوماتيك، فالموعد بيتحجز في الساعة الصح طول السنة.

أي إجراء ما ينفعش يترجع فيه بيتعرض عليك الأول، وأي حاجة قابلة للمراجعة بتتنفذ على طول.

قابل للتخصيص

النظام مبني بشكل معياري، فينفع يتظبط على أي بيزنس: قنوات تانية (واتساب، ويب شات)، أدوات تانية (CRM، شيتات، قواعد بيانات)، أو صلاحيات محددة لكل مستخدم.