من الاعمال الشعرية

كان ليا صاحب جدع

ساعة الوجع بلاقيه

كان ليا صاحب

لف الزمان و ال كان

جنبي بقيت اناديه

مبقاش يجاوب

اصل الزمن لما دار

الكل راح ف مدار

بتزيد سنين العمر

و تضيق علينا الدار

يا شارع الذكرى

فين الدفا و الامان

باسرح في حالك زمان

والاقيك بقيت بارد

فين البيوت بالطين

يوم الخبيز و العجين

فين ناسك الطيبين

عمري عليك شاهد

يا شمس يا طاله

فين ضحكتك ضاله

سبتي السما عتمه

و رقدتي ف الضله

يا صاحبي يا ناكر

يادوب بترمي سلام

و تسبني قبل ما ارد

بالذمه ده اسمه كلام

فاكر زمان لما

كنا زمان لمه

شلة صحاب مجانين

و تاهوا ف الزحمه

الحلم كان بيتنا

و الدنيا صاحبتنا

تحكي على حلمك

افسره بحلمي

و نعدي سهرتنا

فاكر زمان الطيش

كبرنا و الدنيا

سحلتنا بالتلطيش

و اما نحن لزمان

نحدد المواعيد

ننساها أو منجيش

كان ليا صاحب زمان

بس الزمان ساحب

الذكريات ال باقيه

بوشها الشاحب

و شوية المواعيد

و من بعيد لبعيد

سلامات و حبة مجامله

على باب موارب