هل إعاده تعيين موظف إستقال صح ولا غلط؟

هل إعاده تعيين موظف إستقال صح ولا غلط؟

سؤال شائك جدا و ليه أبعاد كتير لازم نفكر فيها قبل إتخاذ قرار إعاده التعيين و نحلل إيجابيات و سلبيات القرار.

أول حاجه لازم نسأل نفسنا الموظف إستقال ليه .. هل إستقال بسبب مديره .. هل وقتها كان شايف إن الشركه مش بتقدره أو بتضيفله قيمه .. هل وقتها كان عنده عرض أفضل من شركه تانيه .. طيب أداء الموظف كان أخباره ايه .. ياترى علاقته بزمايله و مديرينه كانت إزاى .. هل رجوعه للشركه هيضيف اى جديد للشركه .. هل رجوعه هيوصل رساله سلبيه للعاملين فى الشركه .. هل أصلا فى شخص بديل ممكن يقوم بمهام الوظيفه من العاملين الحاليين.

اسئله كتير اوى المفروض نفكر فيها قبل ما نقول اه ممكن يرجع الشركه تانى او لأ صعب يرجع يشتغل معانا تانى.

طيب نحلل الموضوع إزاى علشان ناخد القرار:-

1. إعرف الموظف إستقال ليه .. لو لأسباب شخصيه زى إمتحانات مثلا ساعتها ممكن يرجع عادى جدا .. طيب لو بسبب مديره المباشر .. لو كان موظف كويس ممكن يرجع تانى بس تحت إداره مدير تانى .. بس خد بالك لو مشى بسبب عرض من شركه تانيه حاول تعرف تفاصيل العرض .. لو كان الفرق كبير يبقى من حقه يمشى و لو العرض مش كبير يبقى لازم تكون عارف إنك بالنسباله مجرد محطه و سهل جدا عليه إنه يسيبك تانى .. طبعا مش محتاج افكرك إنك لازم تعرف كويس جدا هو أصلا ما كملش فى المكان الجديد ليه غير إنك لازم تعرف كويس هو عايز يرجع الشركه تانى ليه؟

2. إعرف كويس هو ممكن يضيف ايه للشركه .. المفروض إن الموظف إكتسب خبرات جديده فى الفتره إللى ساب الشركه فيها .. السؤال هنا ايه الإضافه إللى ممكن يضيفها للشركه ولا راجع يعمل نفس الشغل القديم و خلاص؟

3. ايه تأثير إعاده تعينه على بيئه العمل .. هل هيوصل رساله سلبيه للعاملين الحاليين إننا محطه لأى موظف بيدور على فرصه أفضل .. هل هو كموظف لو رجع الشغل هيكون مصدر للطاقه السلبيه؟

4. الموظف نفسه قرر يرجع الشركه تانى ليه .. ممكن يكون شايف إن الشركه هى المنطقه الآمنه إللى ممكن يرجعلها اى وقت .. لو الموضوع كده أوعى يرجع الشغل تانى لان وقتها دى هتكون ثقافه العاملين فى الشركه .. ده غير انه هو كموظف ممكن ينشر إشاعات زى المكان وقع من بعدى و رجعت أقوم الدنيا تانى .. ساعتها هتكون دمرت شركتك من غير ما تقصد.

5. هل فى بديل من الموظفيين الحاليين ممكن يقوم بعمل الموظف اللى عايز يرجع الشركه تانى .. فكر فى السؤال ده كويس اوى خصوصا لو كان المنصب إدارى .. إعاده تعيين الموظف فى الحاله دى ممكن يقتل الطموح جوه العاملين الحاليين و تكون حاله إحباط بلا سبب.

الخلاصه .. حلل كويس جدا سلبيات و إيجابيات قرار إعاده التعيين و ما تاخدش اى قرار غير لما تكون الصوره واضحه جدا ليك و تكون متأكد إن القرار فى مصلحه الشركه و مش هيأثر على بيئه العمل ولا يخلق أى صراعات داخليه بين فريق العمل.

أبعتولنا عن المواضيع إللى حابين إننا نتكلم فيها فى سلسه #كلام_اتش_ار

--------------------------------------------------------------------------------------------

لو عايز تعمل #formal_cv .. جرب خدمتنا المجانيه و ابعت Professional CV للشركات من خلال الرابط التالى

https://www.ryadahq.com/r...

و لمزيد من المعلومات شوف الفيديو فى الرابط https://www.facebook.com/...

و لو انت #HR ممكن تعمل حساب لشركتك مجانا و إعلن عن الوظائف المتاحه مجانا .. إتواصل مع عدد غير محدود من المتقدمين مجانا.

لحساب الشركات إضغط الرابط التالى

https://www.ryadahq.com/s...

#كلام_بيزنس

#كلام_اتش_ار

#مهارات_اداريه

#رياده_لاستشارات_التوظيف

#وظائف_خاليه