صفات المدير الناجح

مدير ولا قائد .. الفتره الأخيره إنتشرت مجموعه مقالات بتتكلم عن الفرق بين #المدير و #القائد و مين أحسن .. فى الحقيقه كل مدير شاطر هو قائد لكن للأسف عدد كبير من المديرين مش بيقدر يطبق الطريقه الصح إللى ممكن تحوله من مدير صعب التعامل معاه لقائد ملهم.

طيب ايه هى أهم صفات المدير الناجح؟

1. التفويض .. من أساسيات الإداره الناجحه إنك تعرف كمدير تستخدم مهاره التفويض و إزاى تفوض صلاحياتك و بعض مهامك لفريق عملك .. فى سؤال مهم لازم تجاوب عليه بينك و بين نفسك .. هل لما بتغيب من الشغل لأى سبب .. الشغل بيقف أو بيتعطل .. هل فريق العمل لازم يرجعلك فى كل كبيره و صغيره .. لو إجابتك أه يبقى لازم تراجع نفسك .. خد بالك إن قياس سرعه الشركات بيتحسب على أساس سرعه أبطئ إداره فى الشركه .. هل تحب إن إدارتك تكون أبطئ إداره فى الشركه .. أكيد لأ .. برضو خد بالك إنه جزء من تقيمك من الإداره العليا للشركه هو بتعرف تفوض ولا لأ .. ليه؟ .. لأنه دليل على إنك دربت موظفينك على أداء مهام العمل بشكل صحيح و كمان بتوضح ثقتك فى نفسك كمدير .. طيب هل التفويض يعنى إعفاءك من المسئوليه .. الإجابه طبعا لأ .. حضرتك مسئول عن كل شخص فى فريق عملك .. مسئول عن غلطه قبل ما تكون مسئول عن الصح اللى بيعمله .. تفويضك لشخص غلط دليل على إنك ما دربتش الموظف بشكل يسمحله بتنفيذ المهمه بشكل صحيح.

2. مستمع جيد .. بعض المديرين بيعتقدوا إن عمليه الإتصال مع فريق العمل بتكون فى إتجاه واحد .. إعطاء الأوامر و عدم المناقشه .. لكن الواقع بيقول إن عمليه الإتصال لازم تكون فى إتجاهين .. حاول دايما تسمع آراءهم .. إعرف مقتراحاتهم .. إنطباعاتهم .. أفكارهم .. خلى فى مساحه للموظف إنه يجيلك و يتكلم معاك .. الطريقه دى هتخليك تحكم على الشغل عموما بصوره أوضح مش بعينك كمدير بس.

3. العدل .. و مش مقصود بيها المعاملات الماديه بس .. المقصود كل التعاملات .. يعنى خليك عادل فى توزيع المهام و الأدوار .. عامل كل الموظفين بطريقه تخليهم يحبوا شغلهم .. علمهم .. إحتويهم .. ما تنساش إن دايما فى فرق مهارات بين الموظفين .. حضرتك لازم تقلل الفجوه دى بإنك تنمى مهاراتهم .. بلاش تحسس الموظفين إنك بتفضل ناس بعينها و الباقى لأ.

4. التواضع .. الإنطباع السائد إن المدير لازم يكون فى حاجز بينه و بين الموظفين و شخص صعب الوصول ليه .. للأسف المبدأ ده كفيل إنه يدمر فريق العمل .. العكس هو الصحيح لازم حضرتك تكون شخص متواضع .. خليك محبوب .. خليك ملهم .. خليك محفز لفريق عملك .. خد بالك إن المدير المتواضع بيخلى الموظف يحب شغله .. بيخليه يطلع أحسن ما عنده.

5. الذكاء الإجتماعى .. واحده من أهم الصفات إللى لازم تكون موجوده فى المدير الناجح .. خلى عندك ذكاء إجتماعى و حسن تقدير .. بلاش لما موظف يطلب أجازه تعمله تحقيق .. طالما عنده رصيد أجازات و الشغل مش هيقف .. وافق على الإجازه .. بلاش ترهقه فى إنه يدور على مبررات لحقوقه .. من ضمن الذكاء الإجتماعى إنك تشارك فريق عملك أنشطتهم غير الرسميه زى مجاملتهم فى الأفراح .. الحاجات البسيطه دى هتخلى عندك فريق عمل عنده إستعداد يعمل أى حاجه علشانك إنت بس .. جرب مش هتندم.

6. التنظيم .. حضرتك قدوه فلازم تكون قد المسئوليه دى .. ما ينفعش تتكلم معاهم عن أهميه التنظيم و حضرتك مش منظم .. علمهم إزاى بترتب يومك و تحدد أولوياتك و تنظم وقتك .. للأسف لو فشلت كقدوه هتتعب كتير فى إداره فريق عملك.

7. المشاركه .. حاول تشارك فريقك أحوال الشركه و أخبارها .. شاركهم فى حل مشاكل الشركه .. شاركهم إنجازتها .. المشاركه ليها إيجابيات زى .. خلق الثقه بين الموظف و الشركه .. زياده ولاء الموظف للشركه .. تحسين نوعيه القرارات لإنها مش مبنيه على رؤيه فرديه .. إكتشاف المواهب من خلال سماع مقتراحتهم فى حل المشكلات.

فى النهايه حابب أشكر كل مدير قدر يكون قدوه و قائد لفريق عمله .. إنت كمان لو عايز تشكر مديرك إعمله منشن و قوله شكرآ.

--------------------------------------------------------------------------------------------

لو عايز تعمل #formal_cv .. جرب خدمتنا المجانيه و ابعت Professional CV للشركات من خلال الرابط التالى

https://www.ryadahq.com/r...

و لمزيد من المعلومات شوف الفيديو فى الرابط https://www.facebook.com/...

و لو انت #HR ممكن تعمل حساب لشركتك مجانا و إعلن عن الوظائف المتاحه مجانا .. إتواصل مع عدد غير محدود من المتقدمين مجانا.

لحساب الشركات إضغط الرابط التالى

https://www.ryadahq.com/s...

#كلام_بيزنس

#كلام_اتش_ار

#مهارات_اداريه

#رياده_لاستشارات_التوظيف

#وظائف_خاليه