كيف تتعامل مع مديرك
تفاصيل العمل
موظفين كتير بيشتكوا فى عالمنا العربى من مديرنهم .. موظفين كتير سابوا شغلهم بسبب مديرينهم .. فى الحقيقه كلنا عندنا نوعين من المديرين .. المدير الطيب السهل فى التعامل .. و فى النوع التانى الرخم اللى صعب جدا تتعامل معاه.
فى إعتقاد عند كتير من المديرين انه لازم يكون حازم و شديد مع موظفينه .. هو صح بس طريقه التطبيق غلط خصوصا لما يكون فهمه للسلطه غلط .. متخيل إنه بيتحكم فى مصائر الناس و إن كلامه شئ مقدس و محدش المفروض يناقشه فيه .. الحقيقه النوع ده من المديرين بيسبب أضرار نفسيه للموظفين و أضرار أكبر للشركه لأن بطريقته دى بيخلى قرار الموظف فى التخلى عن الشركه قرار سهل و بيكون الحل الأمثل للموظف علشان يقدر يحافظ على صحته و حياته .. و فى الحقيقه لازم نقدر الموظف فى قراره.
طيب لو مديرى من النوع الصعب ده .. أعمل معاه ايه؟
1. إعرف المطلوب منك .. اى علاقه عمل فى الدنيا بتقوم على مبدأ المنفعه و تبادل المصالح يعنى من الأخر كده أنا كموظف ليا وصف وظيفى و مهام محدده طالما بعملها زى ما هو مطلوب و بكفاءه يبقى قفلت على نفسك باب من الضغط العصبى بمنتهى الإحترافيه.
2. الإلتزام بالمواعيد .. مش شركات كتير إللى بتقيم الأداء على أساس إنجاز المهام المطلوبه .. معظم الشركات بتهتم بالحضور و الإنصراف .. خليك دايما ملتزم بالمواعيد .. أوصل الشغل فى ميعادك و إمشى فى ميعادك .. و الأهم من ده كله .. لما يتطلب منك حاجه تخلص فى وقت محدد .. يبقى لازم تخلصها فى الوقت المطلوب مش بعده و بكده تبقى قفلت باب تانى من الضغط العصبى بإحترافيه.
3. حفظ الأسرار .. إتعلم دايما إن شغلك سر مش المفروض حد يعرف عنه حاجه .. لما مديرك يتكلم معاك فى حاجه مش لازم تعرف الشركه كلها إن المدير بيثق فيك و قالك على أسرار الشركه و إنك حد مهم و تعرف كل كبيره و صغيره فى الشركه .. فى الحاله دى هتخسر ثقته فعلا و تبقى فتحت على نفسك باب يسمح لمديرك إنه يتعامل معاك بطريقه هتكون نهايتها إنك الخسران الوحيد.
4. الإعتذار .. لما تعمل حاجه غلط قول أنا غلطت .. مش عيب و مش نهايه الدنيا .. طول ما إنت صريح مع مديرك إعرف إنه تلقائيا هيثق فيك.
5. تقبل النقد .. كلنا بنغلط .. مفيش حد كامل .. و علشان كده من الطبيعى إننا لازم نتقبل النقد الموضوعى .. النقد إللى يخلينا نتجنب الأخطاء و نحول السلبيات لإيجابيات.
6. التوثيق .. فى #عالم_البيزنس مفيش حاجه إسمها أنا قولتلك .. فى حاجه إسمها إيميل رسمى .. طول ما إنت معاك مستند يثبت حقك يبقى إنت فى أمان .. بلغه السوق محدش يقدر يلبسك فى الحيطه.
7. تقديم ملخص للمدير .. لو مديرك من النوع إللى بيتدخل فى كل تفصيله يبقى لازم تشاركه كل أحداث شغلك .. من الأخر كده كدره .. صدرله مشاكل .. خليه يكره انه يكلمك .. بس خد بالك ده مش معناه إنك ما تعملش التقارير المطلوبه منك أو تتجاهل مديرك .. #خليك_محترف .
8. إظهار الإحترام .. معظم المشاكل بين المديرين و الموظفين إن الموظف يقول ايه .. أصل مديرى مش فاهم .. و يقوم يتعامل معاه بطريقه غير إحترافيه و تفتقر للإحترام .. هنا إنت كموظف مش جامد ولا بطل ولا أى حاجه حلوه خالص .. بالعكس إنت أثبت إنك مش محترف فى التعامل مع الناس و الأهم من ده كله إنك تفتقر إلى مهاره الإتصال الفعال .. طيب يا سيدى هو مش فاهم .. حاولت تتناقش معاه .. حاولت توضح وجهه نظرك؟
9. الشكوى الرسميه .. لو فشلت فى إنك تعرف تخلى علاقتك بمديرك كويسه و هو فعلا شخص صعب التعامل معاه و حاطك فى دماغه يبقى لازم تقدم شكوى رسميه لإداره #الموارد_البشريه .
10. التخطيط للرحيل .. لو فشلت خالص و قفلت معاك يبقى أسلم حل ليك إنك تشوف شغل تانى .. صدقنى ده أحسن ليك بس أوعى تسيب الشغل لو مفيش بديل.
الخلاصه كلنا بشر و كل واحد ليه مفتاح لشخصيته تقدر من خلاله تتعامل معاه.
أبعتولنا عن المواضيع إللى حابين إننا نتكلم فيها فى سلسه #مهارات_اداريه
--------------------------------------------------------------------------------------------
لو عايز تعمل #formal_cv .. جرب خدمتنا المجانيه و ابعت Professional CV للشركات من خلال الرابط التالى
و لمزيد من المعلومات شوف الفيديو فى الرابط https://www.facebook.com/...
و لو انت #HR ممكن تعمل حساب لشركتك مجانا و إعلن عن الوظائف المتاحه مجانا .. إتواصل مع عدد غير محدود من المتقدمين مجانا.
لحساب الشركات إضغط الرابط التالى
#كلام_بيزنس
#كلام_اتش_ار
#مهارات_اداريه
#رياده_لاستشارات_التوظيف
#وظائف_خاليه