كتابة محتوى إبداعي

حكاية شغف(1)

شغف كانت طفلة ذكية بس شقية ومشتتة كانت بتحب تعمل حاجات كتير بس كانت بتزهق بسرعة ومبتكملش في حاجة للأخر، شوية ترسم عشان بتحب الصور والألوان وبسرعة تزهق قبل ماتتقن الرسم وتروح تعزف موسيقى وبرضه تزهق قبل ما تتعلم فتجرب تكتب قصص وبرضه متكملش!

تكبر شغف وتركز في مذاكرتها و زي أي طالبة مصرية أصيلة تحلم بكليات القمة بس التنسيق يعملها معاها وتدخل في كلية من كليات الشعب وتخلص شغف كليتها اللي مكانتش بتحبها وتبدأ حيرتها تعمل إيه وتشتغل إيه، هي أصلا مش عارفة هي بتحب إيه ولا شاطرة بجد في إيه؟!

وتقول خلاص انا حتعلم لغة أكيد ححتاجها وحتفتحلي مجالات كتيرة للشغل، بس تتخطب شغف وتتشغل في تحضيرات الجواز و تنسى موضوع اللغة بقى بعد الجواز والولاد

تعدي السنين والولاد خلاص كبروا وداخلين المدرسة وشغف بتكبر وقربت من ال30 ولسه ملقتش شغفها ولا عرفت تبقى سعيدة لأنها طموحة وطول عمرها نفسها تلاقي نفسها.

تفتكروا شغف حتعرف شغفها ولا لا؟!

دا اللي حنعرفه المرة الجاية

#حكاية_شغف

#حكايات_ذات

#أنتي_بطلة_الحكاية

#ذات