مقال عن المزايا و التعويضات

النهارده آخر مقال عن #وظائف #اداره_الموارد_البشريه اللى هنتكلم فيه عن #المزايا_و_التعويضات .. يعنى ايه مزايا و تعويضات و ايه أهميتها.

المزايا هى كل مقابل غير مادى يحصل عليه الموظف و التعويضات هى كل مقابل مادى يحصل عليه الموظف.

بس كده؟!

اه .. امال انت فاكر ايه

بس انا مش فاهم حاجه ..

بص يا سيدى .. دلوقتى الشركه لما تدفع مرتب .. ده أسمه تعويض علشان الموظف بياخد فلوس مقابل عمل أداه للشركه .. طيب لو الشركه أشتركت لموظف مع شركه تأمين طبى .. ده إسمه ميزه لأن هنا مفيش مقابل مادى حصل عليه الموظف مقابل حاجه محدده هو عملها.

مثال تانى .. لو الشركه نزلت على المرتب 200 جنيه بدل مكالمات .. ده إسمه تعويض .. طيب لو الشركه سلمت الموظف خط موبايل و دفعت هى الفاتوره .. دى إسمها ميزه.

طيب ايه أهميه المزايا و التعويضات؟

هى من الحاجات إللى بتوضح سياسات الشركه و رؤيتها للمستقبل .. لأن لو فى هيكل مرتبات واضح فطبيعى أنا كموظف أعرف لما أترقى دخلى هيكون كام و ايه المميزات الإضافيه إللى هحصل عليها نتيجه إجتهادى فى عملى .. لو هيكل الأجور مش موجود تأكد كصاحب عمل إنك بتقتل موظفينك بالبطئ و مع الوقت هيكون إستمرارهم داخل الشركه صعب.

طبعا فى رأى منتشر بين المديرين و أصحاب الشركات بيقول .. طيب أنا ممكن أعمل هيكل أجور محترم و الموظفين يسيبوا المكان و يروحوا يشتغلوا فى شركات تانيه أو إن الموظفين ممكن ما يشتغلوش بضمير و ساعتها هكون رميت فلوسى فى الأرض.

يؤسفنى أقولك إن فى الإحتمالين إنت الغلطان .. فى الإحتمال الأول .. وارد جدا يكون تطبيق الهيكل غير عادل أو الهيكل نفسه فيه مشكله أو وجود مشاكل إداريه داخل الشركه تخلى الموظف يضحى بالمرتب و المميزات الخاصه بالشركه بسهوله .. أما فى الإحتمال التانى .. لو فى موظف واحد فى أى إداره عنده وقت فراغ خلال اليوم .. دى بالضروره غلطه مديره المباشر .. ما تفكرش فى شماعه تعلق عليها الأخطاء و تقول أصل الموظفين معدومى الضمير .. التعميم غلط و أى مكان فيه الكويس و الوحش.

عايز أحكى عن تجربتى الشخصيه على مدار 15 سنه شغل .. منهم 12 سنه فى شركه واحده .. اه و الله زى ما بقولك كده .. بدأت فى الشركه دى كموظف إدارى صغير و بدأت أتعلم و أطور من نفسى لحد ما وصلت لمدير إداره و بعد كده مدير مشروعات .. تفتكروا ليه ممكن أكون قعدت فى الشركه 12 سنه و ليه حاولت أطور من نفسى .. كان ممكن أفضل موظف إدارى و خلاص أو أستنى أى صدفه و أبقى مدير و السلام .. ببساطه شوفت قدامى حاجه واضحه بتقولى لما تتعب و تجتهد هتوصل لكذا و كذا .. غير طبعا الدعم القوى من مديرى المباشر و صاحب الشركه نفسه .. عايز أقولهم شكرا على كل حاجه عملتوها معايا .. فاكر دايما الكلمه إللى كانت بتتقالى .. إتعلم و تعالى طبق و إحنا فى ضهرك.

دلوقتى عايز أسال كل مدير و صاحب عمل .. لو إنت مكان الموظفين فى شركتك .. هل هتكون راضى عن المرتب إللى الشركه بتدفعه .. هل لو حضرتك مكان الموظف هيكون سهل عليك قرار إنك تسيب الشغل علشان 200 جنيه زياده؟

أرجوك .. كون صادق مع نفسك .. لو جاوبت بنعم بدون تردد يبقى إنت صح .. و لو فكرت شويه أو قولت لا على طول يبقى حضرتك محتاج تراجع سياسات شركتك من جديد.

لو حضرتك مفكرتش إن معدل دوران العماله العالى مش بيخسرك فلوس .. فإسمحلى أقولك إنت فى خطر .. هيحصل ايه لو الشركه تخلت عن 5% من أرباحها السنويه فى مقابل الحفاظ على الموظفين .. هما دول رأسمالك الحقيقى .. إستثمر فى رأسمالك البشرى .. هتوصل للنجاح أسرع و أقوى.

بعد ما خلصنا التعريف و إتكلمنا عن أهميه المزايا و التعويضات للشركه محتاجين نسأل .. هى المزايا و التعويضات بتتعمل على أى أساس؟

فى طرق كتير جدا من أشهرها المقارنه .. يعنى تقارن الوظيفه بوظائف مشابهه ليها فى السوق .. بس فى مقالنا ده مش هنتكلم عن الطرق دى ولا ايه انسب طريقه للتطبيق .. إحنا قولنا ايه أهميه المزايا و التعويضات و على أساسها كون هيكل مرتبات يخلى شركتك جاذبه للمهارات فى السوق .. خلى عندك الهيكل إللى يخلينى كموظف أفكر 1000 مره قبل ما أقرر اقدم إستقالتى .. إردمنى شغل بس إدينى مقابل يعيشنى عيشه كريمه .. إدينى مرتب ما يخلنيش أشيل هم أسرتى .. ده المغزى من مقال النهارده .. ممكن تلاقى شغلانه متوسط مرتباتها 2000 جنيه .. بس هل المرتب ده يخلى الموظف يستمر فى الشركه .. هل هيكون مرتاح البال و كل همه يطلع أحسن ما عنده فى الشغل.

كده خلصنا مقال النهارده و كمان خلصنا مجموعه مقالات #اداره_الموارد_البشريه .. استنونا فى مواضيع جديده خلال شهر #نوفمبر فى سلسه #كلام_اتش_ار.

--------------------------------------------------------------------------------

لو عايز تعمل #formal_cv .. جرب خدمتنا المجانيه و ابعت Professional CV للشركات من خلال الرابط التالى

https://www.ryadahq.com/r...

و لمزيد من المعلومات شوف الفيديو فى الرابط https://www.facebook.com/...

و لو انت #HR ممكن تعمل حساب لشركتك مجانا و إعلن عن الوظائف المتاحه مجانا .. إتواصل مع عدد غير محدود من المتقدمين مجانا.

لحساب الشركات إضغط الرابط التالى

https://www.ryadahq.com/s...

#كلام_بيزنس

#كلام_اتش_ار

#مهارات_اداريه

#رياده_لاستشارات_التوظيف

#وظائف_خاليه