مقال عن تخطيط القوى العامله داخل الشركات

واحده من أهم أساسيات شغلنا فى #اداره_الموارد_البشريه هى التخطيط .. تقريبا أكتر من 75% من شغلنا مرتبط بالتخطيط .. النهارده هنتكلم عن أصعب جزء فى التخطيط أو الوظيفه الخامسه من وظائف إداره الموارد البشريه و هى #تخطيط_القوى_العامله.

ببساطه تعريف عمليه تخطيط القوى العامله هى عمليه التنبؤ بحجم العماله المطلوبه لأداء المهام المطلوبه و تحقيق إستراتيجيه الشركه خلال العام القادم .. ممكن يكون التعريف بسيط لما تقرأه بس فى تحديات كتير هتواجهك و أنت بتنفذ العمليه دى.

أول حاجه لازم تحدد حجم العماله المطلوبه .. الموضوع ده بيتم بأكتر من طريقه .. مثلا لو الشركه صغيره هتلاقى ال #HR بيبعت ايميل للمديرين يطلب منهم تحديد عدد الموظفين الجدد المطلوب تعينهم مع تحديد الوقت الازم لوجودهم .. فى طريقه تانيه و هى حساب المتوسط المتوقع .. فى الكتب هتلاقى أمثله كتير من ضمنها جمع عدد الموظفين خلال 5 سنوات مثلا و قسمه المجموع على 5 .. مثلا النتيجه 200 و العدد الحالى للموظفين 180 يبقى انت هتعين 20 موظف جديد .. و فى مثال انا بعتبره واقعى أكتر و هو .. لو المبيعات السنويه 20 مليون جنيه و بيتم تحقيق الرقم ب 10 موظفين و الشركه قررت زياده المبيعات ل 40 مليون سنوى .. طبيعى إنك تحتاج تعين 10 موظفين جدد .. وهكذا.

أهم حاجه لازم تكون متوفره علشان تقدر تعمل التخطيط صح هو وجود إستراتيجيه للشركه .. لو الإستراتيجيه مش موجوده يبقى إنسى تخطيط الموارد البشريه خالص .. و ساعتها هتضطر تتعامل بطريقه لما نحتاج حد هنعينه .. و للأسف الطريقه دى منتشره جدا فى الشركات.

خد بالك إن من أصعب التحديات اللى ممكن تقابلك بعد تحديد حجم الطلب هو إنك تشوف المعروض من العماله ممكن يلبى إحتياجاتك ولا لأ .. من واقع خبره بقولك أوعى تستهون بالموضوع ده .. مش معنى إنك عايز موظف خدمه عملاء مثلا إنك هتلاقيه ببساطه و سهوله.

طيب ليه أصلا تخطيط القوى العامله مهم .. تخيل كده إن من أهداف الشركه إنها تفتح فرع جديد .. الفرع ده مش محتاج موظفين .. لو مافيش إستراتيجيه واضحه للشركه مش هيكون فى خطه تعينات أصلا و طبيعى ساعتها إنك ما تكونش عارف تبدأ عمليه الإستقطاب و التعيين إمتى .. تفتكر ساعتها النتيجه هتكون ايه؟

فى مقال النهارده مش هنتكلم عن ليه و إمتى بيتم تعيين الموظفين لإننا إتكلمنا عن القصه دى بالتفصيل فى المقال الخاص بالوظيفه الثانيه لإداره الموارد البشريه .. بس عايزين نتكلم مع بعض فى نقطه مهمه و هى إزاى أقدر أوفق بين التخطيط للقوى العامله و الواقع إللى هيحصل معايا فعلا.

بص يا سيدى .. فى السوق المصرى صعب أوى تقدر تعمل خطه تعيينات و تطبقها بنسبه 100% لأسباب كتير منها مثلا .. موظف قدم إستقالته علشان عنده عرض أفضل فى شركه تانيه .. طبعا ده حقه .. بس صعب أوى تخطط لموقف زى ده .. صعب أصلا تتوقع حاجه زى دى خلال سنه كامله .. بس من الناحيه التايه أقولك لازم تأمن نفسك و ما تنساش إن ال CVs هى رأسمالك .. من الأخر كده موظف إستقال و اخره معاك أسبوعين .. هتقدر تعين واحد مكانه خلال المده دى ولا لأ.

من الحاجات إللى ممكن تعمل على أساسها خطه توظيف .. حالات خروج موظف للمعاش أو الترقيات أو موظفين عقودهم هتخلص و مش هيتم التجديد ليهم .. ممكن كمان تتوقع كام موظف ممكن ما يكملش فى الشركه بسبب تقارير الأداء الخاصه بيهم.

خلصنا مقال النهارده و عارف إنك ممكن تقول لنفسك هما ما قالوش كل حاجه ليه .. أقولك علشان بنحاول نكتب على أساس واقع عملى مش كلام نظرى و خلاص .. غير إن الموضوع ده كبير و متفرع و محتاج كتاب كامل مش مقال.

فى المقال القادم هنتكلم عن اخر وظيفه من وظائف #اداره_الموارد_البشريه و هى الأجور و المرتبات ضمن مقالات شهر #اكتوبر فى سلسله #كلام_اتش_ار.

--------------------------------------------------------------------------------

لو عايز تعمل #formal_cv .. جرب خدمتنا المجانيه و ابعت Professional CV للشركات من خلال الرابط التالى

https://www.ryadahq.com/r...

و لمزيد من المعلومات شوف الفيديو فى الرابط https://www.facebook.com/...

و لو انت #HR ممكن تعمل حساب لشركتك مجانا و إعلن عن الوظائف المتاحه مجانا .. إتواصل مع عدد غير محدود من المتقدمين مجانا.

لحساب الشركات إضغط الرابط التالى

https://www.ryadahq.com/s...

#كلام_بيزنس

#كلام_اتش_ار

#مهارات_اداريه

#رياده_لاستشارات_التوظيف

#وظائف_خاليه