مقال عن كتابه إيميل إحترافى

من 12 سنه كنت خريج جديد و كانت بتواجهنى مشكله عايز اشتغل شغل كويس بمرتب كويس .. لآ و كمان الشغلانه يكون ليها مستقبل.

عملت مقابلات كتير و طبعا اترفضت لعدم وجود خبره .. مش عارف ازاى بالرغم من ان الشغلانه لحديثى التخرج .. المهم بعد تعب كتير عملت مقابله فى شركه و الحمد لله اتقبلت و نزلت تدريب و كل حاجه كانت حلوه لغايه اول يوم شغل.

حوالى الساعه 12 الظهر لقيت مديرى بيكلمنى و بيقولى ابعت ايميل للإداره الماليه قولهم فيه كذك و كذا

طبعا مش قادر اوصفلكم كائن الل حزلقوم اللى انا كنت متقمصه .

المدير: ابقى حطنى فى الميل

انا: انهون

المدير: يابنى بقولك ابقى سيسنى فى الميل

انا: انهين

طبعا انا واقف و متخيل كلمه اطلع بره هى اللى ها تتقالى دلوقتى و فى نفس الوقت عمال اسال نفسى هى الحاجات دى محدش درسهالنا ليه .. ثوانى بس هو اصلا يعنى ايه ايميل؟

كل المقدمه دى علشان اوضحلك ان اى بيزنس فى الدنيا بيعتبر مجموعه من المهارات لازم تكون موجوده فى الموظف بالفطره زى الانجليزى .. الكمبيوتر .. كتابه الايميلات و شويه حاجات تانيه .. و عدم وجود المهارات دى كفيله انها تخليك تترفض فى اى مقابله.

علشان كده عملنا سلسله اسمها #مهارات_اداريه ها نتكلم فيها عن مهارات لازم تكون موجوده فى كل موظف سواء مهارات شخصيه او كمبيوتر او بيزنس و النهارده ها نتكلم عن مهاره كتابه الايميلات الاحترافيه حتى لو كنت مبتدئ.

خمس مبادئ استعملهم و انت بتكتب اى ايميل:-

1. ابدأ بتحيه احترافيه

دايما ابدأ ايميلك بتحيه الشخص و استخدم الالقاب زى Dear Mr. Ahmed او Dear Dr. Mohamed طيب لو بتبعت ايميل لحد ما تعرفوش زى مثلا لما تبعت السيره الذاتيه لشركه ها تكتب ايه؟ غالبنا بتكتب اسم الفريق اللى بتبعتله او اسم الشركه او اللقب.

فى حاله زى السيره الذاتيه ممكن تكتب كده Dear RyadaHQ Team او Dear HR Team او Dear Hiring Manager.

و لو بترد على ايميل انت استلمته حاول تبدأ ردك بشكر زى مثلا I appreciate your quick response او Thank you for getting in touch.

2. وضح هدف الرساله

افتكر دايما ان الشخص مستلم الايميل بيكون عنده ايميلات جدا لازم يرد عليها يوميا فحاول تكون واضح جدا فى كلامك زى مثلا انك تقول I am writing to enquire about او I need to get approval for

3. استخدم كلمات انجليزيه صحيحه

فى عالم الاعمال اللغه الانجليزيه هى اصل التعامل علشان كده ها تلاقى معظم الشركات بكتب ايميلاتها بالانجليزى. طبعا مش مطلوب منك تكون خبير لغوى علشان تبعت ايميل بس على الاقل يكون عندك الاساسيات و ممكن كمان تستعين ببرامج تصحيح لغوى زى Grammarly و مع الوقت ها تلاقى نفسك مستواك اتحسن فى الكتابه.

4. خير الكلام ما قل و دل

الكتابه بتنقل حوالى 20% من الرساله المطلوب توصيلها علشان كده حاول ايميلك يكون بسيط وواضح يعنى ما تزودش عن 3 فقرات.

بفكرك تانى ان مستلم الايميل عنده اميلات كتييير لازم يرد عليها.

5. اختم بشكل مهذب

فى الخاتمه بتكتب جمل زى Thank you او Best Regards او Sincerely و الاهم انك لازم تكتب اسمك .. المسمى الوظيفى .. بيانات الاتصال.

طيب كده خلاص؟

لا لسه علشان فى نقط مهمه جدا لازم تتاكد منها قبل ما تبعت الايميل زى:-

1. ال subject و ده لازم يكون واضح جدا و منه اقدر افهم مضمون الرساله.

2. ال CC (carbon copy) & Bcc (blind carbon copy)

3. اتاكد من المرفقات.

4. لو بترد على رساله اتاكد هى Reply ولا Reply all

كده خلصنا النهارده اول مهاره من ضمن مجموعه كبيره من المهارات لازم تكون متوفره فيك كموظف.

ابعتولنا ايه المهارات اللى حابين اننا نتكلم عنها.

لو عايز تعمل #formal_cv .. جرب خدمتنا المجانيه و ابعت Professional CV للشركات من خلال الرابط التالى

https://www.ryadahq.com/r...

و لمزيد من المعلومات شوف الفيديو فى الرابط https://www.facebook.com/...

و لو انت #HR ممكن تعمل حساب لشركتك مجانا و إعلن عن الوظائف المتاحه مجانا .. إتواصل مع عدد غير محدود من المتقدمين مجانا.

لحساب الشركات إضغط الرابط التالى

https://www.ryadahq.com/s...

#كلام_بيزنس

#كلام_اتش_ار

#مهارات_اداريه

#رياده_لاستشارات_التوظيف

#وظائف_خاليه