مقال عن المهارات الأساسيه للموظف المثالى

للأسف فى الفتره الاخيره انتشر إنطباع سئ بين الناس إن فى صراع بين الإتش ار و المتقدم للوظيفه و كأنه صراع بين الخير و الشر. طبعا إحنا مش بننكر إن فى ناس دخيله على المجال و بسببهم حصل سوء التفاهم و اللغط الكبير ده .. و برضو مش بننكر إن فى انترفيوهات بتتعمل بطريقه غير احترافيه هدفها بس تعقيد المتقدم للوظيفه او استعراض الشخص اللى بيعمل المقابله .. للأسف دول مستحيل يكونوا #اتش_ار فاهم.

ببساطه الإتش ار هو موظف ليه اهداف محدده مطلوب منه تحقيقها و اللى اهمها على اللإطلاق هى اختيار موظف كفء .. طيب ازاى يختار الموظف ده من وسط متقدمين كتير للوظيفه .. اكيد لازم يكون ليه معايير .. طيب ايه هى المعايير؟

فى 10 مهارات اساسيه لازم تكون متوفره فى كل متقدم للوظيفه بصرف النظر عن الوظيفه او اللقب الوظيفى و هى كالتالى:-

1. الإتصال

هى واحده من اهم المهارات لأن من خلالها بتتعامل مع موظفين الشركه و العملاء و مش المقصود هنا انك تكون مبتسم او بتتعامل بشكل كويس .. لازم تكون بتعرف تتكلم كويس و توصل رسالتك بوضوح و كمان بتعرف تكتب مراسلاتك اليوميه زى الايميلات .. بإختصار لازم تكون بتعرف تتواصل بشكل فعال.

و لو عايز تقرا اكتر عن كتابه ايميل احترافى اقرا المقال ده

https://business.facebook...

2. الإلتزام و الجديه

تخيل كده إن ميعاد مقابلتك كان الساعه 10:00 صباحا و انت رحت المقابله الساعه 1:00 الظهر .. تفتكر ايه الرساله اللى ممكن افهمها من تأخيرك غير إنك غير ملتزم و غير جاد .. غالبا فى موقف زى ده اعرف ان اللى ها يعملك المقابله ها يكون واخد عنك إنطباع سئ و ها يكون بيسأل نفسه سؤال مهم .. لو فى المقابله مش ملتزم .. ها يعمل ايه لما يبقى موظف؟

3. المرونه

طبعا مش كل حاجه بنخططلها بتتنفذ زى ما احنا عايزنها بالظبط .. طيب المرونه بتتقاس ازاى فى الإنترفيو .. اقولك انها بتختلف من شخص للتانى بس الاكيد انها مش سهل تقيسها فى مقابله مدتها 15 دقيقه.

4. الأمانه

كلمه كبيره اوى صعب تتعرف فى مقابله مدتها 15 دقيقه بس خد بالك إن من ضمن الأمانه انت بتتكلم إزاى على شركتك القديمه .. هل افشيت اى اسرار ليها؟ .. هل قولت تفاصيل تخص أسرار شغلك؟ .. طيب اتكلمت عن مديرك السابق إزاى؟ .. خد بالك إن اخلاقيات العمل من ضمن الأمانه.

5. إداره الوقت

الطبيعى إنك يوميا ها يكون عندك مهام كتير جدا و لو مش ها تعرف ترتب أولوياتك و تنظم وقتك غالبا ها تعانى جدا فى وظيفتك و فى حياتك عموما. طبعا الجزء ده بيتعرف فى المقابله من خلال مجموعه اسئله و من خلال ردك عليها بيكون واضح انت عندك المهاره دى ولا لأ.

6. التعليم و تطوير الذات

تانى اهم حاجه بنبص عليها فى السيره الذاتيه هى الكورسات .. يا ترى بتحاول تنمى مهاراتك ولا لأ؟

كل حاجه حواليك بتتطور بشكل سريع و مخيف و لو انت مش بتحاول تنمى مهاراتك و تتعلم حاجه جديده ها تلاقى مثلا ان فى موظفين جداد فى الشركه بقوا مديرينك لأن عندهم مهارات اقوى و أحدث منك .. للأسف يا عزيزى دى غلطتك مش غلطه الشركه.

7. العمل الجماعى

شبه مستحيل تلاقى موظف بيشتغل لوحده حتو لو إدارته عباره عن موظف واحد بس .. لازم تلاقيه بيتعامل مع إدارات و أقسام تانيه.

لو عايز تعرف اكتر عن الهيكل التنظيمى اقرا المقال ده

https://business.facebook...

8. التفاوض

مش لازم تكون رجل مبيعات علشان تقول دى مهاره مهمه لازم اتعلمها .. كل حاجه بنعملها فى يومنا عباره عن مجموعه من المفاوضات .. إنك تخرك مع صحابك و تروحوا مطعم معين ده موقف فيه كميه مفاوضات زى انك تقنع اصحابك بالخروج اصلا و بعدين تقعدوا تتفاوضوا ها ناكل ايه و فين .. طب تخيل بقى الشغل ها تتفاوض على كام موضوع و مع كام شخص؟

9. التحليل و حل المشكلات

المهاره دى بتميز موظف عن التانى .. ها تلاقى مشاكل بتقابلك فى شغلك .. طيب لو ما عرفتش المشكله و ايه سببها و ازاى نحلها ها تتحول تلقائيا إلى موظف ناقل للمشكله لانك ببساطه ها تنقلها لمديرك .. و هو لازم تنقلها لمديرك .. بس تخيل انك بتقوله فى مشكله كذا و سببها كده و اتحلت بطريقه كذا .. تفتكر مين احسن؟

10. المهارات التكنولوجيه

المهارات السابقه كلها مرتبطه بالموظف و الاخرين بس المهاره دى مرتبطه بيك انت كشخص .. تخيل انك مقدم على وظيفه محاسب و شاطر فى كل المهارات السابقه بس ما بتعرفش اكسيل محاسبى .. يؤسفنى اقولك ان ها يتقالك الرد المشهور .. ها نبقى نتصل بيك.

الخلاصه ان كل المهارات اللى اتكلمنا عنها لازم تكون موجوده فى كل موظف علشان مسئول الإتش ار يقدر يقول عليه موظف مناسب و ها يحققلى اهداف الشركه.

خلصنا موضوعنا النهارده اللى كان جزء من سلسله #مهارات_اداريه.

ابعتولنا ايه المهارات اللى حابين اننا نتكلم عنها.

لو عايز تعمل #formal_cv .. جرب خدمتنا المجانيه و ابعت Professional CV للشركات من خلال الرابط التالى

https://www.ryadahq.com/r...

و لمزيد من المعلومات شوف الفيديو فى الرابط https://www.facebook.com/...

و لو انت #HR ممكن تعمل حساب لشركتك مجانا و إعلن عن الوظائف المتاحه مجانا .. إتواصل مع عدد غير محدود من المتقدمين مجانا.

لحساب الشركات إضغط الرابط التالى

https://www.ryadahq.com/s...

#كلام_بيزنس

#كلام_اتش_ار

#مهارات_اداريه

#رياده_لاستشارات_التوظيف

#وظائف_خاليه