مقال عن التحليل الوظيفى
تفاصيل العمل
إتكلمنا قبل كده عن علم #اداره_الموارد_البشريه و قولنا ايه أهم المهارات المطلوب توافرها فى مسئول إداره الموارد البشريه و قولنا كمان إن وظائف إداره الموارد البشريه بتتمثل فى 6 وظائف .. ممكن تقرأ المقال من الرابط ده
النهارده هنتكلم عن الوظيفه الأولى و هى وظيفه التحليل الوظيفى أو ال Job Analysis
يعنى أيه تحليل وظيفى و أيه أهميه الوظيفه دى فى إداره الموارد البشريه؟
ببساطه هى الوظيفه إللى من خلالها بتجمع معلومات عن الوظيفه علشان تطلع فى النهايه ال Job Documentation
طيب معلومات زى ايه .. زى أيه هى الوظيفه أصلا و أيه أهميتها فى الهيكل التنظيمى و أيه المهام المطلوبه من الوظيفه أو ايه هى ال Objectives إللى بعد كده بنطلع منها ال Job Description و بعد كده كل مهمه فى الوصف الوظيفى بنبدأ نحدد منها الخصائص المطلوب توافرها فى شاغل الوظيفه Job Specification.
برضو الكلام النظرى ده معناه ايه .. و بيطبق إزاى عمليا؟
مثلا شركه عايزه تعمل تحليل وظيفى لمشرف مبيعات .. المفروض انا كمسئول موارد بشريه اعمل ايه؟
أول حاجه لازم تعرف مهام مشرف المبيعات (Objectives) .. مثلا هو المشرف المسئول عن إداره 5 مندوبين مبيعات فى منطقه جغرافيه محدده.
تانى خطوه تبدأ تعمل وصف وظيفى و يكون مكتوب فيه بالتفصيل و بمنتهى الوضوح المهام اليوميه – الاسبوعيه – الشهريه – الربع سنويه – السنويه .. و هنكمل على نقس المثال ..
المهام اليوميه: متابعه المندوبين و إدارتهم – إرسال تقارير يوميه للمدير المباشر عن خط سير المندوبين – إستلام تقرير بالمبيعات اليوميه لكل مندوب .. إلخ.
المهام الإسبوعيه: إرسال تقرير إسبوعى للمندوبين بالهدف الخاص بالإسبوع الجديد على أن يتم إرسال الإيميل يوم الإربعاء من كل أسبوع و بحد أقصى يوم الخميس الساعه 4 عصرا .. شوف هنا الدقه فى تحديد المهمه المطلوبه من المشرف على عكس ما كان مكتوب فى المهام اليوميه .. متابعه المندوبين و إدارتهم .. كلمه مطاطه و محدش يقدر يحاسبه على حاجه محدده.
طيب كده خلصنا ال Objectives و خلصنا ال Job Description .. الخطوه الثالثه عباره عن عمل ال Job Specifications و ال Job Requirements .. كل مهمه مطلوب تنفيذها المطلوب انها بتتقسم لحاجتين:-
الأولى: هيتعملوا إزاى ..و المقصود هنا الوسائل المطلوب توافرها لتنفيذ المهمه زى إن المشرف يكون معاه تابلت و خط موبايل فيه باقه إنترنت علشان يبعت الإيميلات و كمان يبقى الخط فيه دقائق أو فاتوره مفتوحه علشان متابعه الفريق و يقدر يكلم العملاء لو فى مشكله واجهت أى مندوب.
الثانيه: علشان المهمه تتنفذ لازم شاغل الوظيفه يكون بيعرف ايه؟ فى مثالنا هنا لازم يكون بيعرف يكت إيميلات و على درايه كامله بمهارات إستخدام الايميل من خلال التابلت بالإضافه انه لازم يكون خبره فى المبيعات 3 سنوات مثلا .. إلخ.
مبدأيا كده احنا لخصنا ايه هو ال Job Analysis بس برضو عايز أوضحلك كام نقطه مهمه من خلال خبره سنين فى المجال:-
1. العلم النظرى مهم بس العملى أهم.
2. هتلاقى عشرات المقالات بتتكلم فى نفس الموضوع و بتفاصيل كتير و متاهات كتير .. إهتم دايما بالخلاصه و ايه اللى مناسب لشغلك.
3. التحليل الوظيفى هو العمود الفقرى لإداره الموارد البشريه.
4. كل ما تتعب و تعمل ال Job Analysis بإتقان .. تأكد إنك بتحل أكتر من 50%
من المشاكل اللى ممكن تواجهك فى المستقبل.
5. فكر معايا كده لو مكتوب فى ال Job Specification جمله زى يجيد إستخدام الحاسب الألى .. ممكن تقولى يعنى ايه يجيد إستخدام الحاسب الألى .. بيعرف يشغل أفلام مثلا .. لازم تكون محدد جدا وواضح جدا و انت بتكتب الكلام ده .. حاول توضح لزميلك اللى ها ياخد قرار التعيين يقبل او يرفض المتقدمين على اى اساس .. مثلا لازم تعرفه و بمنتهى الوضوح ان الوظيفه دى علشان تنفذ المهام المطلوبه منها ان الموظف يكون بيعرف Excel و Outlook و بيعرف يتعامل مع الطابعات .. وهكذا.
6. التحليل الوظيفى مالوش اى علاقه بالأشخاص .. التحليل بيكون مرتبط بالوظيف ككل و مش فارق الوظيفه دى بيشتغلها فرد واحد او 100 فرد.
7. مافيش شركه محترفه بتعين شخص و بعد كده بتعمله تحليل وظيفى مناسب ليه.
8. التحليل الوظيفى مش مرتبط بإن الشركه لسه ها تبدأ شغل .. هو كمان بيتعمل للشركات القائمه بالفعل و ساعتها بيكون الهدف هو تطوير الهيكل التنظيمى.
9. التحليل الوظيفى بيتعمل لكل إداره و لكل منصب جوه الإداره و لكل وظيفه دوه الإداره .. مثلا إداره المبيعات بيتعملها تحليل وظيفى كلى و بعد كده تحليل وظيفى لمديرين المبيعات و للمشرفين و المناديب .. و خد بالك إن كل مهام وظيفيه واحده ليهم تحليل وظيفى واحد .. وهكذا.
10. التحليل الوظيفى بيتبنى عليه المرتبات و قياس الأداء و التعينات.
11. جمع المعلومات عن الوظيفه بيتم من خلال مجموعه إجراءات و هى المقابله الشخصيه – الملاحظه – الإستقصاءات – سجل الأحداث.
خلصنا مقالانا النهارده اللى بنتكلم فيه عن الوظيفه الأولى لإداره الموارد البشريه .. إستنونا فى المقال القادم اللى هنتكلم فيه عن التوظيف و عمليه إختيار الموظف المناسب و إللى هو جزء من سلسله #كلام_اتش_ار
--------------------------------------------------------------------------------
لو عايز تعمل #formal_cv .. جرب خدمتنا المجانيه و ابعت Professional CV للشركات من خلال الرابط التالى
و لمزيد من المعلومات شوف الفيديو فى الرابط https://www.facebook.com/...
و لو انت #HR ممكن تعمل حساب لشركتك مجانا و إعلن عن الوظائف المتاحه مجانا .. إتواصل مع عدد غير محدود من المتقدمين مجانا.
لحساب الشركات إضغط الرابط التالى
#كلام_بيزنس
#كلام_اتش_ار
#مهارات_اداريه
#رياده_لاستشارات_التوظيف
#وظائف_خاليه