رثاء فى ذكرى أمى ال26 عاما بقلم الكاتبة إسلام العيوطى
تفاصيل العمل
رثاء فى ذكرى وفاة أمي ال26
..........................................
أحلى حاجة فى دنيتي لما أقول إني بنتك
كنتي دايما ولا زلتي فخر ليا، فخر حتى لكل عيلتي
أنتي أول من درسلي عربى والعلوم أوعي تنسي
كنت دايما أقول يا ماما تقوليلي أنا أبله إبتسام
جعلتني فى حيره بين حروف ماما وأبله
كل مره باختلاف المكان لازم أعيد لما أنسى بانسجام
كنتي دايما زوجه ناجحه أم فالحه أبله شاطره بامتياز
أي حد يعرفك شايفك أخته لازم يضربلك تعظيم سلام
كنتي ست بألف راجل، كنتي شمس بتضئ المكان
شاطرة لهلوبه فى ثانيه كل حاجه بتنجزيها أوام ..أوام
كنت مره رافعه رجلي، مره واحدة قالت يابنتي
فى حضرة أبوكي كله يجلس ،، كله يسمع باحترام
كانت بنظرة .........نظرة واحدة من عنياها
كلنا نقف انتباه ........... كله ينصت باهتمام
الكلام كان بالأدب ،، ربتينا على الخلق
كل شيء بالحساب والنظام هو أساس المكان
زرعتي فينا خير كتير ... كنتي نبع من الحنان
وتركتي فينا ذكرى حلوة على طول السنين
كل سجده فى صلاتي بدعيلك ياأغلى ما فى حياتي
ربنا يرفع قدرك بين الخلائق فى أعلى مكانه فى الجنان
عايزه أقولك بعد كل ده غياب ........ ربع قرن أو يزيد
سايبه بين الناس مكانه عاليه خالص فى العنان
كنتي بسمه زي اسمك كنتي أحلى ما فى المكان
غاليه ................... غاليه حتى أغلى من عنيه
بس لازم أرضى بالقدر ..... أيوه ده حكم الزمان
كنت بتمنى تشاركيني فرحي أوحتى همي تحسسيني بالأمان
واكتفى من القرب إني أشوفك مره حتى فى المنام
وجه صافى حضن دافي حلم يديني الحنان
كنت بتكسف والله منك إني أبوسك نفسي تاني
ترجعي .....وابوس أيديكي علي أحس بإمتنان
بعد كل دي السنين صاحبتك تشوفني تجري
تحضني تبوسني وتقولي يا مرحب بريحة الغاليين
شايله حمل كبير لواحدك كل مانقول نساعدك
بكره ياحبيبي تعملوا ماتستعجلوش إتدللوا
وكأنك حاسه إنك ماشيه من الدنيا بدري
وجعه قلبي بفراقك الدموع مش كفايه
كسرة القلب حكايه ....مهما أقولك إنتي حاسه
إنتي كنتي ولازلتي جو قلبي أغلي من نفسي كمان
يالي كنتي جو روحي ضحكتك بتداوي جروحي
رحتي بدري فى الأربعين كل لحظه بعدك ياأمي ليكي حنين
كانت والله حادثه بشعه كسرت القلب تركته كله أنين
بعدها إنتابني صدمه مش ببالغ لو قلتلك حتى حين
بس كل اللي بيواسيني عن فراقك هو ذكراكي الجميله
اللي عايشه لسه بينا بعد كل دي السنين...بقلم /إسلام العيوطي
بطاقة العمل
| اسم المستقل | خبر م. |
| عدد الإعجابات | 0 |
| عدد المشاهدات | 289 |
| تاريخ الإضافة | |
| تاريخ الإنجاز |