مقالي عن ڤيروس كورونا

شعبنا طيب جداً وتلقائي لأبعد الحُدود، بنحب نضحك ونعيش يومنا بيومه وبنحب نمشي بمزاجنا بس، انما جو التعليمات والأنظمه مش بينفع معانا كمصريين..

من شهر تقريبا ظهر نوع جديد من ڤيروس كورونا وتحديداً بدأ من مدينة ووهان الصينيه، الڤيروس بتتمثل خطورته في سرعة انتشاره.. الڤيروس لف العالم بسرعه رهيبه لحد موصل عندنا ، بغض النظر عن استقبال المصريين للڤيروس بالضحك والهزار ،بس الموضوع خطير جداً علينا

..احنا شعب تقاليدنا وعادتنا كلها تساعد الفيروس علي الأنتشار بنستقبل كل حاجه بالأحضان والبوس ، والخوف الحقيقي ان انظمتنا الصحيه ومستشفياتنا مش هتستحمل ڤيروس بالشكل ده لو انتشر بشكل كبير وخصوصاً بعد ما منظمة الصحه العالميه صنفته علي انه "وباء" وطبعاً التاريخ بيحكي عن اوبئه كتير اجتاحت العالم وكانت الخساير رهيبه زي الكوليرا والحصبه وانفلونزا الخنازير وعدد كبير جداً

وزي مشوفنا في ايطاليا كده استقبلوا الڤيروس بهزار وضحك ودلوقت بيدفعوا التمن والبلد كلها في حالة من الرعب والنهارده ايطاليا سجلت رقم قياسي في عدد الحالات المسجله في يوم واحد ،5322 حاله في يوم واحد، النظام الصحي بتاعهم مخنوق حرفياً وفيه كارثه صحيه حاصله عندهم ومخصصين 25مليار دولار للأزمه... هل لو وصلنا احنا كمصريين للمستوي هنقدر نسيطر علي الأزمه..

حكومتنا بدأت تستوعب الوضع وأتخذت اجراءات صارمه والمشاهير بتتبرع للمستشفيات وفيه حملات توعيه كتير بدأت

تنزل وتوعي الناس وبتمني نفضل خايفين علي بعض كده ديماً

العالم كُله بيدعي ان ربنا يصرف البلاء عننا لأن الموضوع بقا فوق قُدراتنا كبشر سواء مصريين او اي جنسيه، دول كتسر عندها تكنولوجيا وابحاث واقفه عاجزاه قُدام الڤيروس ومتكتفه... بتمني من ربنا اننا نعدي الأزمه دي علي خير قبل وصول رمضان لأن هتكون الخساره الحقيقيه لو معشناش رمضان واجواءه وخشوعه زي كُل سنه.. في النهايه ' أن صبرتم أجِرتم وأمر الله نافذ وان ضجرتم كفرتم وامر الله نافذ'

... فاللهُم ارفع البلاء عنا اللهم اذهب هذا البلاء عنا عاجلاَ غير اجل