القرار
تفاصيل العمل
أنفاس✍️نجوى عبدالرحمن
____
القرار
_____
متى اتخذت قرارك أول مرة؟
القرار الذي اتخذته... هل أنجزته؟
القرارات في الحياة كثيرة، فهل وقفت عندها أم تجاوزتها؟
بيننا وبين الحياة مشاوير من القرارات.
هل تمكنت من الوقوف مع نفسك؟
أم أن الخذلان أوقفك؟
وهل هزمك الثبات على قرارك؟
أنت، في بعض الأحيان، تقف بين الخيارات محتارًا:
أيُّها يناسبني؟
هذا أم هذا؟ أم أن هذا لا يجوز أصلًا؟
التردد في الاختيار، ولو كان بسيطًا، يكشف حقيقتك أمام نفسك.
وأسوأ شيء، عندما يعرف غيرك أنك لا تملك قرارًا، أو أن قرارك ليس بيدك.
أنفاس اليوم واقفة أمام باب «القرار».
تسألك، وتذكّرك، وتحركك... أو حتى تدفعك.
المهم أن تعرف كيف تقرر.
من أول يوم في حياتك، إلى أهم قرار فيها، اتخذه بسلاسة.
---
خليك عارف
إن القرار ما شجاعة ساي، القرار ليهو طرق.
جرّب البتحس إنو أدّاك راحة بال وطمأنينة قلب.
5 طرق تاخد بيها قرار وما تندم:
1. الورقة والقلم:
خليك صادق مع الحقائق.
قسّم الورقة نصفين: خسارة | مكسب.
لما القرار يحتار بين شغل، أو سفر، أو زول.
المخ بكذب عشان يريحك، لكن الورقة ما بتجامل.
هنا قرارك هو البيتكلم.
---
2. العشرة سنين:
لو قرارك مصيري: زواج، هجرة، أو استقالة، بنصحك تتصور نفسك بعد عشر سنين.
حتكون متصالح معاه؟
حاسي نفسك راضي؟
لما تشوف الصورة الكبيرة، رهبة اللحظة بتفوت، والقرار بيثبت نفسه.
---
3. القلب والعقل (70/30):
70% منطق وعقل: قروش، زمن، ونتيجة.
30% قلب: مرتاح للقرار؟
حتنوم كيف بعده؟
ضميرك مرتاح؟
لو عقلك بقول: "نعم"، وقلبك بقول: "لا"...
القرار المبني على 100% عقل ببقى جاف، و100% قلب ببقى تهور.
الأصل هو الثبات على العقل.
---
4. نصيحة الصديق | اختبار المسافة
لما تكون متلخبط شديد، ومشاعرك مغطية على عينك،
اتخيل صديق جاك بنفس مشكلتك. نصيحتك حتكون شنو؟
لأننا بنكون حكماء شديد مع غيرنا، وقاسين على نفسنا.
ابعد شوية، وشوف رأيك حيكون شنو. كدا بتكون لقيت قرارك.
---
5. تجربة الـ24 ساعة | باب مفتوح نص فتحة
لما الضغط عليك يكون عالي، ويقولوا ليك: "قرر هسي."
ما تقول: "أيوه" نهائي. قول: "بديك رد بعد يوم." ونوم عليها، عقلك بروق.
أول رد فعل بكون خوف، وتاني يوم بكون إنت الحقيقي.
وقرارك بطلع بثبات ورواق، زي حالتك بعد النوم بالضبط.
---
دي طرق بسيطة، ابدأ بيها اليوم وشوف الفرق.
وخلي أول قرار ليك إنك تطبق الطريقة الاخترت تجربها.
في الختام... واجب السلام.
——————