شعر عامية مصرية

عيش حياتك واقعي

وانزع نفسك من المحال

الدنيا عايزه الألمعي

مش شخص عايش إرتجال

الخوف بيقتل كل حي

والوهم بيكسّر قلوع

خليك مفتّح للي جاي

إياك تسلِّم للرجوع

شغّل دماغك ف السكك

وافرز حبايبك والعدا

الناس معادن تتسِبِك

تبان أصالتها ع المدى

البحر عايز قلب حُر

عارف طريق الشط فين

واللي شارب كاسات المُر

عايش حياته مستكين

اعجن سنينك بالحساب

واخبز رغيفك بالعرق

أصنع أحلامك ع التراب

مش بس تخطيط ع الورق

ده الدنيا مصفى للرجال

بِتفرز الغث من الثمين

خَلِّيك إجابة مش سؤال

مرسى في بحر السائلين

سليم علي