اتمام كورس سلسلة التسويق: أساسيات التسعير د.ايهاب مسلم

خلال الكورس اتعلمت إن التسعير مش مجرد رقم بنحطه على المنتج، لكنه قرار مهم جدًا وبيأثر بشكل مباشر على إيرادات وأرباح الشركة.

لأن ببساطة السعر هو المصدر الأساسي للدخل، وأي غلطة فيه ممكن تكلف الشركة كتير؛ يا إما نبيع بسعر قليل ونخسر في كل بيعة، أو نغلي السعر فتقل المبيعات.

كمان فهمت إن في استراتيجيات مختلفة للتسعير، وكل واحدة ليها وقتها وظروفها.

زي مثلًا إننا نبدأ بسعر عالي لو المنتج مميز أو جديد في السوق (قشط السوق)، أو نقلل السعر عشان ندخل السوق ونكسب عملاء أكتر (اختراق السوق).

وفي حالات تانية بنركز على تحقيق أعلى ربح ممكن، أو حتى نقبل بخسارة مؤقتة عشان نفضل موجودين في السوق.

واتضحلي إن العرض والطلب ليهم دور كبير جدًا في تحديد السعر، وإن لازم نكون فاهمين تكاليفنا كويس سواء ثابتة أو متغيرة، وكمان نحسب نقطة التعادل عشان نعرف إحنا واقفين فين.

ومن أهم الحاجات اللي لفتت نظري هو الجانب النفسي في التسعير، لأن العميل مش بيشتري بعقلانية كاملة، لكنه بيقارن السعر اللي قدامه بسعر تاني في دماغه. وده بيخلي طرق زي التسعير بـ 39 بدل 40 أو مقارنة الأحجام والأسعار تأثر جدًا على قراره.

وفي النهاية، فهمت إن المنافسة في السوق بتفرض علينا نكون أذكى في التسعير، وإن مش كل العملاء مناسبين لينا من الأساس.

وكمان إن قوة البراند ممكن تقلل حساسية العميل للسعر.

باختصار، التسعير الصح هو اللي بيحقق توازن بين إن العميل يحس بقيمة المنتج، وفي نفس الوقت الشركة تحقق ربح وتكمل في السوق.