فيديو تسويق عقاري

في فيديو ده اشتغلت على محتوى تسويق عقاري، و البرنامج الي استعملته كان Davinci Resolve, وكان قائم بشكل أساسي على إن البنت الي بتتكلم وأنا بترجم كلامها بصريًا عشان أوصل المعلومة بشكل أبسط وأوضح. الفيديو كان عن مشروع “مستقبل سيتي”، فكنت حريص إني أدعم كلامها بكل حاجة تخلي المشاهد يفهم بسرعة من غير تعقيد. مثلًا لما اتكلمت عن المستثمرين في المشروع، جبت اللوجوهات الخاصة بيهم ورتبتها بشكل نظيف ومتناسق على الشاشة بحيث تبان بشكل احترافي ومش مزعج.

ولما بدأت توصف شكل المشروع، استخدمت فيديوهات 3D توضح الفكرة بشكل بسيط بدل ما أعرض مخططات هندسية ممكن تكون معقدة على المشاهد العادي، فده خلّى الصورة أوضح وأسهل في الاستيعاب. كمان استخدمت فيديو إضافي يوضح موقع المشروع، وشلت الأصوات الأصلية بتاعته عشان يفضل التركيز على صوت العميلة بس، ويبقى الفيديو عنصر بصري داعم مش مشتت.

وفي النهاية، ركزت على إن المعلومات المهمة زي الأسعار والتفاصيل تتعرض بشكل واضح عن طريق تكست متحرك وكي فريمز متظبطة، بحيث المشاهد يقدر يلقط المعلومة بسرعة حتى لو مش مركز في الكلام. الفكرة كلها كانت إني أحول الكلام لتجربة بصرية بسيطة وسلسة تخلي أي حد يفهم المشروع بسهولة ومن غير ما يحس إنه بيتفرج على حاجة معقدة.