حقي مش متاح

نص وجداني يكشف شعور الاكتشاف بعد الإهمال، وكيف يدرك الإنسان قيمة نفسه عندما يكتشف أنه مش من أولويات الآخر. قصة عن الوعي والكرامة والتمسك بحقوقك البسيطة.

النص :

أنا عرفت إنك مضغوط معايا أنا،

بس مع غيري لا.

وعرفت إنك مشغول معايا أنا،

بس مع غيري لا.

عرفت إنّي مش أمانك

زي ما كنت بتقولي،

ومش من اهتماماتك

زي ما كتبتلي.

عرفت إن يومك هيعدّي عادي

حتى من غير ما تفتكرني،

وإن غيابي أو وجودي

مش فارق زي ما كنت موهّمني.

عرفت كمان إنك مش واخد بالك

إن أبسط حقوقي

اعتذار…

أو حتى محاولة تبرير

مش متاحة ليا.

عرفت إنّي مش من أولوياتك،

وإن وجودي من عدمه واحد.

عرفت كل ده،

ولسه بكتشف فيك جديد.

واللي ما اختارنيش،

مش دوري ألحقه.