قصه دينيه العزير

السلام عليكم

عايزه احكيلكم النهارده قصه العزير

قصه العزير زي ما جت في القران الكريم

ان العزير كان رجل صالح من بني اسرايل

كان يوم راكب حماره ومعاه اكله كان رايح مكان معين

وفي طريقه شاف قريه بس مدمره جدا

قال في نفسه ممكن ربنا يرجع الارض دي زي ما كانت هو مش بيسال علشان شاكك هو بيسال علشان عايز يعرف الكيفيه وانه مش متصور ان الارض الخراب دي ترجع تاني كمل طريقه

وقف علشان يستريح شويه وياكل وينام شويه علشان يقدر يكمل

بس النومه كانت طويله نام ميه سنه

طبعا الدنيا اتغيرت في الوقت ده بني اسرايل نسيو التوراه وحرفوا فيها وبعدوا عن الدين

صحي العزير بعد نومته الطويله ربنا بعتله ملاك علي شكل بشر ساله انت نمت قد ايه قاله يوم او يوم وشويه قاله انتي نمت ميه سنه

اتصدم العزير لانه مش حاسس ان حاجه فيه اتغيرت وكمل الملاك كلامه ان اكله زي ما هو ماتغيرش بس الحمار مات وبقي هيكل عظمي وربنا رد الحياه للحمار تاني قدام العزير هنا لقي العزير رد علي سواله

اللي ساله من ميه سنه

ان ربنا سبحانه وتعالي قادر يرد الحياه للحمار اللي مات وبقي هيكل عطمي وفي نفس الوقت الاكل زي ما هو ربنا حفظه والعزير نفسه نام ميه سنه ومكبرش في السن

رجع العزير لقومه سالهم عن العزير قالوا مات من ميه سنه قالهم انا العزير مصدقوش الا اما جات ست كبيره اوي كانت عارفه العزير قالتلهم انه هو

بعد كده بقي يعلمهم التوراه اللي نسيوها ويصلحلهم دينهم

اتعلموا وحبوا العزير جدا لغايه ما قالوا عليه ابن الله

مفيش فايده في بني اسرايل

الحكمه من القصه

ربنا قادر علي كل شي

ربنا قادر يغير حياتنا مهما كانت صعبه في غمضه عين احنا بس نسلم امورنا لله وندعي كتير واللي صحي عزير بعد ميه سنه قادر يصلح امورنا❤