قصه المرايه المسحوره

المرايه المسحوره

احب اعرفكم بنفسي اسمي امينه عمري 20 والصراحه انا مش امينه خالص لاني بشتغل حراميه اتصدمتوا لسه هتتصدموا كمان

حكايتي بتتلخص في سطرين بنت صغيره اهلها سابوها قدام دار للايتام شفت كل الوان العذاب في الدار لغايه ما هربت اتعرفت علي اطفال بيشحتوا في الاشاره عرفوني علي المعلم بتاعهم المعلم غندور لاقني بنت حركه علمني النشل وبعدين اتفوقت علي نفسي وبقيت محترفه في كل انواع السرقه لغايه ما خلاني دراعه اليمين كل يوم وانا خارجه للشغل

كنت بشوف البنات اللي في سني وهما رايحين الجامعه بتحسر علي نفسي كنت اتمني اكون زيهم عندي عيله وبتعلم كنت بتمني ان حياتي تتغير بس ازاي المعلم غندور مش هيسبني انا الفرخه اللي بتبيض دهب

في يوم الدنيا مطرت دعيت كتير بس ربنا هيستجيب لحراميه مش عارفه

في يوم المعلم غندور قالي علي عمليه جديده هنسرق

قصر الدرملي باشا قصر في حته مطرفه بس مليان خيرات

ورث الدرملي باشا عن جده

عرفنا ان الدرملي عامل حفله علشان ابنه نجح وجاي من بلاد بره

اتنكرنا وعملنا فيها ولاد ناس ودخلنا حطيت منوم في العصير كل الحفله شربت منه وراحوا في سابع نومه

سرقنا القصر ودخلت اوضه الدرملي علشان اسرق مجوهرات مراته لفت نظري المرايه اللي محطوطه في اوضه النوم مرايه مش لايقه علي باقي الاوضه عليها نقوش دهبي من الجوانب مكتوب عليها كلام مش فاهماه بس عجبني شكلها قلت اخدها خدنا كل حاجه وخرجنا

اما روحنا قعدنا نوزع الغنيمه خدت المرايه من نصيي

دخلتها في اوضتي هي مش اوضه اوي احنا كلنا قاعدين في بدروم بس انا كنت مميزه بالنسبه للمعلم علشان كده اداني حته خصوصي وحط عليها ستاره مع ان احنا بنكسب كتير بس مينفعش يبان عليا لنتهرش من الحكومه

حطيت المرايه في اوضتي كان شكلها حلو قعدت ادمها اسرح شعري

لقيت الساعه اول ما دقت 12 الكتابه اللي حولين المرايه نورت وصورتي اتغيرت بقيت انا بس وحشه اوي معنديش شعر تحت عنيا اسود بشكل مخيف منخيري كبرت بقي لابسه فستان كله بقع سوده. اغمي عليا من الصدمه ووقعت علي الارض صحيت الصبح خايفه ابص في المرايه بصيت بسرعه لقتني زي مانا

قلت جايز اكون بحلم ولا حاجه اليوم عدي عادي وجه اليل

وعند الساعه 12 لقيت المرايه خرج منها نفس النور والصوره اتبدلت بس المره دي الصور بتتحرك مكنتش انا كانت بنت صغيره ماشيه زي شارع وجت عربيه خبطتها والصوره راحت وجت صورتي بس وحشه بردو اغمي عليا بردو

صحيت بس المره دي عارفه انه مش حلم

المعلم بعتني اجيب حاجه وانا ماشيه لقيت حاجه خلتني اقف مكاني البنت الصغيره اللي شفتها في المرايه بتعدي الطريق عربيه جايه بسرعه هتخبطها جريت بسرعه شدتها انا وهي وقعنا علي الارض اتعورت في دراعي بس انقذتها البنت شكرتني ومشيت

رجعت عدي اليوم الساعه 12 جت بس المره دي كنت متحمسه اشوف المرايه هتظهر ايه

شوف نفسي وحشه بردو بس البقع اللي في الفستان قلت بقعه وشكلي اتحسن شويه صغيرين

اتغير المشهد لقيت ست عجوزه ماشيه وشاب معاها بيضربها

لغايه ما وقعت وقطعت النفس

تاني يوم لقيت نفس المشهد في الشارع دافعت عنها واتخنقت مع الشاب اللي ظهر انه ابنها للاسف خدتها دار مسنين ودفعتلها فلوس

الساعه 12 ظهرت شكلي بقي احسن شويه والبقع قلت بقعه

بقيت استني الساعه 12 اشوف المرايه هتقولي ايه قعدنا علي الحال لمده شهر المرايه تقول وانا انفذ بعدين في يوم المشهد اللي ظهر في المرايه كان البدروم اللي عايشين فيه

الحكومه كبست وقبضت علينا شوفت الساعه كانت 5

جه الصبح وانا عارفه انا هعمل ايه خدت المرايه وحاجاتي كلها وهربت قبل الحكومه ماتيجي علشان ابدا بدايه جديده

مع مرايتي