Ma3lesh – Visual Identity Design

"معلش" هو مشروع هوية بصرية لمحل عصائر شبابي. اعتمدت في تصميم الهوية على المزج بين الروح المرحة المصرية والطابع العصري البسيط، عشان البراند يبان قريب من الناس ويفضل عالق في الذهن. قبل ما أبدأ التصميم، ركزت على دراسة:

الجمهور المستهدف: شباب وأسر بيدوروا على تجربة خفيفة الدم، منعشة وسريعة.

الأسلوب البصري المناسب: ألوان فريش مستوحاة من العصائر والفواكه (برتقالي، أصفر، فوشيا، أخضر) عشان تعكس الانتعاش والمرح.

اللغة البصرية: خطوط سهلة القراءة، مرحة، وشكل شعار بسيط بس فيه شخصية.

التطبيقات العملية: فكرت إزاي الهوية هتظهر على الكوبايات، الأكياس، المنيو، واليافطة، عشان تبقى متكاملة وواقعية.

التوازن بين المرح والوضوح: الهدف كان خلق شكل روش وضاحك لكن في نفس الوقت سهل التذكر ويشتغل على أي منصة (ديجيتال أو مطبوع).

النتيجة: براند عنده شخصية، قريب من الناس، وبيعكس الطاقة الإيجابية اللي "معلش" عايز يوصلها من أول رشفة عصير.

"في اختيار التاجلاين ركزت إني ألاقي جملة قصيرة، خفيفة، وسهلة التذكر تعبر عن شخصية البراند. اخترت "الجو هنا فريش" لأنها باللهجة المصرية البسيطة، قريبة من الناس وسهلة النطق، وفي نفس الوقت بتعكس إحساس الانتعاش والمرح اللي البراند عايز يوصله. التاجلاين مبني على فكرة إن تجربة العصير مش مجرد طعم، لكن كمان أجواء مليانة طاقة وضحك وحيوية، وده بالضبط اللي بيميز "معلش"."