مقاله عن الغذاء

هل تقدر تعيش يوم من غير ما تاكل؟

هل تقدر تكمل حياتك من غير غذاء؟! أكيد لأ.

الغذاء شيء أساسي لا غنى عنه، ومفيش حياة من غيره.

بس أنا النهارده مش جاي أقولك "كُل" — لأنك أكيد بتاكل — لكن جاي أخدك في رحلة أعمق من كده، رحلة هتخليك تبص للأكل اللي بتاكله بنظرة مختلفة تمامًا!

إحنا للأسف شعب أكيل، بس مش دايمًا مدرك بنأكل إزاي، ولا إيه اللي المفروض نأكله. بنهتم بالكم مش الكيف، بنأكل أي حاجة وخلاص.

وعلشان كده، لازم نكسر النمط ده ونبدأ نفهم أكتر عن "الغذاء"، عن إبداع ربنا في خلقه، وازاي ممكن الغذاء يكون سبب في صحتنا… أو مرضنا.

سؤال بسيط:

هل في حد يحب يجي له مرض؟ أكيد لأ.

طيب تعرف إن معظم الأمراض في الدنيا سببها الأساسي هو "سوء التغذية" أو "عدم الاهتمام بالأكل الصح"؟!

يعني في حاجة قدامي ممكن تحميني من أمراض كتير… وأسيبها؟!

? عزيزي القارئ

رحلة الغذاء مش مجرد أكل، دي "علم"، والعلم ده لازم كل أم، وكل ست بيت، وكل شاب أو شخص حابب يحافظ على صحته أو صحة أسرته، يكون عنده وعي بيه.

قال رسول الله ﷺ:

"وإن لبدنك عليك حقًا"

إيه هي التغذية؟

التغذية علم مهم بيمس حياة كل فرد، وليه تأثير مباشر على صحة الإنسان وقدرته على الإنتاج والعمل.

ومن زمان، الإنسان بدأ يربط بين التغذية والصحة، ومع الوقت قدر العلماء يحللوا الأطعمة، ويعرفوا مكوناتها، وتأثيرها، ودورها في الجسم.

وكمان عرفوا إنها بتتأثر بطرق الطهي والتخزين، وبدأت دراسات علمية تدرس أعضاء الجسم واحتياجاتها من الغذاء… ومن هنا اتولد علم التغذية.

التغذية بتتأثر بإيه؟

التغذية بتتأثر بالنواحي الاجتماعية والمعتقدات والعادات اللي بينشأ فيها الفرد.

العادات الغذائية اللي بنكتسبها من وإحنا صغيرين بيكون صعب نغيرها لما نكبر، وعلشان كده لازم نبدأ من بدري في بناء وعي غذائي سليم.

أهمية التغذية:

⬅️ بتحافظ على الصحة.

⬅️ بتزود القدرة على العمل والإنتاج.

⬅️ بتحمي الجسم من الأمراض.

⬅️ بتساعد على النمو وبناء الأنسجة وتجديد التالف منها.

تعريف الغذاء:

هو أي مادة صلبة أو سائلة ممكن الجسم يمتصها ويستفيد منها في:

⬅️ توليد الطاقة والحرارة

⬅️ النمو وبناء الأنسجة

⬅️ تعويض التالف من الجسم

⬅️ الوقاية من الأمراض

? تقسيم الأغذية:

1️⃣ أغذية الطاقة والحرارة:

بتكون غنية بالكربوهيدرات والدهون

أمثلة:

زبدة – قشدة – زيت – عسل – مربى – بطاطس – أرز – خبز – سكر – حبوب

2️⃣ أغذية البناء:

غنية بالبروتينات والأملاح المعدنية

أمثلة:

اللحوم – السمك – البيض – اللبن – الجبن – البقول

3️⃣ أغذية الوقاية:

غنية بالفيتامينات

أمثلة:

الطماطم – الموالح – الجزر – الكرنب – البقدونس – الخس – الفلفل الأخضر – الفواكه – الخضروات الورقية

️ مهم تعرف:

معظم الأطعمة مش بتحتوي على نوع واحد بس من العناصر الغذائية، لكن على أكثر من نوع.

وأهمية الأكل مش بس في تنوع العناصر، لكن كمان في "الكمية اللي بنستهلكها".

الطاقة والاحتراق داخل الجسم:

كل طعام بيدخل الجسم ممكن يتحول لطاقة.

مش كل المواد الغذائية مسؤولة عن الطاقة، لكن أغناها في إنتاجها هي:

⬅️ الدهون

⬅️ الكربوهيدرات (السكريات والنشويات)

الجسم بيحرق الأكل جوا بطريقة بطيئة جدًا وفي درجة حرارة منخفضة، وده بيتم لما يتحد الأكل مع الأكسجين اللي بناخده عن طريق التنفس.

وبيطلع من الاحتراق ده طاقة وحرارة بتخلي الإنسان يقدر يتحرك ويشتغل ويحافظ على درجة حرارة جسمه.

الحرارة الناتجة عن حرق الطعام بتتقاس بوحدة اسمها: "السعر الحراري"

هل الجسم يحتاج طاقة حتى في الراحة؟

أكيد، لأن فيه عمليات بتفضل شغالة باستمرار زي:

⬅️ التنفس

⬅️ حركة القلب

⬅️ تنظيم حرارة الجسم

وفي مقالات جاية، هاخدك في رحلات أعمق عن كل مكون من مكونات الغذاء

والبداية هتكون مع أول عنصر مهم جدًا: "الكربوهيدرات"

لو المقال عجبك، شاركه مع أي حد يهمه يحافظ على صحته ويبدأ يعرف يعني إيه "ياكل صح"