التهاب ونزيف اللثة

فى رعاية صحة الأسنان?

السلام عليكم ورحمة الله وبركاته

هتكلم معاكوا شوية عن إلتهاب ونزيف اللثة اللى كتير مننا بيعاني منه. كتير لما بنغسل أسنانا بنتلاقى فى دم كتير. وفى ناس بيلاقوا دم مع الأكل أو غيره وده بيكون سببه إلتهاب اللثة.

◀️ طب أى هى أسبابه؟؟

- أول وأهم سبب هو عدم نظافة الأسنان عشان ده بيعمل على تجميع بواقى الاكل وتكوين طبقه جير ع الاسنان الطبقه دى بتبقى مليانه بكتريا. البكتريا دى بتفرز سموم تدخل ف الجيوب اللثويه فتعمل الالتهاب ده.

-تغير الهرمونات بيعمل برضو التهاب لثه زى مثلا الست الحامل والشباب ف مرحلة البلوغ.

-التدخين بكمية كبيرة بيعمل إلتهاب لثوى لأنه بيقلل كمية الأجسام المضادة فيها فبالتالي بتكون ضعيفه وسهل يحصل النزيف.

-نقص فيتامين سى لأنه مهم ف تكوين النسيج اللثوى.

-الحشوات والتركيبات والتقويم لأنها بتحتاج عناية اكتر بالأسنان عشان ف اماكن بيتجمع فيها الأكل صعب ننضفها بالفرشه.

-مريض السكر برضو لذلك بيحتاج عناية اكتر بأسنانه .

-بعض الأدوية برضو بتعمل التهاب لثوى زى مثلا ال nifedipine وده دوا بنستخدمه لعلاج الضغط وبرضو phenytoin وده بنستخدمه مع حالات الصرع وبرضو ال Cyclosporine وده دوا بيهبط المناعه بستخدمه ف حالات زراعه اى عضو ف جسم الإنسان.

-الشخص اللى بيتنفس من بوقه ممكن يبقى عنده التهاب لثوى.

◀️ الأعراض بتاعته وامتى أقول ان عندى إلتهاب لثة؟؟

أولاً نزيف اللثة+ ألم ورائحة فم كريهة+ تورم فى اللثة فالمظهر بيكون مش لطيف خالص+ وممكن كمان صعوبة فى الأكل لو فى نزيف مع الأكل.

◀️ طب العلاج بيكون أى؟

طبعاً العلاج بيتوقف على السبب. يعني لو سببه الجير يبقي الحل تنضيف الجير وده بيكون عند دكتور لان الفرشة مبتقدرش تنضفه. وطبعاً غسيل الأسنان بالطريقة الصحيحة وحط تحت صحيحة تلت خطوط كده زى ما وضحنا فى البوست السابق + برضو بنستخدم مغمضة زى orovex أو verolex مرتين فى اليوم لمدة أسبوعين مرة الصبح ومرة باليل قبل النوم. طبعاً بالإضافة لو حد عنده نقص فيتامين هياخد فيتامين سي وهكذا. ولو مريض سكر هيضبط السكر بتاعه ويهتم بنضافة أسنانه كويس وهكذا. لو واحدة حامل أو شاب فى مرحلة البلوغ لازم اهتمام زيادة بنضافة أسنانه.

يارب أكون قدرت اوصله بطريقة سهلة وبسيطة.

Enjoy your life ️?