العقل المُبرمج
تفاصيل العمل
"العقل المُبرمج"
------
أزاي بتتحَكم العلامات التُجارية الكبيرة في عقولنا من غير ما نحس؟
تخيل يا صديقي و أنت بتتمشي عادي في السوبر ماركت من غير أي نية، فجأة تلاقي نفسك بتحط في عربية التسوق مُنتجات مكنتش مخطط تشتريها،
أي الي بيخلينا نعمل كده؟.
1. أي هي قوة الألوان: و هل بتسوّق ليك العلامات التجارية نفسيًا؟
سنة ٢٠٠٦ بتنشر ساتيندرا سينغ مقالًا عن "تأثير اللون علي التسويق" "Impact the color marketing"، بتقول فيه (الألوان شائعة الاستخدام، وهي مصدرٌ للمعلومات، يتخذ الناس قراراتهم في غضون 90 ثانية من تفاعلهم الأول مع الأشخاص أو المنتجات، ويعتمد ما بين 62% و90% من التقييم على الألوان وحدها، لذا، فإن الاستخدام الحكيم للألوان لا يُسهم فقط في تمييز المنتجات عن المنافسين، بل يُسهم أيضًا في التأثير على الحالة المزاجية والمشاعر - إيجابًا أو سلبًا).
الألوان يا صديقي مش مجرد زينة و مش مجرد رمز لحاجات جميلة زي الأحمر للورد و الأزرق للسما، دي واحدة من أقوي أسلحة التسويق الألكتروني.
يعني عندك مثلًا معظم مطاعم الوجبات السريعة بتكون بالأحمر، لأن علميًا الأحمر بيزود الشهية، بيحفز الجهاز العصبي و بيزيد من عدلات ضربات القلب، فبيؤدي بالشعور بالجوع، و معظم المطاعم دي بتضيف الأصفر مع الأحمر، لأن الأصفر بيدي أحساس السعادة و التفاؤل و بيكون موجود بكمية أكبر في المنتجات المتعلقة بالأطفال زي lego أو johnson's baby ، فبيكون مزيج الأحمر للأثارة و الجوع و الأصفر للفرح، مع بعض بيخليك جعان و مبسوط.
و مثلًا الأخضر بيستخدم في المؤسسات الصحية عشان الأخضر بيهدي الأعصاب و بيحسسك بالراحة و الهدوء، زي Cigna و مستشفي الملك فيصل التخصصي، و الأسود في العلامات التجارية الفاخرة زي Rolex.
2. خدعة "التأثير الخفي": لما تكون العميل المثالي من غير وعي
"التسويق العصبي" يا صديقي، بيشير بشكل عام إلى قياس الإشارات الفسيولوجية والعصبية للتعرف على دوافع العملاء وتفضيلاتهم وقراراتهم، والتي يمكن أن تساعد في الإبلاغ عن الإعلانات الإبداعية وتطوير المنتجات والتسعير ومجالات التسويق الأخرى.
الشركات العملاقة بتستخدم تقنيات زي "التسويق العصبي" عشان تفهم أزاي بيتفاعل دماغك مع الإعلانات.
زي مثلًا في مره، في السبعينات عملت شركة بيبسي تجربة تسويقية أسمها "The Pepsi Challenge" – تحدي بيبسي، أدت المشاركين أختبار تذوق أعمي (Blind taste test)، بحيث يدوقو مشروبين غازيين (بيبسي و كوكاكولا) من غير ما يعرفو.
نتائج التجربة:
معظم الأشخاص فضلوا طعم بيبسي على كوكاكولا، لأن بيبسي أكثر حلاوة وليها طعم أقوى في أول رشفة، لكن رغم النتيجة، استمرت كوكاكولا في الهيمنة على السوق، مما أثبت أن العوامل النفسية والعاطفية المرتبطة بالعلامة التجارية لها تأثير أقوى من المذاق نفسه!
ليه بقي؟ في دراسة علمية سنة ٢٠٠٤، أجرى عالم الأعصاب Samuel McClure وزملاؤه دراسة باستخدام التصوير بالرنين المغناطيسي الوظيفي (fMRI) عشان يعرفو إزاي بيتفاعل دماغ الأشخاص مع العلامتين التجاريتين،
لما شربو البيبسي من غير ما يعرفو: أتنشطت مناطق في الدماغ مرتبطة بالمكافأة والاستمتاع الحسي.
و لكن لما شربو الكوكاكولا من غير ما يعرفو برضو: تنشطت مناطق في الدماغ مرتبطة بالذاكرة والعاطفة، مما يوضح أن العلامة التجارية لكوكاكولا ليها تأثير نفسي قوي على تجربة المستهلكين.
النتيجة هو أن الناس مش بس بيشتروا المنتجات بسبب الطعم، لكن العلامة التجارية ليها تأثير عاطفي عميق على قرارات الشراء، وده سر نجاح كوكاكولا المستمر رغم تفوق بيبسي في اختبار التذوق الأعمى!
3. استراتيجيات التلاعب بالأسعار: "أفضل صفقة"؟
ليه بنلاقي سعر المنتج 99.99 بدلاً من 100 بنشتريه من غير تفكير؟ لأن عقلك بيقرأ الرقم الأول بس، فبيحس أن المنتج أرخص، حتى أمازون ونتفليكس بيستخدمو الحيلة دي لما بيعرضو لك الخطة المتوسطة كخيار "موصى به"، فتحس أن الأرخص أقل قيمة، فتدفع أكتر من غير وعي!
4. المؤثرون- Influencers
المؤثرين لما بيوصو بالمنتج مش بيكون عشان خاطر مصلحتك، و مش عشان هما بيحبوها؟ الحقيقة أن العلامات التُجارية دي بتدفع لهم ملايين الدولارات لتوجيه قراراتك، حتى التوصيات العفوية ممكن تكون جزءًا من خطة تسويقية مدروسة بدقة عشان تخليك تثق في المنتج وتشتريه من غير اي تردد.
أزاي تحمي نفسك؟
خلي عندك وعي، قبل ما تشتري أسأل نفسك، هو أنا محتاج ده ولا أنا مغيب؟.
و دايمًا يا صديقي أسأل نفسك، هل أنا مستفيد؟، خليك دايمًا مهتم بالجَودة مش بالكمية.
في الختام
أسمحلي أعترفلك أن كل حاجة أحنا نقدر نمشيها بأيدينا صح لو كنا واعيين بيها صح، متخليش الحاجة هي الي تمشيك، أنت الي أتحكم بالحاجة و أستخدمها عشان تفيدك، و السلام عليكم.
بقلم: نور أشرف محمد السيد
---
المصادر: