مشهد من قصة قصيرة
تفاصيل العمل
«ما هو بص بقى، محمود وقُلنا معلش كلها أسامي ربنا..
عصاية ولابسلي نضارة قد وشك وقُلت خلقة ربنا ومفيش انسان مش حلو!
كتب كتاب مع الفرح وكبرت عقلي وقُلت يا بت أنتِ في مجتمع شرقي ميصحش!
يومين عسل في معابد عفى عليها الزمن، وخمس أيام بين أربع حيطان، وقُلت معلش شجعي سياحة بلدك..
رخامة وبرود وقلة اهتمام وقُلت نصيبك واستعوضت ربنا واللهم لا اعتراض!
لكن تيجي دلوقتي تبص للفسيخ بقرف وتقولي يع ومش باكله، وتعملي نفسك جاي من أمريكا لا سوري، لهنا وكفاية بقى!
فوق لنفسك يا محمود ناصر حسين، أنت مدرس لغة عربية، يعني من عامة الشعب، تاكل أكل الشعب وتخرج خروجات الشعب..
لكن عايزنا نقلبها بقى وتبقى زي أبطال الروايات اشطا، بس هيبقى في كله مش الفسيخ بس!»
هتفت آخر كلماتها بتهديد، وهي تشير بالسكينة اتجاه صدره..
وهو أمامها مذهولاً.. مصدوماً، غير قادر على اتخاذ أي رد فعل!
لقد تعدى جنونها كل حدود المعقول، ووجودها بات يُشكّل خطراً على حياته!
«قُلت إيه؟»
صاحت وهي تُقرّب السكين من صدره.
«استهدي بالله بس يا شيماء وابعدي السكينة دي»
هتف وهو يحاول سحب السكين منها.
تصرخ مثيرة فزعه: «متقوليش يا شيماااء!»
«أومال أقولك إيه بس يا مجنونة؟»
سألها بفزع، يفكر بسرعة في طريقة للسيطرة على جنونها!
أشارت بالسكين إلى المائدة، تأمره: «روح اقعد هناك»
وأمام حالتها الغريبة لم يستطع إلا الامتثال لأمرها!
جلس على المائدة، تجلس الشيماء بجانبه، تشير إلى الفسيخ بالسكين، وهي تقول:
«يا نكمل زي ماحنا وتاكل الفسيخ..
يا تعلن نيّتك في التغيير»