هل مات سيدنا يونس بالفعل وهو طفل؟!

يا تري في نبي تم نسبه إلي أمه غير المسيح( عيسي بن مريم)!؟

وهل تعرف نبي أخر أحيا الموتي غير المسيح!ٍ؟

بصراحة الموضوعين دول شائكين أوي وكلهم ألغام, فأحنا نحاول نمشي فيهم واحدة واحدة كده, ونركز مع بعض.

النبي اللي أتنسب لأمه (حسب تفسير أبن اثير وطبقا للتوراة) هو سيدنا يونس أو ذو النون ( النون دي يعني الحوت, وذو النون يعني صاحب الحوت) وده أسمه اللي ذُكر في القرأن. أو يونان كما ذُكر أسمه في الأنجيل والتوراة.

يونس بن متي ( يونان بن أمتاي ) , (متي) ده مش أسم أبوه , لأ. ده أسم أمه.

سيدنا يونس حياته مليانة غرائب ومعجزات, وحصل له اللي ما حصلش لنبي قبله ولا بعده.

كان عايش فين سيدنا يونس وليه أتنسب لأمه........!!! ؟

سيدنا يونس كان من سبط بنيامين أخو سيدنا يوسف ,و كان عايش في مملكة أسرائيل الشمالية ( يعني تقريبا في لبنان حاليا)

ويُحكي أن والده توفي قبل ولادته أو بعدها بقليل, وامه سابت المكان اللي كانوا عايشين فيه وأنتقلت لمكان تاني محدش كان يعرفهم فيه, وعشان الناس في المكان الجديد مشفوش أبوه وميعرفوش غير أمه , فكانوا بينادوه بأسمها ( يونس بن متي) . والله أعلم

هقول لكم الأول علي المعجزة الكبري في حياته,و اللي ما حصلتش غير لعدد قليل جدا من البشرمنذ خلق الله أدم وحتي الأن.

سيدنا يونس مات وهو طفل صغير...............

أيوه زي ما أنت قريت بالظبط, (مات) توفي يعني عشان لو لسه مش مصدق.

لكن بعد ما مات أيه اللي حصل.......!؟

هنا بقي هيجي دور النبي اللي أحيا الموتي......... مين هو النبي ده............!؟

النبي ده له أسماء كتيرة وكلنا عارفينها, اسمه ( أيليا ) بالعبرانية ومعناها ( الله ألهي) بالعربية. واسمه بالرومانية ( ألياس) وده الأسم اللي ذُكر به في القرأن, ويبقي الأسم الأخير وهو( أل ياسين)

ومذكور في تفسير التوراة بأن يونان هو الطفل الصغير أبن الأرملة والذي تم أعادته للحياة من خلال أيليا النبي.

ويمكن عشان كده الناس كانت بتعتبر سيدنا يونس رجل بتاع ربنا من صغره, وهو حتي قبل ما يُبعث نبي كان دايما بيحاول ينصح الناس ويهديهم,ومع ذلك الناس مكنتش بتسمع كلامه, فزهق منهم وسبهم ورحل.

نيجي بقي لأحد أغرب الحاجات اللي حصلت لسيدنا يونس ومحصلتش لنبي غيره.

أيه هي الحاجة دي.............!؟

سيدنا يونس هو النبي الوحيد اللي ربنا بعثه لناس تانية غير قومه اللي كان عايش وسطيهم.

لما سيدنا يونس رحل وساب قومه ووصل علي حدود العراق, ربنا بعثه لأهل ( نينوي) الموجودة علي نهر دجلة ( الأن موجودة في وسط مدينة الموصل العراقية) لأن الديانة الوثنية وعبادة الأصنام كانت أنتشرت بين أهل نينوي.

وقعد يدعوهم للتوحيد وعبادة أله واحد ومفيش حد منهم أستجاب خالص, فغضب منهم جدا, وعصي أمر ربنا وسبهم ومشي. وده برضوا من غرائب حياته لأن مفيش نبي غيره عمل كده.

(وَذَا النُّونِ إِذ ذَّهَبَ مُغَاضِبًا فَظَنَّ أَن لَّن نَّقْدِرَ عَلَيْهِ)

ومشي ناحية البحر وشاف سفينة رجعة لبلده, وكان أهل السفينة دول عارفينه وعارفين أنه رجل صالح فركبوه معاهم.

لكن لما السفينة بقت في وسط البحر, الجو قلب والرياح أشتدت والأمواج عليت, لحد أما السفينة قربت تغرق. فقالوا أكيد في حد فينا أرتكب معصية كبيرة وعشان كده ربنا بيعاقبنا, وطبعا عشان مفيش حد فيهم مكنش أرتكب ذنب أو أكثر قبل كده, قالوا أحنا نعمل قرعة بين ركاب السفينة, واللي هترسي عليه القرعة هو اللي هنرميه من السفينة , يمكن ربنا ينجينا.

وطريقة القرعة في وقتهم كانت أنهم بيجيبوا السهام اللي معاهم ويكتبوا علي كل سهم اسم ويحطوها في كيس السهام, وبعدين يسحبوا سهم منهم والأسم اللي مكتوب علي السهم هو اللي يترمي في البحر. وعملوا القرعة ثلاث مرات وكل مرة كان يطلع السهم اللي عليه أسم سيدنا يونس, فراحوا رمينه في البحر.

(وَإِنَّ يُونُسَ لَمِنَ الْمُرْسَلِينَ * إِذْ أَبَقَ إِلَى الْفُلْكِ الْمَشْحُونِ * فَسَاهَمَ فَكَانَ مِنْ الْمُدْحَضِينَ * )

وطبعا بعد كده الحوت بلعه أو التقمه.

تفتكروا ليه الحوت هو اللي ألتقمه ومش أي حيوان بحري تاني...............!؟

الحقيقة العلمية بتقول أن الحوت الأزرق ملوش أسنان , وبيبتلع طعامه بدون مضغ.

(فَالْتَقَمَهُ الْحُوتُ وَهُوَ مُلِيمٌ * فَلَوْلَا أَنَّهُ كَانَ مِنْ الْمُسَبِّحِينَ * لَلَبِثَ فِي بَطْنِهِ إِلَى يَوْمِ يُبْعَثُونَ * )

وفضل سيدنا يونس في بطن الحوت ثلاث أيام. ( عشان كده الأخوة المسيحيين عندهم حاجة أسمها صوم يونان وبيمتنعوا فيها عن الأكل لمدة 3 أيام)

ولما سيدنا يونس تاب وعرف غلطه ورجع لربنا , ربنا غفر له وتاب عليه .

(فَنَادَى فِي الظُّلُمَاتِ أَن لا إِلَهَ إِلَّا أَنتَ سُبْحَانَكَ إِنِّي كُنتُ مِنَ الظَّالِمِينَ * فَاسْتَجَبْنَا لَهُ وَنَجَّيْنَاهُ مِنَ الْغَمِّ وَكَذَلِكَ نُنجِي الْمُؤْمِنِينَ)

(فَاصْبِرْ لِحُكْمِ رَبِّكَ وَلَا تَكُنْ كَصَاحِبِ الْحُوتِ إِذْ نَادَى وَهُوَ مَكْظُومٌ * لَوْلَا أَنْ تَدَارَكَهُ نِعْمَةٌ مِنْ رَبِّهِ لَنُبِذَ بِالْعَرَاءِ وَهُوَ مَذْمُومٌ * فَاجْتَبَاهُ رَبُّهُ فَجَعَلَهُ مِنَ الصَّالِحِينَ )

أن الحوت يبلع بني ادم فده وارد. لكن أنه يقعد في جوف الحوت 3 أيام وبعد كده يخرج تاني هي دي المعجزة, واللي بتكمل غرائب ومعجزات حياة سيدنا يونس.

الحوت لفظ سيدنا يونس علي الشاطئ تحت شجرة يقطين ( قرع العسل). ودي معجزة برضوا أن في شجرة يقطين تنمو من العدم كده وعلي شاطئ البحر.

طيب ليه شجرة يقطين بالذات...........!؟

لأن شجرة اليقطين أوراقها عريضة وكثيفة ممكن تحجب أشعة الشمس, وطبعا جلد سيدنا يونس كان مهري من مياه البحر اللي قعد فيها ثلاث أيام, فلو كان تعرض لأشعة الشمس وقتها كان هيموت.

(فَنَبَذْنَاهُ بِالْعَرَاء وَهُوَ سَقِيمٌ *وَأَنبَتْنَا عَلَيْهِ شَجَرَةً مِّن يَقْطِينٍ *)

وقعد سيدنا يونس تحت الشجرة أسبوع كامل لحد أما أسترد صحته وبعد كده ربنا جفف الشجرة وخلاها تموت, بعد أما سيدنا يونس كان أرتبط بالشجرة وحبها. فزعل جدا عليها.

فربنا قال له, يعني أنت زعلان علي الشجرة , ومش عايزني أزعل علي المائة الف بني أدم أو يزيدون اللي موجودين في ( نينوي) واللي هيدخلوا النار لو أنت مرجعتش ليهم وهديتهم.

(وَأَرْسَلْنَاهُ إِلَى مِئَةِ أَلْفٍ أَوْ يَزِيدُونَ. فَآمَنُوا فَمَتَّعْنَاهُمْ إِلَى حِينٍ)

فرجع طبعا سيدنا يونس لأهل نينوي وكانت المفاجأة الأخيرة , انهم كلهم أمنوا و تابوا عن عبادة الأصنام .

(فَلَوْلَا كَانَتْ قَرْيَةٌ آمَنَتْ فَنَفَعَهَا إِيمَانُهَا إِلَّا قَوْمَ يُونُسَ لَمَّا آمَنُوا كَشَفْنَا عَنْهُمْ عَذَابَ الْخِزْيِ فِي الْحَيَاةِ الدُّنْيَا وَمَتَّعْناهُمْ إِلَىٰ حِينٍ)