بطاطا البطريق

بطاطا البطريق قصة قصيرة للاطفال تعلمهم مهنى مهم،

إلا وهو الا نتكلم أو نحكى أمام كل أحد بما يحدث فى محيط اسرتنا ..

بطاطا البطريق هى قصة من قصص اكتبها للاطفال ذات معنى ،تكوم بلغة بسيطة وقافية لسهولة حكيها للطفل

بطاطا البطريق

فى بحيرة التلج بيعيش طائر البطريق بيعوم ويبلبط فى الصيف

بيمشى فى مجموعات بطنه لونها ابيض وضهره اسود شكله كيوت ولطيف

من ضمن البطاريق كان فى بطريق صغير اسمه بطاطا

باباه ومامته بيصطادوله السمك من البحيرة طازة بطازة

بطاطا بيتكلم كتير وبيحكي كل الاسرار معندوش لا سر عادي ولا سر خطير

وبابا وماما اكتر من مرة حذروه بلاش يا بطاطا تحكي حاجة للغير

بطاطا بيوعدهم ويقولهم حاضر واول ما يشوف حد يقعد يحكيله ويقوله عارف حصل ايه ؟

بابا وماما بيتضايقوا ويقولوله فين اتفاقنا انت وعدتنا وعدك مش بتنفذوا ليه ؟

بطاطا بيتأثر شوية ويقول اسف لكنه بردوا مكمل يحكي كل الاسرار

من غير ما يستأذن بابا وماما ومباقوش قابلين منه أي اسف أو اعتذار .

البطاريق بيعملوا حفلة كبيرة كل سنة اصلهم بيحبوا الفرح والسعادة

وكان فى دب اسمه دباديبو متغاظ منهم اوي بشكل غريب وزيادة

عشان البطاريق بيخلصوا على كل السمك اللي فى البحيرة

ولأن دباديبو كسول شوية فبيصحى متأخر ومبيلاقيش ولا سمكة كبيرة

فقرر دباديبو يبوظ الحفلة وحاول يعرف معلومات عن تجمع البطاريق

فراح مصاحب بطاطا وقاله انت عندي احسن صاحب وصديق

بطاطا كالعادة بيحكى كل حاجة وحكى لدباديبو عن الحفلة الكبيرة

هيحتفلوا فيها باعياد ميلاد البطاريق وهينزلوا بعدها كلهم يعوموا فى البحيرة

ضحك دباديبو ضحكة صفرا وقال لبطاطا أتمنالك يا صديقي وقت سعيد

واول ما تتجمعوا عاوزك تصفرلى عشان اجى اتفرج على الحفلة من بعيد

بطاطا لسة صغير ومكنش يعرف أن دباديبو الدب مش بيحبهم وعاوز يبوظ حفلهم

وبالصدفة حكي لبابا وماما عن صاحبه الجديد دباديبو وأنه بيسلم عليهم كلهم

اتخضوا بابا وماما وقالوله اوعى تقابله تاني، وراحوا بسرعة بلغوا كل المجموعة

بطاطا حس أنه عمل مشكلة كبيرة، وبابا وماما قالوله اللي عملته حاجة ممنوعة

ومجموعة البطاريق قررت تأجل الحفلة ومباقوش يروحوا مؤقتا البحيرة

وبطاطا عرف أنه هو السبب بتصرفاته فى تأجيل الحفلة الجميلة

قرر بطاطا يتغير وميحكيش حاجة تانى الا لما يستأذن بابا وماما

وأن بوقه زي البير لازم يحفظ السر فيه ودى مصداقية وأمانة

دباديبو استغرب ان البحيرة فاضية ،وفضل يصفر لبطاطا ومحدش رد عليه

بطاطا اتعلم الدرس خلاص مش كل الكلام ينفع يقوله لأي حد أو يحكيه.

وف يوم الدب دباديبو زي عادته نايم جوة الكوخ وكسلان

كل البطاريق اتجمعوا عند البحيرة تاني وعملوا احلى حفلة كمان.