كيكة التوت

كيكة التوت هي قصة من مجموعة قصص قصيرة اكتبها للأطفال، ذات الهدف والمغزى، لتعليمهم معنى حياتى.

كيكة التوت

هالة فرخة لونها احمر نشيطة جدا عايشة في المدينة وعندها أصحاب

ميزو الكلب، والقطة نونو، والحصان ليلو وبيلعبوا مع بعض اصلهم احباب

هالة بتحب تكتشف بنفسها كل حاجة، وميزو بيحب ينام في الضلة

اما نونو بتحب تنام تحت الشمس، وليلو بيتفرج على التلفزيون وبيقرمش بسلة

نونو تحت الشمس بتحرك ديلها، وميزو بيتقلب يمين وشمال

وليلو مبسوط بالكرتون والالعاب والتلفزيون ليل ونهار شغال

هالة مش عارفة تقعد ساكتة، في حاجات وراها لازم تخلصها

بتنضف وتوضب وبتغسل وتروق وتزين بيتها وعشتها

وفيوم شافت شجرة جميلة طرحت فاكهة اسمها توت

قالت لاصحابها يلا نعمل كيكة واللي هياكل منها هيبقي مبسوط

ميزو قالها انا كسلان سيبينى انام ونونو هزت ديلها وقالتلها انا كمان

ليلو قالها نفسى اعملها معاكى بس الفيلم ده حلو اوى مشوفتوش من زمان

هالة قالت طب هروح اجمع التوت تكونوا ارتاحتوا شوية

وهرجع ليكم تانى بسرعة وتساعدونى وتحطوا ايديكم في ايديا

راحت هالة جمعت التوت ورجعت تانى بسرعة لأصحابها

صحت ميزو ونونو وليلو لكن كله اعتذر محدش فيهم هيساعدها

قالت طيب انا جمعت التوت،محدش يقدر يجى معايا السوق

عاوزة اشترى دقيق وسكر وزبدة وبندق بودرة مدقوق

كل أصحابها باصولها وسكتوا، فهمت هالة انهم مكسلين

راحت السوق لوحدها وجابت الحاجة وحضرت العجين

حطت قطع التوت وخبزت احلى كيكة لونها مدى على موف

والكيكة جوة الفرن جوة المطبخ، والمطبخ باين ومكشوف

وأول ما بدأت الكيكة تستوى ميزو شم ريحة جميلة

ووصلت كمان لنونو وليلو ففرحوا وعملوا هليلة

راحوا لهالة وقالولها ايه اخبار الكيكة دى ريحتها تحفة

قوليلنا بقي عملتى لكل واحد فينا من الكيكة كام حتة

هالة ضحكت ضحكة كبيرة وقالت ليهم هاكل كل الكيكة لوحدي

كملوا نومكم يا حلوين ده مافيش حد فيكم ساعدني

زعلوا الاصحاب وعرفوا ان النوم الكتير والكسل خسرهم

واتعلموا انهم لازم يدوا كل حاجة وقتها ويقسموا يومهم