قصة قصيرة بالعامية المصرية.

قصة قصيرة بالعامية المصرية، اجتماعية رومانسية.

فضلت مستنياه نص ساعه زيادة على الميعاد اللي متفقين عليه، بس مش مهم يمكن بيفكر في حاجه جديده المرة دي يضحك عليا بيها..

جه وكان ماسك في ايده وردة حمرة..

-ازيك يا ليلى؟

*أحسن منك، بجد وأحسن كتير من غيرك.

-عارف انك زعلانه مني، بس والله...

قاطعته بسرعه وقولتله.. انت جاي ومتأكد انك هترجع تلاقيني بقولك أهلا وسهلا ومعلش ومش زعلانه، زي كل مرة، بس لا انسى.. أنا مش هستحمل أنانيتك تاني.

-طيب بصيلي.. وحشتيني على فكرة.

*ضحكتني، ضحكت عليا انت كدا وانا مفروض صدقتك.

-اه مانا عارفك قلبك كبير وانتي عارفة اني بحبك.

*بتحبني؟! تصدق أول مرة أسمعها، وجديده على ودني كدا.

ناديت للويتر يجيبلي فنجان قهوة كمان.. اتعودت عليه من وقت غيابه بشكل مش طبيعي.. بس جات بفايدة وعوضت مكانه..

بصيتله بعين مليانه دموع خبيتها ورا الوش اللي اتدربت كتير على اني أبينه.. وش قوي ومليان قسوه.

كملت كلامي..

هو فين حبك دا؟ فهمني؟

فين حبك وقت ما كنت بنام بصعوبة عشان مش قادرة أستناك وانا عارفه انك مش هتيجي زي كل الليالي اللي عدت..

فين حبك لما كنت بتوعدني انك جنبي ومش هتسيبني في أوقات انهياري وخوفي .. ومش بلاقيك..

فين وأنا مش لاقيه حد أشكيله بعد ما خدتني من كل الناس.. كنت أناني في وجودك وحتى في غيابك..

-طيب مانتي عارفة انه غصب عني.

* لا مش غصب عنك، انا اللي عودتك وانا اللي غلطانه اني حبيتك بالشكل دا.

-بس انتي قولتيلي قبل كدا.. هفضل أحبك حتى في زعلي منك..

*ماهو مبقاش زعل.. أنا قررت أختار نفسي لأول مرة في حياتي..

-ازاي؟ انتي كدا بتقرري تتخلي عني!

*سيبني, سيبني ولو مرة في عمري أكمل قرار صح خدته..

-بس انا عملت عشانك كتير وبجد أنا بحبك.

*عملت عشاني كتير منكرش بس للأسف رصيد الحاجات دي انت خلصته بكم الخذلان اللي عيشتني فيه وقدمتهولي..

إمشي أحسن.. اديتلك فرص كتير وانت اللي اخترت تخسر حبي ليك.

حاول يمسك ايدي.. شديتها بسرعة في نفس اللحظه اللي بصيت فيها بعيد عشان أداري دمعه غصب عني غفلتني ونزلت على خدي.. مش عايزاه يشوفها..

* أنا كنت مقرره اني أمشي بعد ما تخلص سيجارتك التالته .. وأديك أهو خلصتها..

عن اذنك همشي.. أتمنى متنساش انك في آخر لقاء بينا.. عملت أكتر حاجه بكرهها.. يمكن دا يوصلك لحقيقتك!

قمت عشان أمشي، سلمت عليه، ابتسمت وقلت له .. "كانت فرصة قاسية أوي"..

مشيت وسبته مع أغنية عمرو دياب شغالة في المكان.. وهو بيقول ضعت وضيعتني من إيدك.. يا خسارة بتيجي الحاجة لما الواحد مايعوزهاش..