يوميات محمود و جهاد ابطال فيلم واسلاماه
تفاصيل العمل
سلامه / "صائحا" انتى فين يا جهاد ..
جهاد / انا هنا .. انا هنا ياسلامه فى المطبخ .. هطفى على الرز واجيلك
محمود / جهاد خيبه اوى يا سلامه فى الطبيخ ..بطنى نشفت من البلوبيف والتونه
سلامه / انا عرفت ان التتار جايين على هنا .. لو اكلها ماتحسنش .. خليهم ياخدوها مع العبيد
يدق جرس الباب نغمة انذار.. محمود يفتح الباب ..
يلاقي في وشه قائد التتار ورجاله وقد تجمع خلفه سكان العماره كلهم
محمود / انت مين ياحج ؟
هولاكو/ انا جي اخد الزباله .. "ثم صارخا" انت بتستهبل ..احنا التتار.. معاك هولاكو مش شايف اللبس القديم والسيوف
محمود / طلباتك ..
هولاكو / يهجم عليهم عشان يضربهم
احد سكان العماره/ هيضربوهم و هما بيتغدوا ..
ساكن العماره 2/ احسن علشان يحرم يضرب على أجرة نور السلم والاسانسير
محمود / "يفرقهم" كل واحد يروح يشوف مصلحته يا اخوانا ..
هولاكو / اما انكم تدفعوا الجزيه و تسيبوا الشقه والا هتغدى عندكم وأكل اكلكم واحلي بيكم هاهاهاهاهاه (يضحك ضحكه عاليه مرعبه )
محمود / عاوز تتغدى الاكل قدامك ..
هولاكو/ ايه القرف ده؟اللحمه مش مستويه والباميه صايصه.. الاكل زباله الصراحه
جهاد/ انت بتقول على اكلى زباله ؟
"تتجه للشباك" واااااكلاه .. واااكلاه .. الجزمه مش عاجبه طبيخى .. وااااكلاه ..
محمود / جهاد هتاكله بسنانها .. يستاهل لانه غبى .. غزو الجيوش للبلاد اسهل من انك تنتقد أكل واحده ست .. امال انا ايه اللى مصبرنى
سلامه / "يخلص هولاكو من يد جهاد" سيبيه يا جهاد خلاص هولاكو هيموت فى ايدك
جهاد / مافيش خلاص..هو اتجنن ولا ايه ؟ بيتريق على طبيخى؟ ده انا هاكل ودانه
"يفلت هولاكو بصعوبه من جهاد و يغادر مسرعا مع رجاله"
هولاكو / انسحااااااااب .. انسحاااااب ..
جهاد / لو عتبت هنا تانى هخليك تغسل المواعين وتمسح المطبخ..أطلع بره..بره
سلامه / يحمد ربنا انه مش هيعيش بقيت حياته أعمى
= التتار بتجرى فى الشارع و جهاد من البلكونه ترميهم بالشبشب وتقولي قال هولاكو قال
جهاد تصرخ وتصرخ
محمود / اصحي ياحبيببتي اصحي يا جهااااااد ( يهزها جامد )
جهاد / ايه ده انا فين يا محمود انا كنت بحارب
محمود/ يضحك بشده ويقول كل ده بسبب طاجن الباميه