سلسله دينيه باللغه العاميه المصريه

الحمد لله انا حفيد الشيخ محمد الغزالى أديب الدعوه الإسلاميه

واكتب فى دين الله من خلال الاحاديث والقرأن

ولكنى ابسطها باللغه العاميه المصريه وهذه سلسله كتبتها ورفعتها على صفحتى فى الفيس بوك حيث إنى صاحب صفحه بعنوان ( التائب )

السلسله بعنوان ( يوم الحساب )

****************************************************

يا عم كلنا هنموت

يا سيدى هو فى حد بيخلد فيها

كلنا هنموت

هموت من الضحك * هموت واعرف

هموت هموت هموت

بقت كلمه عاديه بتتقال ومحدش بيشغل باله بيها

مش بنشغل بالنا بيها من كتر ما سلمنا بالكلمه وعرفنا اننا كدة كدة هنموت

وبردوا كلنا عارفين اننا هنتحاسب

بس عمرك فكرت الحساب دا هيبقى ازاى؟ وهنبقى فين ؟

وازاى كل واحد فينا هيتحاسب على الى عمله ؟

اتفقنا ان كلنا هنموت خلاص

طيب وبعدين ؟ حياتنا انتهت فى التربه او القبر الى احنا فيه دا ؟

روحنا طلعت من جسمنا وخلاص انتهى الموضوع على كدة ؟

لا صدقونى دى الحكايه اكبر من كدة بكتير

فى يوم من الايام ربنا هيأمر ملك من الملائكه اسمه اسرافيل

وهيقول يا اسرافيل انفخ فى الصور

اية الصور دا ؟؟ دى أله كدة شبه البوق زى القرن بالظبط

واسرافيل دا واحد من الملايكه العظام

ومن يوم ما ربنا ادى المهمه دى لاسرافيل وهو جاهز ومستنى ربنا يطلب منه النفخ فى الصور

وكل ما الزمن يعدى بيهيأ ويجهز نفسه اكتر

، قال صلى الله عليه وسلم : ( كيف أنعم ، وقد التقم صاحب القرن القرن ، وحنى جبهته ، وأصغى سمعه ينتظر أن يؤمر أن ينفخ فينفخ ، قال المسلمون : فكيف نقول يا رسول الله : قال : قولوا حسبنا الله ونعم الوكيل ، توكلنا على الله ربنا ) رواه الترمذي وحسنه.

انتو متخيلين الحديث؟ الرسول بيقول ان خلاص اسرافيل مسك القرن الى هينفخ فيه

ووطى راسه شوية عشان يبدأ ينفخ وبقى مركز اوى فى السمع ومستنى ربنا يقوله انفخ

شايفين الموضوع قريب ازاى؟

طيب وبعدين يعنى يا عم انت عمال تقولى قرن وصور وكلام كدة

وبعد ما اسرافيل ينفخ اية الى هيحصل يعنى ؟؟

انا مش هرد عليك بكلامى انا عشان يمكن مش هتصدقنى وهتقول انى بكبر الموضوع

طب خد عندك بقى

بسم الله الرحمن الرحيم

ونفخ في الصور فصعق من في السماوات ومن في الأرض إلا من شاء الله

صدق الله العظيم

اول ما اسرافيل هينفخ فى الصور

هتبقى كأنها صاعقه اشد من اى صاعقه تتخيلها وصوت شديد جدا هيسمعه كل مخلوق على وش الارض وفى السما وكل الى يسمع الصاعقه دى والصوت دا هيموت فورا

الا الى ربنا هيعوز انهم ميموتوش دلوقتى

وسيدنا محمد عليه الصلاه والسلام بيقول

إن الناس يصعقون ، فأكون أول من يفيق ، فإذا موسى باطش بجانب العرش ، فلا أدري أكان فيمن صعق فأفاق قبلي ، أو كان ممن استثنى الله ) رواه البخاري ومسلم.

يعنى اول واحد هيفوق هيكون سيدنا محمد واول ما هيبص هيلاقى سيدنا موسى قاعد جمب عرش ربنا فهيكون مش عارف يا ترى هو فاق قبلى من الصاعقه ولا ربنا اصلا كان مخلى سيدنا موسى من الناس الى مش هتموت من الصاعقه ونفخ اسرافيل فى السور

فى كارثه هنا اية هى الكارثه دى ؟؟

الكارثه ان الصاعقه والنفخ فى الصور هيجى فجأه والناس مشغوله فى الدنيا محدش هيبقى محضر نفسه لحاجة

بسم الله الرحمن الرحيم

ما ينظرون إلا صيحة واحدة تأخذهم وهم يخصمون

الناس هتكون فى الاسواق والى بياكل والى بيتفسح والى فى بيته

والى بيتاجر و الى بيشترى وبيفاصل

وفجأه اسرافيل هينفخ فى الصور والناس هتموت من شده الصوت الصاعق والمرعب

وبعد ما كل المخلوقات تموت حيوانات وحشرات وبنى ادمين وملايكه وجن وشياطين

كل حاجة حيه هتموت مهما كانت ( الا من يشاء الله )

اسرافيل هينفخ نفخه تانيه فى الصور ( القرن ) الى فى ايده

فهيصحى كل مخلوق مات قبل كدة كل حاجة كانت عايشه فى يوم هتصحى تانى

الى مات زمان هيطلع من القبور والى مات من النفخه هيصحى من مكانه الى كان ميت فيه

هيصحوا يبصوا حوليهم المؤمن هيصحى العربى هيصحى الاوربى والاجنبى هيصحى اليهودى والمسلم والمسيحى

الى كان بيعبد الاصنام هيصحى

والملحد هيصحى كله هيفضل يبص حوليه

كله مش مستوعب اية الى بيحصل وبيبص حوليه مش عارف اية النفخه الى خليته يصحى من الموت دى

بسم الله الرحمن الرحيم

{ ثم نفخ فيه أخرى فإذا هم قيام ينظرون }(الزمر: 68 )

يا ترى اية الى هيحصل بعد ما الكل يصحى

وهنلاقى اية بعد ما نطلع من القبور وازاى هيبدأ حساب كل واحد على الى عمله

****************

دى بدايه الجزء التانى

بسم الله والصلاه والسلام على رسول الله وعلى اله وصحبه ومن والاه

اتفقنا خلاص اننا هنموت وعرفنا ان فى حاجة اسمها النفخ فى الصور

وعرفنا كمان ان فى ملك هو المسئول عن النفخ فى الصور الى هو البوق او القرن دا

والملك دا اسمه اسرافيل

وكمان اتكلمنا عن ان اسرافيل مستعد فى كل لحظة ومستنى ربنا يديله الامر بالنفخ فى الصور

وعرفنا ان اسرافيل مش هينفخ فى الصور نفخه واحده لا دول هيبقوا نفختين

واحده الى هيسمعها هيموت فى الحال وهيحصله صعق الا من شاء الله طبعا

وواحده هتصحى الناس تانى من قبورها عشان الحساب يبدأ

ودا ملخص سريع للى اتكلمنا عنه المره الى فاتت

قبل اى حاجة عاوزين نعرف الناس الى هتبقى عايشه لحظه النفخه الاولى هيبقوا مين ؟؟

اى حد كدة يعنى ممكن احنا نكون منهم ولا احنا مستبعدين ولا اية وضعنا ما احنا عاوزين نطمن على نفسنا برضوا

الرسول فصل فى الموضوع دا وانهى الخلاف عليه لما قال الحديث فيما معناه يعنى وانا هكتبلكم الحديث بعد التفسير بتاعى فلو عاوزين تقروا الحديث ماشى مش عاوزين كدة كدة انا شرحته بطريقتى الى انتوا متعودين عليها المهم

الرسول قال ان مش هتحصل النفخه الاولى الى لما تيجى ريح طيبه

الريح دى هتقبض روح كل مؤمن وكل واحد جواه خير حتى لو الخير دا مثقال ذره

يعنى لو حاجة قليله اوى بردوا ربنا هيقبض روحه حتى لو الراجل دا فى قلب جبل الريح هتدخل تقبض روحه

ومش هيفضل فى الارض غير اشرار الناس

لا يعرفوا معروف فى حياتهم ولا بينهوا عن منكر

ذنوب واثام وحقد وكره وغل وكفر حاجات مستحيل تتخيلها

هيوصل بيهم الحال انهم هيعملوا الفاحشه فى الطريق

ولو حد فيهم كويس هيقول انا هستخبى ورا جدار

شايفين مين الى هيفضل بقى فى الارض ساعتها ؟

وساعتها هيكون اسرافيل قاعد جمب عرش ربنا وبيحاول يسمع اااااى حاجة

وعيونه زى كوكبين منورين جدااااا

خايف ربنا يؤمره ينفخ فى الصور وهو ما يسمعش عشان كدة مركز اوى

وعن أبي هريرة رضي الله عنه قال قال رسول الله صلى الله عليه وسلم : "إن طرف صاحب الصور مذ وكل به مستعد ينظر نحو العرش مخافة أن يؤمر قبل أن يرتد إليه طرفه كأن عينيه كوكبان دريان"أخرجه الحاكم وصححه ووافقه الذهبي والألباني .

والناس دى هى الى ربنا هيأمر اسرافيل انه ينفخ النفخه الاولى (نفخه الصعق )

وهما موجودين على الارض

عرفنا ان النفخه الاولى هيجى بعدها نفخه تانيه (نفخه البعث )

بس اول سؤال ممكن يجى فى بال اى حد يا ترى بين النفختين دول قد اية ؟؟

ودا الى المسلمين سألوه

عَنْ أَبِى هُرَيْرَةَ قَالَ قَالَ رَسُولُ اللَّهِ -صلى الله عليه وسلم- « مَا بَيْنَ النَّفْخَتَيْنِ أَرْبَعُونَ ». قَالُوا يَا أَبَا هُرَيْرَةَ أَرْبَعُونَ يَوْمًا قَالَ أَبَيْتُ. قَالُوا أَرْبَعُونَ شَهْرًا قَالَ أَبَيْتُ. قَالُوا أَرْبَعُونَ سَنَةً قَالَ أَبَيْتُ

يعنى اية الكلام دا

ابى هريره رضى الله عنه سمع الرسول وهو بيتكلم فى الموضوع دا عن المده الى بين النفختين

بس ما سمعش كويس فهو سمع ان بين النفخه الاولى والتانيه اربعين

بس اربعين اية بقى هو مش متأكد فالمسلمين يسألوه 40 يوم ( ابيت ) ابيت دى يعنى مرضتش ارد لانى مش متأكد يقولو طيب 40 سنه ميردش

طيب 40 شهر يا ابى هريره ميردش بردوا

بس فى روايه تانيه بتأكد انها 40 سنه بين النفختين

طيب احنا دلوقتى عرفنا شوية معلومات حلوين عن النفخ فى الصور

طيب مفيش يوم معين بقى او معلومه ادق

خد عندك بقى النفخ فى الصور هيبقى يوم جمعه

قال صلى الله عليه وسلم :

"وَمَا مِنْ دَابَّةٍ إِلاَّ وَهِىَ مُسِيخَةٌ يَوْمَ الْجُمُعَةِ مِنْ حِينَ تُصْبِحُ حَتَّى تَطْلُعَ الشَّمْسُ شَفَقًا مِنَ السَّاعَةِ إِلاَّ الْجِنَّ وَالإِنْسَ " رواه أبو داود وغيره وصححه الألباني .

يعنى اية بردوا الكلام دا

يعنى كل كائن حى على وش الارض بيكون مركز يوم الجمعه وخايف يكون هو دا يوم النفخ فى الصور الحيوانات والطيور والحشرات والزواحف كله

الا احنا والجن ملهيين ومش حاسين بأى حاجة وعايشين وخلاص

وتيجى اللحظه الموعوده وينفخ اسرافيل فى الصور فيعصق من فى السموات ومن فى الارض

صمت قاتل

سكوت مفزع ومرعب

مفيش كائن بيتنفس على وجه الارض

متخيلين الارض والدنيا الى كلها دوشه

مفيش صوت نفس ولا نبض قلب

رعب بكل ما تحمل الكلمه من معنى

مفيش غير ناس مصعوقه ومليارات الجثث

فراغ فى كل مكان

ما احقر الدنيا قد اية الدنيا متسواش

وبعد كدة يظهر الملك الحقيقى

ربنا يتجلى ويظهر بجلاله قدره وعظمته وكبريائه

ويطوى السما والارض فى ايده زى ما بتقفل الكتاب

ويبدأ الجبار يتكلم ويقول

اين ملوك الارض ؟

اية الجبابره ؟

لمن الملك اليوم ؟

فمحدش يرد على ربنا خالص فيرد يقول

لله الواحد القهار

فين الى ظلموا الناس

فين الى حرقوا الناس وقتلوهم

فين الى فاكر محدش قده فى الدنيا

فين البلطجه الى فاكر نفسه مالك الدنيا فى ايده

فىين امين الشرطه والظابط الى بيدوس على خلق الله

فين الملوك الى افتكروا ان الحياه هتدوم ليهم

هيبقوا فين لحظت ما ربنا يؤمر اسرافيل بالنفخ فى الصور

هيبقوا فين وربنا بيقول لمن الملك اليوم ؟

جمله مرعبه بكل معنى الكلمه

استنونى يوم السبت والجزء الثالث بعنوان

* الحساب وموت الملائكه *

***********************

دى بدايه الجزء التالت

بدأت معاكم سلسله انتو اختارتوها بعنوان يوم الحساب

والحمد لله قدرت اقدم ليكم معلوماتك ان شاء الله تفضلوا فاكرينها طول عمركم وتحكوها لصحابكم واهلكم واولادكم ان شاء الله

جبتلكم كلام بالادله سواء حديث صحيح او من القرأن

عرفنا ان قبل الحساب فى حاجة هتحصل اسمها النفخ فى الصور

وان الى هينفخ فى الصور ( الاله الى شبه القرن ) ملك عظيم اسمه اسرافيل

وكمان اتكلمنا على الريح الى هتاخد ارواح المؤمنين ومش هيفضل فى الارض

غير اشرار البشر بس الى كلهم كره وحقد وكفر وغل

وقلنا ان بين النفختين الى فى الصور 40 وما قدرناش نحدد 40 اية بالظبط سنه ولا شهر ولا يوم ولا اية بالظبط

تقدروا تراجعوا الجزئين الى فاتوا هما موجودين على الصفحه ومش فى اى مكان تانى على النت لانى كاتبهم بنفسى حتى لو الصفحه صغيره بس الحمد لله يعنى مش بعدد اللايكات

المهم نبدا نتكلم فى الجزء التالت النهاردة

انتهينا بجمله مفزعه وهى ان ربنا بعد ما الدنيا بقى فاضيه تماما من كل حاجة

قال لمن الملك اليوم لوما محدش رد عليه قال لله الواحد القهار

لما تحصل النفخه الاولى فى الصور الدنيا هتتزلزل ومن شده النفخه الارض هتتساوى كل حاجة هتموت وهتهلك والمبانى تتهد كل حاجة هتموت حمله عرش ربنا والملائكه المسبحون وسكان سدره المنتهى وملايكه السبع سموات إلا من شاء الله

ومنهم مجموعه من الملايكه

ربنا اللحظه دى هيجيب ملك الموت ويسأله من بقى ؟ ( وهو اعلم )

يعنى مين الى فاضل يا ملك الموت وطبعا ربنا عارف

يقوله انت اعلم يا رب بقى جبريل وميكائيل واسرافيل وعبدك الضعيف ( يقصد نفسه يعنى ) خاضع ذليل مذهول من الى شافه من اهوال

يقوله فأنطلق الى جبريل فأقبض روحه

فيروح ملك الموت عشان ينفذ كلام ربنا

فيلاقى سيدنا جبريل فيلاقيه ساجد لله فيقوله

ما أغفلك عما يراد بك يا مسكين قد مات بنو آدم وأهل الدنيا والأرض والطير والسباع والهوام وسكان السموات وحملة العرش والكرسي والسرادقات وسكان سدرة المنتهى وقد أمرني المولى بقبض روحك!

يعنى مفاضلش حاجة حيه كل شئ فى الكون مات وجه الدور عليك

اول سيدنا جبريل ما يسمع كدة يبكى ويدعى ربنا ويقول يا الله هون على سكرات الموت

انتوا متخيلين ان ملك بقيمه وعظمه سيدنا جبريل بيبكى وبيدعى ربنا يهون سكرات الموت

الى هو عايش ملاين السنين يعبد ربنا بدون غلطه

امال احنا المفروض نقول اية ؟

فملك الموت يقرب من سيدنا جبريل ويضمه ضمه فيقع سيدنا جبريل صريع فى الحال يموت فى لحظه ( يا الله ع المشهد )

ويرجع لربنا وبعد ما يرجعله ربنا يسأله تانى من بقى ؟ (وهو اعلم )

يقوله يا رب انت اعلم

بقى ميكائيل واسرافيل وعبدك الضعيف ملك الموت

فربنا يقوله فأنطلق الى ميكائيل فأقبض روحه

ميكائيل دا ملك المياه والمطر

فملك الموت يروح لميكائيل

يلاقيه مستنى المطر عشان يوزعه ع السحاب ويشوف شغله يعنى زى ما هو متعود يعمل من ملاين السنين فيروح يقوله ما أغفلك يا مسكين عما يراد بك! ما بقي لبني آدم رزق ولا للأنعام ولا للوحوش ولا للهوام, قد مات أهل السموات والأرضين

مطر اية الى انت مستنيه لا فى بنى ادم عايش ولا حيوانات ولا حتى الوحوش ولا اى حاجة

كله مات فى السما والارض ودلوقتى ربنا امرنى انى اقبض روحك فيبكى هو كمان ويطلب من ربنا انه يخفف عليه سكرات الموت

فيضمه ملك الموت ضمه فيموت فى الحال سيدنا ميكائيل

فيرجع تانى لربنا وربنا يسأله من بقى ؟ وهو اعلم

يقوله انت اعلم يا الله بقى اسرافيل وعبدك الضعيف ملك الموت

فربنا يقوله انطلق الى اسرافيل فأقبض روحه

فاكرين اسرافيل؟ ايوة هو الملك الى نفخ فى الصور

فيروح ملك الموت لاسرافيل واحنا عارفين انه ملك من الملايكه العظام

فيقوله ما أغفلك يا مسكين عما يراد بك! قد ماتت الخلائق كلها وما بقي أحد وقد أمرني الله بقبض روحك

خلاص يا اسرافيل مهمتك انت عملتها على اكمل وجه كله مات مبقاش فى حد ودلوقتى جه دورك

وساعتها يرد عليه سيدنا اسرافيل ويقوله : سبحان من قهر العباد بالموت, سبحان من تفرد بالبقاء, ثم يقول مولاي هون علي مرارة الموت

وساعتها ملك الموت يضمه زى الى قبله ويقبض روحه ويقع سيدنا اسرافيل ميت

بعد ما امات الخلق كلهم بنفخه فى الصور

وساعتها يرجع ملك الموت لربنا وربنا يسأله

من بقى ؟ وهو اعلم

يقوله يا رب انت عارف مفاضلش حد غيرى انا وانت

ساعتها ربنا يقول لملك الموت جمله مرعبه

يقوله : وعزتى وجلالى لأذيقنك مثل ما اذقت عبادى

يعنى يا ملك الموت انا خليتك مسئول عن قبض ارواح العباد

شوف اخدت روح كام انسان وكام حيوان وكام كائن وكام ملك من اعظم الملايكه

لازم تدوق يا ملك الموت عذاب الموت نفسه

فمت يا ملك الموت

فيجرى ملك الموت بين الجنه والنار ويصيح صيحه يعنى يطلع صوت عالى جداااا

لولا ان ربنا موت كل المخلوقات كانوا ماتوا تانى من شده الصيحه بتاعت ملك الموت وروحه بتطلع

ويموت ملك الموت فى اللحظه دى بعد ما داق من الى عمله

وساعتها يحصل الى اتكلمنا عليه المره الى فاتت

يتجل الله عز وجل للدنيا ويقول

يا دنيا أين أنهارك أين أشجارك وأين عمارك؟ أين الملوك وأبناء الملوك وأين الجبابرة وأبناء الجبابره؟ أين الذين أكلوا رزقي وتقلبوا في نعمتي وعبدوا غيري, لمن الملك اليوم؟ فلا يجيبه أحد فيرد الله عز وجل فيقول الملك لله الواحد القهار...

وبعد كدة ربنا يسخر المطر عشان تمطر وساعتها الانسان هينبت زى النبات بالظبط

من عظمه صغيره جدا فى اخر العمود الفقرى هيطلع منها الانسان كأنه زى النبات بالظبط من جديد ودا هيحصل بعد ما ربنا يحيى سيدنا اسرافيل ويقوله خد الصور وانفخ فيه نفخه البعث

وساعتها هيخرج الناس من القبور مره تانيه عشان يبدأ الحساب

والناس تتجمع كلها ويجى ربنا عشان يحاسبنا وهنا تتحقق الايه الكريمه

واشرقت الارض بنور ربها ووضع الكتاب

هنتحاسب ازاى وهنقف فين ؟ وهنفضل قد اية ؟ والناس هتتقسم على اساس اية ؟

كل دا هنعرفه فى اخر جزء يوم التلات الجاى ان شاء الله والجزء الاخير من سلسله يوم الحساب بعنوان * المشهد الاخير نعيم ام جحيم *

******************

اخر جزء فى السلسله

المشهد الاخير

من غير اى مقدمات ولا تذكير بأى جزء من الاجزاء

افصل من اى حاجة وفضى نفسك وسيب كل حاجة شغلاك واقرى معايا النهاردة بقلبك

الخاحة الوحيده الى ينفع ان يتقال عليها المشهد الاخير

اصل دا مش المشهد الاخير من فيلم

ولا من مسرحيه ولا حتى مسلسل استمر 5 ولا 6 اجزاء فحسينا اننا بقينا عشره مع الابطال

ياما عيطتوا فى افلام ياما اتأثرتوا بموت ابطال

كنتوا بتعيطوا على ناس عارفين حتى انها بتمثل

النهاردة احنا محتاجين الى يعيط علينا

محتاجين نتحسر على كل لحظه فاتت مننا

محتاجين احنا الى نبكى على نفسنا وعلى حالنا وعلى الى وصلنا ليه

ما هو فعلا المشهد الاخير

اخر يوم فى الدنيا .... مستوعب الى بقوله ؟

اخر يوم فى التاريخ اليوم الى مفيش يوم بعده

يوم القيامه يوم الساعه يوم الحساب يوم الزلزله يوم الواقعه

سميه بقى زى ما تسميه بس صدقنى اسمه مش هيفرق كتير

لانك ساعتها هتبقى مشغول فى حاجات مفزعه ومرعبه فمش هتفكر حتى تسأل اليوم دا اسمه اية

اعمل فلاش باك سريع كدة * نفخه الفزع * النفخه الاولى

كله مات الملايكه ماتت البشر ماتت الجن والطير والحيوان والنبات الحشرات والزواحف

حتى حمله عرش ربنا ماتوا

(( ونفخ فى الصور فصعق من فى السموات ومن فى الارض )

وحصلت نفخه اسمها نفخه البعث ربنا بعث تانى كل كائن حى عشان كل واحد يشوف اية إلى ليه وإيه الى عليه

(( ثم نفخ فيه اخرى فاذا هم قيام ينظرون ))

انا وانت وانتى واهلنا واجدادنا والفراعنه وما قبلهم وهات معاك بقى من اول سيدنا ادم

ويمكن قبل كدة كمان لو كان فى حد (( ودى منطقه فيها كلام ان يا ترى فى حد قبل سيدنا ادم ولا لاء هنبقى نتكلم فيها بعد كدة ))

المهم فجأه ينادى منادى من عند ربنا ويقول

" أيتها الرمم البالية، أيتها اللحوم المتناثره قومي لفصل القضاء بين يدي الله الواحد الأحد الفرد الصمد

وهنا تلاقى الارض بتتشق والناس بتقوم من القبور كله قايم مذهول مش عارف هو فين

ولا رايح فين مش عارف انه متجه لحته اسمها ارض المحشر

ودى الارض الى ربنا هيجمع فيها كل مخلوق علشان يتحاسب

اول واحد الارض هتتشق عنه ويطلع من الارض هو سيدنا محمد صلى الله عليه وسلم

وهيلاقى الملايكه مستنياه وهيروح لرب العالمين وساعتها هيقول أمتي أمتي يا رب العالمين

بيسأل علينا

الارض الى احنا هنتجمع عليها دى ارض نقيه بيضا مش سوده زى الارض بتاعتنا دى

وارض مستويه لا فيها جبل ولا هضبه ولا وادى ولا حفره ولا اى حاجة خااالص مجرد ارض مستويه عشان تجمع الخلائق كلهم

هنتجمع كلنا وهنفضل واقفين كتيييير اوى وهنبقى مش قادرين ومش عارفين مصيرنا اية

فهنروح ندور على اى حد من الى مكانهم عالى عند ربنا يشفعلنا ويطلب من ربنا انه يبدأ الحساب

وفى روايات بتقول ان من كتر ما هيبقى الوقوف دا صعب جدا ومرعب جدا الشخص هيتمنى ان ربنا يمشيه من هنا حتى لو هيروح النار

الناس هتفضل تدور على حد يشفعلهم وهما بيدورا هيلاقوا سيدنا ادم عليه السلام

هيكلموه ويطلبوا منه انه يروح يقول لربنا اننا تعبانا اوى وعاوزين الحساب يبدأ

كل واحد عاوز يعرف هو هيروح فين بس سيدنا ادم ساعتها هيرفض من شده الموقف وهيقول نفسى نفسى

فهيجروا يشوفوا حد تانى فهيلاقوا سيدنا نوح اول رسول للبشر من ربنا

سيدنا نوح هيفتكر ان فى حاجات قصر فى حق ربنا فيها فهيرفض هو كمان وهيقولهم نفسى نفسى

وهيفضلوا الانبياء واحد ورا التانى بنفس الوضع لحد ما يوصلوا لحبيبنا سيدنا محمد عليه الصلاه والسلام ويطلبوا منه انه يروح لربنا عشان يبدأ الحساب لانهم تعبوا جدا

وساعتها الرسول هيرد عليهم ويقول ( انا لها امتى امتى )

وساعتها الرسول صلى الله عليه وسلم هيروح لربنا ويستأذن منه

وساعتها ربنا هيأذنله فهيسجد سيدنا محمد بين ايدين ربنا فيبدأ سيدنا محمد يحمد ربنا ويشكره ويعرفه ان الناس تعبت

وعاوزين يبدأو الحساب وفعلا يبدأ الحساب

يبدأ فعلا زى ما بنقول المشهد الاخير المرعب

لا انت مستنى نتيجه امتحان ولا نتيجه كشف دكتور ولا نتيجه اى حاجة

لا دا انت مستنى مصيرك للابد هتتعذب عذاب مهين وخالد

ولا ربنا هيرحمك ويكرمك ولا انت اية حكايتك بالظبط

وهنا يظهر ربنا للدنيا والدنيا تنور ( واشرقت الارض بنور ربها )

ويبدأ الحساب الى بجد

الناس كلها مش هتتحاسب زى بعض ازاى يعنى ؟؟

جزء ربنا مش بيشوف حسناتهم وسيئاتهم ويقارن بنهم ويدخلهم على اساسهم النار

لا دول ناس ربنا بيعد عليهم الحاجات الوحشه الى عملوها ويرميهم فى النار على طول

خوفت؟؟ اطمن دول الكفار يعنى الناس الى مش مسلمين والملحدين والكفار وكدة

بسم الله الرحمن الرحيم إن الذين كفروا وظلموا لم يكن الله ليغفر لهم ولا ليهديهم طريقا، إلا طريق جهنم خالدين فيها أبدا وكان ذلك على الله يسيرا

صدق الله العظيم

وجزء تانى من الناس بردوا ربنا مش بيشوف حسناتهم وسيئاتهم لا دا ربنا بيدخلهم الجنه على طول كدة من غير اى حساب اصلا

اية دا طيب مين دول ؟؟ قال صلى الله عليه وسلم : ( يدخل الجنة من أمتي سبعون ألفا بغير حساب . هم الذين لا يكتوون ولا يسترقون ، ولا يتطيرون ، وعلى ربهم يتوكلون ) متفق عليه

طيب يعنى اية الكلام دا مش فاهمين الذين لا يكتوون يعنى مش بيعالج نفسه بالكوى زى زمان كدة

ولا يسترقون يعنى مش كل شوية يقول لحد ارقينى اصلى محسود اصلى جايب مش عارف اية جديد اصلى مش عارف اية

ولا يتطيرون يعنى مش متشائمين لا يا عم الواد او البت دى نحس اصل المكان دا وشه فقر

وكدة

والناس الى بتتوكل على ربنا فى كل حاجة وسيباها على ربنا

الناس دى هتدخل الجنه من غير ما تتحاسب اصلا لا هيتبص على حسناتهم ولا سيئاتهم

ربنا يكرمنا ونبقى منهم يا رب

وجزء تالت بقى ربنا بيجيبهم ويقربهم منه ويسترهم يعنى محدش يبقى شايفهم ويجيب حسناته ويجيب سيئاته ويقوله فاكر لما عملت الذنب دا؟

وفاكر لما عملت دا ودا ودا ؟ يقوله فاكر يا رب ( اعرف اعرف ) مرتين

لما يعترف بالذنب الى عمله ساعتها ربنا يقوله ( سترتها عليك فى الدنيا واليوم اغفرها لك )

يا الله على الجماال بتاع اللحظة دى وساعتها ربنا بيودى الناس دى الجنه

قال صلى الله عليه وسلم : ( يدنوا المؤمن من ربه حتى يضع عليه كنفه – ستره - فيقرره بذنوبه ، تعرف ذنب كذا ؟ يقول : أعرف ، رب أعرف مرتين ، فيقول : سترتها في الدنيا وأغفرها لك اليوم ، ثم تطوى صحيفة حسناته ) رواه البخاري و مسلم .

وفى الجزء الى هو سيئاته اكبر من حسناته ودا بيدخل النار يتحاسب على الى عمله ودول تحت مشئيه ربنا لو اراد يعذبهم ولو اراد يغفرلهم

{ إن الله لا يغفر أن يشرك به ويغفر ما دون ذلك لمن يشاء ومن يشرك بالله فقد افترى إثما عظيما }

فى جزء اخير بقى مختلف عن كل دا خالص

ودا السؤال الى ممكن يجى فى بالك بعد كدة يا ترى لو واحد سيئاته قد حسناته بالظبط

هيحصله اية ؟

هو دا الجزء الاخير ودول اسمهم اصحاب الاعراف يعنى الى استاوت حسنتهم مع سيئاتهم

والناس دى ربنا بيوقفهم على مكان عالى بين النار والجنه

واغلب الظن ان ربنا بيدخل الناس دى الجنه برحمته وكرمه وفضله

: { وعلى الأعراف رجال يعرفون كلا بسيماهم ونادوا أصحاب الجنة أن سلام عليكم لم يدخلوها وهم يطمعون }( الأعراف:46) .

الى قدامك دا مش حسابنا احنا بس لا دا حساب المكلفين من الانس والجن كمان

اما بالنسبه لاى حاجة تانيه فمش بيبقى ليها حساب لا دا بيبقى قصاص

يعنى الحيوانات نفسها لو حيوان ضرب حيوان ضعيف ربنا بيخلى الضعيف يضرب الى ضربه يوم القيامه

( لتؤدنَّ الحقوق إلى أهلها يوم القيامة حتى يقاد للشاة الجلحاء من الشاة القرناء )

الرسول بيقول حتى الخروف الى ملوش قرون الى فى يوم ضربه كبش بقرون ربنا هيجيبه وهيخليه يضربه يوم القيامه

واول حاجة احنا هنتحاسب عليها يوم القيامه اول ما يتحطلك الميزان بتاعك هى الصلاه

دى اول حق من حقوق ربنا بيحاسب عليها

انما اول حق من حقوق الناس هى الدم يعنى الى قتل واتقتل دى اول حاجة ربنا بيحاسب عليها فى حقوق البشر

قال صلى الله عليه وسلم : ( أول ما يحاسب به العبد الصلاة وأول ما يقضى بين الناس في الدماء )

طيب ولو حد ربنا قاله انت عملت كذا وقال لا ما عملتش ؟ ساعتها ايدك الى عملت الذنب هتشهد عليك ورجلك الى مشت لمكان الذنب هتقول حصل يا رب ومشيت ورحت كذا

ولسانك الى اتكلمت بيه هيشهد عليك

{ يوم تشهد عليهم ألسنتهم وأيديهم وأرجلهم بما كانوا يعملون }

مش بس كدة دى الملايكه الى كانوا بيكتبوا كل حاجة بتعملها هيشهدوا عليك فمش هتقدر تهرب

وهنا ينتهى المشهد واهل الجنه ياخدوا كتابهم باليمين وهما فى منتهى الفرح احساس ما فيش بعده احساس وهما رايحين على الجنه

واصحاب النار واخدين كتابهم ومتسلسلين ورايحين على النار وهما مذلولين وندمانين

مشهد مرعب ربنا ما يكتبه علينا

انتهى المشهد الاخير انتهى اصعب مشهد ولحظات فى التاريخ

اللحظات الى التاريخ نفسه اتعمل علشانها الى الدنيا اتعملت ك اختبار علشانها

اتلهينا وبعدنا وقصرنا واحنا مش حاسيين

كل واحد فينا تايه فى دنيته يا ترى كل واحد بيقرا دلوقتى مغمض عنيه ورايح فين

اية شغلك عن ربك ؟ اية يستاهل انك تبعد عنه ؟ اية يستاهل لحظه رعب وانت مربوط بسلاسل مع جن او شيطان ورايح على النار؟

احسبها وشوف اية الى يستاهل انك تعمل علشانه

شوف اية يستاهل انك تبعد عن ربنا ومتديش ربنا حقه علشانه

حاسبوا انفسكم قبل ان تحاسبوا

اسف على الاطاله بس عندى كلام كتير جدا عن اهوال فى اليوم الى قولتلهم عنه بس جزء بسيط

لسه قايلها وهقولها تانى حاسبوا انفسكم قبل ان تحاسبوا

اظن شايفين السلسله قد اية وكلامها قد اية

السلسله اخدت منى وقت كتير جدا لانى مش واخدها كوبى

ولا جايبها من حد دا كل حرف انا الى كاتبه ومش هتلاقيه فى اى حته فى الدنيا بالنص دا