الكواكب الصالحة للحياة

أكيد طبعاً من يوم ما بدأت تسمع عن الكواكب والفضاء خطر على بالك سؤال مهم ، هو في كواكب شبه الأرض ممكن الإنسان يقدر يعيش عليها ؟!

العالم (شولز ماكوتش ) طلعلنا بحاجة جميلة جدا سنة ٢٠١١ إسمها مؤشر تشابه الأرض أو (Earth Similarity Index ) ، ودي بكل بساطة ومنغير أي تعقيد معناها درجة تشابه اي كوكب يتم اكتشافه بالكرة الأرضية ، والمعادلة دي فيها كذا حاجة عشان تعرف نسبة الكوكب ده شبه الأرض بقد ايه ، زي نصف قطر الكوكب ، الكثافة ، درجة حرارة التوازن الكوكبي، وما الى ذلك ، وعشان مش عايز الخبطك لو مهتم تعرف صيغتها ابحث عنها هتلاقيها سهلة جدا ..

لكن نيجي بقى لموضوع النهاردة اللي هو اكتر كواكب شبيهة بالأرض على مؤشر التشابه الارضي ، بمعنى اوضح ممكن تكون صالحة للحياة ..

1- KOI-4878.01

ده اسم الكوكب فعلا ، بيقع على بعد ١٠٧٥ سنة ضوئية ، الفكرة كلها يا صديقي ان ده اكتر كوكب شبيه بالكرة الأرضية لدرجة تخوف ، نسبه التشابه هي ٩٨٪ من الكرة الارضية ، بيستغرق ٤٤٩ يوم عشان يكمل لفة حوالين نجمه الخاص ، كتلته شبه كتلة الأرض بنسبة ٩٩٪ ، نصف قطره اكبر من نصف قطر الأرض بنسبة ٤٪ ، لو الغلاف الجوي للكوكب مشابه للأرض هتكون درجة حرارته اعلى بقليل من الأرض ، مع الأسف مش معروف معلومات كتير عن الكوكب ده لكن مع الوقت هنعرف باذن الله ..

2- TRAPPIST-1e

ترابيست _ 1e ، نسبة تشابه الكوكب بالأرض تبلغ ٩٥٪ ، يبعد عن كوكب الأرض مسافة ٤٠ سنة ضوئية ، هو واحد من سبع كواكب بتدور حول نجمهم الاحمر ، نصف قطره يبلغ ٩١٪ من نصف قطر الأرض، كتلته ٧٧٪ من كتلة الأرض ، كثافته ١٠٢ ٪ من كثافة الارض ، ازيد من كثافة الارض بنسبة ٢ ٪ ، جاذبيته تبلغ ٩٣٪ من جاذبية الأرض ، العلماء اكدوا انه كوكب صخري ، وعنده المقدرة في الحقاظ على الماء في شكله السائل ، بمعنى اوضح درجة حرارة الكوكب مبتجمدش او تبخر الماء ، ترايبست ١ هيكون أول أهداف تلسكوب جيمس ويب اللي هيدخل الخدمة السنة الجاية ، وده بسبب ان كوكب ترايبست من اكثر الكواكب الصالحة للسكن ..

3 - teegarden b

تيجاردن بي ، ثالث كوكب على مقياس التشابه الأرضي بنسبة ٩٥٪ ، تم اكتشاف الكوكب ده السنة اللي فاتت بطريقة العبور ، وهي بكل بساطة طريقة بتسمح بتحديد الكوكب عن طريق مراقبة لمعان نجم الكوكب ده ، لما بيمر الكوكب من قصاد النجم ، بيختفي او بيقل ضوء النجم عن المعتاد ، وده بيسمح بمعرفة عدد الكواكب قصاد اي نجم ، بمعنى اوضح لو جبت كشاف ومريت قدامه كورة ، فالضوء الخارج من الكشاف هيقل في الفترة اللي الكورة معدية من قدامه ، هي دي طريقة العبور ، وبسبب ده العلماء اكتشفوا كوكب تيجاردن بي وسي (teegarden b and c ) ، من خصائص الكوكب انه بيتم دورة حوالين نجمه في ٥ ايام بس ، يعني سنته بـ خمس ايام وده معناه سرعة دوران الكوكب حوالين نجمه ، وده ممكن يمنع الحياة عليه ، كتلة الكوكب نفس كتلة الأرض تماماً ، بيدور الكوكب في المنطقة الصالحة للسكن من نجمه ، وفي احتمال بنسبة ٦٠٪ ان درجة حرارة سطحه صالحة للسكن ..

كدا انت لو حابب تكمل بقى هتقدر تعرف كل الكواكب المكتشفة المشابهة للأرض ، ولكن حابب اوضحلك ان الكوكب دي بعيدة جدا ومفيش اي صورة ليها ، وكل الصور الموجودة دي عبارة عن شكل تخيلي للكوكب من مكوناته والمعلومات المتاحة عنه فقط ، زائد ان نسبة ٩٨ ٪ مش معناها ان خلاص ده كوكب ممكن نعيش فيه ، لأن العملية معقدة جدا جدا لدرجة ان ال ٢٪ الفرق ممكن يمنعوا وجود الحياة أساساً ، لو بحثت عن الموضوع هتلاقي عوامل ملهاش اول من اخر عشان نقدر نقول ان ده كوكب صالح للحياة .. ️