تقلبات البيتكوين

في الآونة الأخيرة ظهرت اخبار كتير بتتكلم عن عملة اسمها بيتكوين ( Bitcoin) وعن سعرها اللي وصل لـ40 ألف دولار ، فحبيت اوضحلك الحوار كله من اوله لأخره ..

البيتكوين هي عبارة عن عملة رقمية بمعنى ملهاش وجود ملموس ، او مستودع مركزي او هيئة تنظيمية بيرأسها مدير مثلا ، ظهرت العملة في بداية ٢٠٠٩ ، واسم مخترعها هو ساتوشي ناكاموتو ، ولحد الان محدش يعرف ده راجل ولا ست ولا مجموعة من الاشخاص ،كل اللي معروف انه اسم مستعار ومش معروف هويته ..

بتتميز معاملات البيتكوين انها من شخص للتاني مباشرةً (peer-to-peer ) بدون اي وسيط بينهم عن طريق التشفير ،

وبيتم التحقق من المعاملات عن طريق حاجة اسمها سلسلة الكتل او ( Blockchain) ، سلسلة الكتل هي عبارة عن دفتر بيحتفظ بمسار نقل المعلومات بين كل مرسل ومستقبل في عملية نقل البيتكوين من خلال تقنية التشفير. بيتميز دفتر الأستاذ الموزع بميزة على الأنظمة المركزية بحيث انه مفيش فرصة فيه لفقدان البيانات ، وبيحفظ كل معاملة بتم فيه بشكل امن وعظيم ..

اللي بيميز التعامل بالبيتكوين اكتر هو السرية ، بمعنى انه بمجرد ما بتنزل محفظة بيتكوين على موبايلك او الكومبيوتر الخاص بيك وبتنشأ عنوان بيتكوين ليك ، بتقدر ترسل او تستلم العملات عليه، مع العلم ان عنوان البيتكوين مش بيظهر اي حاجة تخصك نهائيا ولكن كل اللي بيظهره هو مقدار البيتكوين اللي بتملكه والعناوين التانية اللي بعتتلك بيتكوين ولكن بدون اي معلومات شخصية عنك نهائيا ..

طيب السؤال هنا ازاي اقدر اجيب او يبقى معايا بيتكوين ؟!

الاجابة هتكون عن طريق عملية التعدين ، الموضوع اشبه بالتعدين العادي اللي تعرفه بس بدل ما بتستخرج دهب او معدن ، بتستخرج بتكوين ، وزي ما بتستخدم معدات في التعدين العادي ، ففي التعدين الالكتروني بتستخدم معدات وبرامج بتقدر تفك الشفرات ، وكمان اجهزة كومبيوتر عالية جدا جدا جدا وحط جدا لفوق ما تتخيل ، لأن الموضوع بيفضل طول الليل والنهار وكمان مكلف جدا نتيجة الكهرباء والنت المستخدم وكمان بسبب زيادة اعداد المهتمين بتعدين البيتكوين ، فبالتالي بتقل نسبة ايجاد بيتكوين ..

طيب ايه اللي بيخلي البيتكوين غالية ؟!

طبقا للأقتصاد لو كان الشيء نادر ومفيد ، فيُعتبر ذو قيمة. وبالمثل ، فا البيتكوين نادرة ومفيدة وبيتم تحديد قيمتها على أساس العرض والطلب في السوق. تم تحديد عرض او عدد الـ Bitcoin عند 21 مليون مع تداول او استخدام 16.2 مليون حاليًا. وبالتالي ، فإن المعروض منها محدود بشكل واضح مما يجعل ندرتها شفافة..

طيب حيث كدا هل الاستثمار فيها ناجح ولا لا !

عشان تعرف الاجابة على السؤال ده تعالا معايا نجيب الرحلة من بداية ظهورها ..

بين سبتمبر 2010 إلى يونيو 2011 ، ارتفعت البيتكوين من 0.1 دولار إلى 30 دولارًا ، بمعنى 29900٪ عوائد في أقل من سنة . وده هو أول تحرك صعودي يشهده البيتكوين. ولكن بعد كدا ، انهار مرة تانية إلى 2 دولار من 30 دولارًا ، وده بيمثل 93.3 ٪ .. انت متخيل معايا ان في حد خسر اكتر من 90% مرة واحدة ! ..

بعد كل وقعة بتقدر تقوم اجمد ، وده اللي حصل مع Bitcoin خلال الفترة من 2011 إلى 2013. الانتقال من 2 دولار إلى 240 دولار في أقل من سنتين ، وده بيعني عوائد بنسبة 11900 ٪....

بعد كده ، انهارت بنسبة 80٪ ، من 240 دولار إلى 50 دولارًا في شهور قليلة. !

اللي حصل بعد كدا هو تغير القيمة من 50 دولار إلى 1250 دولار ، وده حصل في فترة قليلة جدا ، من أبريل 2013 إلى ديسمبر 2013. في 8 أشهر ، ارباح بنسبة 2400٪ ، وبسبب كدا بدأت البيتكوين تتشهر في الفترة دي ، وحجم التداول عليها بدأ يزيد . ولكن بعد وصولها لـ1000 دولار ، تحطمت البيتكوين ووصلت لـ 100 دولار ، وانهارت أكثر من 90 ٪ في أقل من 3 أشهر واستمرت في التداول في نطاق بسيط ..

فضلت أكثر من 3 سنوات حتى تجاوزت المستوى السابق البالغ 1000 دولار. ولكن في اللحظة اللي تم فيها تجاوز الحاجز ده ، ارتفعت على الفور لـ 20000 دولار في أقل من سنة لكن بعد كدا؟ ايوة ، زي ما جه في بالك كدا وقعت تاني ..

رجع سعر البيتكوين إلى 3000 دولار ، وانهار بنسبة 85 ٪ من مستوى ذروته وفضل الموضوع 3 سنين عشان تقدر تكسر حاجز الـ 20 ألف دولار. لكن في سنة العجايب 2020 ، كسر كل الحواجز ووصل لـ 40 ألف دولار وده طبقاً لآخر التطورات ، وده بيمثل زيادة فورية بنسبة 100٪ في أقل من 3 أشهر... !

فهل المفروض انك تستثمر فيها ..؟!

بص لو انت معندكش القلب او الضغط او اي مرض فأشطة استثمر ، لأن فكرة انك تشوف خسارة بنسبة اكبر من 90% وتقدر تكمل فده في حد ذاته انجاز ، لكن لو بصينا للأرقام فمفيش حاجة هتديك ارباح بنسبة 41362300٪ من 1. لـ 40 ألف دولار ، لكن زي ما شرحت فوق انت هتقابل تقلبات فظيعة في السعر ..