الاحوال الجوية في الكواكب

يمكن بتشوف الأحوال الجوية في بعض البلاد مخيفة ، ممكن لما تشوف أي اعصار تتخض ، بس صدقني لما تعرف اغرب الأحوال والطقوس الجوية في بعض الكواكب هتحمد ربنا على نعمة الأرض ..

على سبيل المثال الكوكب الازرق ( Neptune) ، صاحب اقوى رياح في نظامنا الشمسي ، بتبلغ سرعة الرياح في كوكب نبتون ٢٢٠٠ كم/س ، اعلى من سرعة الصوت بـ ١.٨ مرة ! ، أسرع بـ ٦٠٪ من رصاصة في مسدس ٩ مم ! ، حضرتك دي أسرع من طيارة F_35 .

على بعد ٦٣ سنة ضوئية في كوكب جميل كدا اسمه ( HD 189733 b) ، الكوكب ده سرعة رياحه بتوصل لـ ٨٦٩٠ كم/س ، مش بس كدا ، ده فيه خاصية جميلة اووي وغريبة ، الكوكب ده بيمطر زجاج منصهر ، عايزك تتخيل معايا المطر وهو نازل مع سرعة الرياح العظيمة دي بتخلي الزجاج ينزل بشكل افقى ، يعني بمعنى اوضح استحالة يكون فيه حياة

نيجي بقى للعظيم ده ، كوكب ( Gliese 436 b) على بعد ٣٣ سنة ضوئية ، الكوكب ده ضخم جدا وقريب جدا من النجم الخاص بيه (زي الشمس عندنا كدا ) لدرجة أن درجة حرارة سطحه بتبلغ ٤٤٠ درجة سيليزية ، الكوكب ده يا صديقي مغطى بمحيط عميق جدا ، وبسبب ارتفاع الجاذبية الخاصة بالكوكب ده ، فهو شافط مياه المحيط ومخليها لازقة فيه لدرجة أن المياه بقت اقوى من الصخور والجليد المعروف !!

في الواقع المياه مضغوطة بحيث تكون على شكل بلوري أصعب من الحجر إسمها الجليد السابع أو (Ice VII) ومع درجة حرارة الكوكب العالية ، ده بيخلقلك جو عبارة عن تلج مولع ولك حرية التخيل ..

أخر حاجة معانا هو كوكب الجليد والنار ، أو (CoRoT-7b) ، الكوكب ده قريب من نجمه جدا جدا ، بس في ميزة مختلفة شوية هو أنه بيواجه نجمه بجانب واحد فقط ( مش زي الأرض اللي بتلف حوالين نفسها وبتالي كل الجوانب بتواجه الشمس ) ، الميزة دي أدت أن الجزء المواجه للشمس درجة حرارته تصل لـ ٢٦٠٠ درجة سيليزية ، والجزء التاني من الكوكب تصل درجته لـ -٢١٢ درجة سيليزية ، بمعنى أوضح كوكب الجليد والنار ..