1896
حصل أول عرض سيما في مصر وبناء عليه حصل إنه سنة 1996 قررنا نعمل احتفال ضخم بـ مئوية السينما المصرية ويكون الاحتفال من خلال مهرجان القاهرة السينمائي الدولي اللي بـ يرأسه حظابط الكاتب سعد الدين واهبل "وهبة" جوز الأستاذة سميحة أيوب وكان فيه اهتمام كبير بـ المئوية دي سنتها، قرروا يعملوا استفتاء بين لفيف من النقاد
لـ اختيار قائمة أهم 100 فيلم حتى ساعته وتاريخه
وشهدت القائمة منافسة بين عدد من النجوم الأبطال
الآتية أسماؤهم على وجه الحصر لا المثال:
سعاد حسني وفاتن حمامة وشادية وأحمد زكي ونور الشريف وأحمد مظهر
..
واحد يسأل طب فين فريد شوقي وعادل إمام وأنور وجدي وليلى مراد ونجمة الجماهير نادية الجنسي ونجمة مصر الأولى نبيلة عبيد؟
أقول له:فـ .....
الكلام عن "الأهم" له معايير فنية مش جماهيرية
المنافسة بين الفنانين المذكورين كانت فعلا شرسة لـ احتلال المركز التاني لـ إن المركز الأول كان محجوز لـ الأستاذ شكري سرحان
اللي ذكراه النهاردا 19 مارس وبـ الفعل ظهرت القايمة النهائية بـ 11 فيلم لـ شكري 8 ل سعاد وفاتن 6 أحمد زكي وشادية
إيه اللي يخلي الأستاذ سرحان في هذه المكانة العليا
برغم اعتقاد الكثيرين وأنا منهم إنه المادة الخام لـ البيض
فيه ناس بتحبه بيبقوا هيعيطوا لما يسمعوا الكلام دا (منهم أخويا) لكن مش مهم
السؤال ليه دا ياخد أفضل ممثل؟
أعتقد دا راجع إن المخرجين الكبار كانوا بـ يفضلوه لـ إن وشه من النوع المألوف كما إنه أداة طيعة ومع وجود عماليق في الأدوار التانية كان بـ يبقى ماشي الحال فـ نلاقيه مع صلاح أبو سيف في:
شباب امرأة
الزوجة التانية
أنا حرة
مع عز الدين ذو الفقار في:
رد قلبي
امرأة في الطريق
مع يوسف شاهين في:
عودة الابن الضال
ابن النيل
مع حسين كمال في:
البوسطجي
مع كمال الشيخ في:
اللص والكلاب
مع كمال عطية في:
قنديل أم هاشم
مع توفيق صالح في:
المتمردون
يعني 7 مخرجين كبار
من سبع مدارس مختلفة واتجاهات مختلفة وأوقات مختلفة ف دا مش صدفة زي بالظبط ما وليد أزارو هداف الدوري المصري ما هو العبيط بياخد عشان الناصح ينكاد.