ازاي بنختار المطور العقاري

في الفترة الأخيرة دخل مجموعة كبيرة لا حصر لها من المطورين العقاريين السوق العقاري وأصبح في كم هائل من المطورين دخلوا السوق معندهمش الإدارة المنظمة ولا الخبرة الكافية في إدارة المشروعات فاصبح أن في مطوريين كثير بيكون عندهم مشاكل في التراخيص أو ملكية الارض او انهم بيبنوا ولكن للاسف مبيسلموش في ميعادهم وبيتاخروا علي العملاء وده بيسبب مشاكل كتير .

تعالي اقولك علي شوية حاجات لازم تركز فيها وانت بتختار المطور العقاري اللي حتشتري بيتك منه .

1. السمعة والخبرة: احنا بنشتري المطور قبل البيت ، سمعة المطور وشهرته في السوق العقاري دي من أهم الحاجات اللي لازم ناخد بالنا منها واحنا بختار المشروع ، لازم المطور اللي حنشتري منه يكون معروف وعنده تاريخ في السوق وليه خبرة في مجال تطوير العقارات وليه سابقة اعمال محترمة ومشاريع اشتغل عليها قبل كده وأثبتت نجاحها من خلال اراء العملاء اللي اشتروا معاه ونجحت استثماراتهم في مشروعاته ده غير التزام المطور بوقت التسليم اللي وعد أنه حيسلم ويسكن الناس فيه كلها عوامل بتبني شخصية المطور اللي حتشتري أو تستثمر معاه .

2. الترخيص والتصاريح: لازم تتأكد من ملكية الأرض للمطور وان كل التراخيص والتصاريح اللازمة لبناء المشروع سليمة ومفيهاش اي مشاكل وان المطور معندهوش اي مشاكل او خلافات مع الدولة بخصوص بناء المشروع أو ملكيته لأرض المشروع .

3. التواصل والشفافية: لازم المطور يكون متاح للتواصل والرد على كل استفساراتك وتوفير خدمة ما بعد البيع ده غير ان المطور لازم يكون واضح وصريح في كل ما يخص المشروع من تكلفة و ميعاد استلام ومصاريف صيانه ومواعيد الدفعات والأقساط .

4. جودة البناء: لازم المطور يكون معروف بجودة شغله واستخدامه لمواد وخامات عالية الجودة ده غير شكل التشطيب ومستواه وده بيبان وتقدر تطلع عليه من خلال رؤية أعماله السابقة والمشروعات اللي بناها قبل كده .

5. الأسعار وخطط الدفع: لازم أسعار المشروعات اللي بيقدمها المطور تكون متناسبة مع قيمتها الحقيقية وتقدر تشوف ده من اطلاعك علي اسعار المنطقة اللي موجود فيها المشروع. وكمان لازم يكون بيقدملك خطط دفع مرنة بتتناسب مع احتياجاتك المالية .

6. التقييمات والشهادات: مهم جدا قبل ما تشتري تعرف العملاء بتوع المطور ده بيقولوا ايه وايه رائيهم في الشقق اللي اشتروها وهل تجربة العملاء في الشراء من المطور ده كانت كويسة ولا لا ومدي التزامه مع العملاء وجديته معاهم .كلها حاجات بنقدر من خلالها نقييم المطور .

باختيارك لمطور عقاري موثوق ومحترف بتكون واثق من أنك حتاخد احسن وحدة وتستثمر في عقار يعود بالفائدة عليك. فلازم تستشير حد مختص يكون خبير في السوق العقاري عنده المعلومات الكافية والخبرة اللازمة في أنه يوجهك ويرشدك لافضل مطور عقاري واحسن مشروع تقدر من خلاله تاخد البيت اللي يناسب احتياجاتك وتلاقي فيه الحاجات اللي بتدور عليها .