عودة سخمت

الجنان هو اللي بيعمل اي مشكلة ممكن تتخيلها ممكن يعمل كوارث و مش تضر واحد بس ... لا دي ممكن كمان تخلي اي حد يضر حتي لو ملوش علاقة.

( الطمع قل ما جمع ) مثل معروف لينا كلنا و مش اكذوبة لا دا حقيقي جدا و بيحصل كتير ... عشان مفيش حد بيقدر انه ياخد كل حاجة ليه لوحده هي دي الحياة.

الجنان لو اندمج مع الطمع عند واحد بيبقي معمي و مش شايف اي حاجة قدامه و ممكن يعمل اي حاجة و يضر اي حد قدامه عشان يوصل للي عايزه و طبعا زي ما قلت فوق ان محدش بياخد كل حاجة ليه لوحده ... عشان كدة مش هيبقي فيه اي حاجة هتحصل غير الضرر و بس.

اعرفكوا بنفسي انا واحد طماع و طمعي دا زاد و بقي جنون و خلاني اطمع في حاجة مش بتاعتي و اصلا هي مش بتاعت حد و دا في حد ذاته كانت فكرة مجنونة ... انتوا متخيلين اني افكر اعمل حاجة زي لعنة الفراعنة عشان احقق كل اللي انا عايزه ... انا جربت اقرأ بردية علي مومياء فرعونية لعينة ( سخمت ) و كانت كارثة و فكت علي دماغي انا و كل اللي موجودين في مصر و معرفناش نخلص منها.