الطلبة لما بيجوا يذاكروا في رمضان وخصوصًا لو كان عندهم إمتحانات،
بيبقى للأسف يومهم كالتالي (قبل الفطار همدانيين - وبعد الفطار تقلانيين)
وبالفعل سيناريو يومهم بيكون كالتالي:
الواحد منهم قبل الفطار يقولك أنا مش هذاكر دلوقتي لأني همدان وعندي صداع وجعان جدًا أنا بس أفطر وأشحن طاقتي، وبعد الفطار هجيب المادة في شوال.
ويجي صاحبنا ده بعد الفطار وبعد الخمسين لتر سوبيا اللي شربهم،
يقولك: لاء لاء .. المود ده مش مود مُذاكرة خالص، أنا تقلان جدًا
أنا أناملي شوية، وأصحى الصبح بدري أخلص كل المذاكرة اللي ورايا
وطبعًا بيصحى الصبح يكتشف إن هو صايم وهمدان لحد الفطار، ونخلينا في الدايرة دي بقى لأخر الشهر ^^
- الحقيقة السيناريو ده بيتكرر مع الناس في رمضان بشكل كبير - لدرجة إن معظمنا بيفقد الأمل إنه ينظم أمور مذكرته خلال الشهر الكريم ..
والسؤال اللي بيطرح نفسه هنا هو إيه الحل الأمثل لموضوع المُذاكرة في رمضان؟؟
إزاي نستثمر بيئة رمضان بأفضل صورة مُمكنة؟؟