لو سألتك عن أشهر لوحة سِمعت عنها خلال حياتك كلها،
سواء كُنت شخص مُهتم بالفن واللوحات، أو حتى لو كُنت ما تعرفش أي حاجة عنهُم، فهتكون إجابتك بكل بساطة هي لوحة المُوناليزا ..
اللوحة اللي قاعد فِيها سِت طيبة خالص ^^ ، بتراقب كل حاجة موجودة حواليها.
عيونها بتتحرك في كُل مكان وكأنها شخص فضولي جدًا،
أي حِتة هتُقف فيها هتلاقيها بتراقبك ، وهتلاقي عيونها بتتحرك ناحيتك بهدوء.
وبتبص عليك زي ما بتبُص عليها بالظبط
وبتبتسم إبتسامة غريبة .. مُخيفة بالنسبة للبعض ، ومُبهجة بالنسبة للبعض الأخر
و رغم إن الإبتسامة دي صامتة تمامًا، إلا إنها بمثابة ألف كِلمة!
- لوحة الموناليزا هي واحدة من اللوحات الغامضة جدًا واللي بتحمل بداخلها أسرار كتيرة
وفي جدل كبير قائم بخصوص اللوحة دي
هل عيون الموناليزا فِعلاً بتتحرك؟
ولو بتتحرك، فإزاي يعني لوحة مكونة من بعض الألوان والورق، عيونها تتحرك يمين وشمال!
هل ده منطقي؟
والأهم مِن ده كُله، ليه اللوحة دي مشهورة أصلاً .. لدرجة إن إنت عارف إسمها، وصُحابك وجيرانك برده عارفين إسمها
وبمناسبة الاسم .. هو صحيح يعني إيه أصلا كلمة موناليزا؟؟