لو إنتقلنا دلوقتي لمدينة (بيزا) الإيطالية وبالتحديد في ولاية (توسكانا) هتلاقي في مبنى غريب موجود في مُنتصف ميدان (ساحة المُعجزات)
المبنى أشبه ببرج ضخم جدًا ، ولكنه مائل شوية
وبمُجرد ما توقف قدامه هتلاقي عدد كبير من السائحين اللي بيلتقطوا نوع ثابت من الصور وما بيتغيرش
وكُلها بتدور في إطار طريف عن مُحاولاتهم لسند البرج وإنقاذه من السقوط
هتلاقي صُورة مثلا بِتُلطَقت لشخص واقف في الناحية اللي مايل فيها البرج وبيحاول يسنده بإيده بإستخدام قوته الخارقة
و واحد تاني بيسند البُرج بـ صابع واحد بس، نظرًا لإنه سوبر هيرو أقوى شوية
وهتلاقي اللي بيسند برجله ، واللي بيسند براسه، واللي بيسند بضهره
أيوة زي الصور اللي قدامك دي كده بالظبط
وطبعًا المَبنى اللي طلعان عينه ده ، وكل من هَب ودب بيسند فيه، ما هو إلا بُرج بيزا المائل .. الغني عن التعريف
بس يا ترى إيه حكاية البُرج اللي مالوش أهل يسألوا عليه ده
إيه السبب في ميلانه ، وليه قائم وماوقعش لحد النهاردة بالرغم من مِيله الشديد
وإيه علاقة العالم جاليليو بالبُرج
وهل البرج فِعلاً من عجائب الدنيا السبع زي ماهو مُتداول عنه ولا لاء؟؟