في مدينة ساوثهامبتون Southampton الموجودة في إنجلترا
كان في طفلة إسمها (كارلي) بتربي قطة اسمها (يافا كيك)
وفي يوم طبيعي جدًا وأثناء ما الجو هادي وجميل - كانوا قاعدين مع بعض جنب الشباك ومفيش أي شيء يدعو للقلق - لكن في لحظة مُعينة وبمجرد ما (كارلي) غابت عن قطتها لثواني معدودة .. القطة نطت من الشباك!!
لحد هنا الوضع يبان طبيعي ومُمكن محدش يستغرب،
الموقف بيتكرر بشكل دوري، وكتير مننا بيشوف القطط بتقفز من أماكن عالية وبتكون سليمة بعد السقوط ..
لكن المُريب، والغريب فعلا، هو إن القطة (يافا) اللي بنتكلم عنها دي - قفزت من الدور الـ 18 !! يعني من على إرتفاع يتخطى تقريبًا الـ 55 متر!
وبعد ما القطة وصلت لقسم الطوارئ وبعد ليلة كاملة من الملاحظة والكشف عليها،
أكد الدكاترة إن القطة مفيش في جسمها ولا عظمة مكسورة!! ومفيش أي إصابة خطيرة تدعو للقلق .. مجرد جروح خارجية!
واللي حصل مع القط (يافا) وغيره كتير من القطط في حوادث مشابهة هو السبب في شهرة القطط بكونها بتمتلك 7 أرواح.
بس ياترى إيه هو السبب الحقيقي فعلا ورا الأسطورة دي؟ وليه الأسطورة دي تحديدًا مُنتشرة على مُختلف الثقافات والشعوب؟