على الجانب الغربي من ساحل اسكتلندا، موجود جزيرة صُغيرة اسمها (إيليان مور) Eilean Mor ، كان طول الوقت السُكان المحلين لاسكتلندا بيسمعوا عنها أساطير وحكايات مُخيفة .. زي مثلا إن في قوة خفية بتسيطر عليها ، أو إن المكان مليان بالأرواح!!
وخصوصًا إن الجزيرة دي مهجورة تمامًا ومافيهاش أي سُكان،
- الشاهد في الموضوع بقى إن مسؤولين الملاحة في اسكتلندا قرروا إنهم يبنوا منارة على الجزيرة دي، علشان تساعد في حركة السُفن.
والغريب إنهم من ساعة ما خدوا القرار ده، بدأت تحصل معوقات كتير عطلتهم عن عملية البناء، لدرجة إنها إستغرقت حوالي 4 سنين!! .. لكنهم في النهاية إفتتحوا المنارة أخيرًا في عام 1900 ميلادي .. وعينوا عليها 3 أشخاص علشان يقوموا بالمهام بتاعتها
(توماس مارشال) Thomas Marshall و(جيمس دوكات) James Ducat و(دونالد ماك آرثر) Donald McArthur.. ومكنش موجود أي حد على الجزيرة كُلها غير التلاتة دول فقط ،
# وفي أول كام يوم كانت الأمور ماشية تمام ، وبيشغلوا أنوار المنارة ومفيش أي مُشكلة،
لكن بعد شوية وتحديدًا في يوم 15 ديسمبر في مُنتصف الليل، مرت سَفينة جنب المنارة ولقت الأنوار بتاعتها مطفية! ولما بلغت بكده .. جت بعدها بعثة من هيئة الملاحة علشان يشوفوا إيه اللي حصل ..
ولما دخلوا المنارة، مالقوش أي أثر للحراس التلاتة إطلاقًا !! .. ولاحظوا إن الساعات اللي في المكان كُلها متعطلة! ، وفي كُرسي مقلوب في مدخل الغرفة،
ولما خرجوا من المنارة وأخدوا جولة في الجزيرة علشان يشوفوا إيه اللي حصل، إكتشفوا حاجة غريبة جدًا . . . !!