خروجة لطيفة

(كانت خروجة لطيفة،شكراً ع اليوم الجميل)

دي الرسالة ال ظهرت في تليفون علي ال مخرجش من البيت بقاله أسبوع محبوس في أوضته الضلمة المليانة بكوبايات شاي وقهوة وأعقاب سجاير وبواقي روحه المكسورة..

مسك التليفون شاف الرسالة ومردش..

بعد شوية رنة تانية لمسجات فيها صورة لبنت بفستان أبيض حريري مليان نقوش زرقا واصل لحد تحت الركبة والبنت شكلها أجمل من الملايكة ال محدش فينا شافهم..

.

الصورة دي حلوة أوي تسلم إيدك، تصويرك حلو.. إيه رأيك أحطها بروفايل؟!

.

كل إحساسه بالحزن اتحول لإحساس بالاهتمام والتوتر والإنجذاب فكتب لها : أنتِ ال حلوة.. حلوة أوي

.

_اتبسطت النهاردة؟!

*أي حد معاكي أكيد هيتبسط طبعاً.. يابخته

_ههههههه مين دا؟!

*ال كان معاكي..

_مالك يابنتي؟!

*أنا مش عارف تقصدي مين بس أنتِ تقريباً غلطانة في الرقم؟!

_إييه دا ياخبر.. دا فعلًا أنا بدلت رقمين.. آسفة لحضرتك بجد على الإزعاج

*لا أبدًا أنتِ ال شكرًا على إزعاجك اللطيف دا.. وعلى فكرة الصورة لطيفة خالص حطيها بروفايل حتى لو مش أنا ال مصورها

_شكرا لحضرتك..

*اسمي علي..

_وأنا اسمي فريدة..

*كان بديهيي أعرف..

_نعم!

*بديهي حد جميل كدا يكون فريد..

_.....

*على فكرة مخرجتش من البيت بقالي كم يوم..

_أنا مش دايماً بخرج، بس دي كانت صاحبتي وبقالنا فترة كبيرة متقابلناش عشان كانت مسافرة، حتى لسه راجعة ولسه خطها جديد عشان كدا كنت ماسيفتش الرقم واتلغبطت..

*من حسن حظي إنك اتلغبطتي..

_ليه بقى مش بتخرج؟!

*لسه مرفود من الشغل وخسرت مشروع كنت داخله وفركشت خطوبتي وحياتي جميلة خالص ?

_الحياة جميلة فعلاً بتعلمنا كتير ياعلي..

*هنتكلم بقى كلام التنمية البشرية دا؟!

_خلاص الحياة وحشة وسودا ومتستاهلش نعيش ويلا ننتحر دلوقتي..

*كنت على وشك لولا رسالتك ال شككتني إني خرجت دي..

.

_طيب الحمدلله شاطرة خالص إني بعت في الوقت المناسب..

*من حسن حظي تاني..

_حابب تتكلم عن حاجة من ال مضيقاك؟!

*ياريت لو ينفع.. ينفع أتصل؟!

_رن..

*ألو.. ازيك

_الحمدلله.. أنت ازيك؟!

*كويس شوية بعد رسالتك

_اممم طيب وقبلها؟!

*فاضية تسمعي؟!

_أوي أوي..

*هتكتأبي..

_ياسيدي ومالو نسمع بعض..

...

بعد ساعة وشوية من الرغي عنه وعن مشاكله قالها شكراً إنك سمعتي كل دا ..

_حاسس إنك أحسن.؟!

*بكتير جدًا الحمدلله..

_الحمدلله

*متشكر أوي.. أنا لأول مرة هنام منمتش بقالي كم يوم..

_طيب يارب أحلام سعيدة.. تصبح على خير

*وأنتِ بخير

.

نهضت من مضجعها لتشعل أنوار الغرفة المظلمة المليئة بالأوراق هنا وهناك وبعض أكواب القهوة الفارغة فلقد كانت حبيسة هذه الغرفة أكثر من شهر لم تخرج منها أبدًا.. لتجلس على مكتبها تمسك قلم بيديها المرتعشتين وعينيها الدامعتين تنظر لورقة نظرة مطولة ثم تبدأ في الكتابة..

السطر الأول بعد العنوان..

العنوان: رسالة انتحار..

.

محاولة رقم ١٣ بعد ال١٠٠ من إرسال رسالة عشوائية لرقم غريب طمعاً في إنه يسمعني.. شخص يتكلم فقط ولا يسمع..

لن أجد في هذا المكان من يسمعني..

سأذهب.

.

وقفت وربطت الحبل كويس في السقف وعملت مشنقة عشان تنفذ بيها المهمة..

وبتجيب الكرسي عشان تقف عليه..

تلفونها نور برسالة من رقم غريب متعرفهوش:"(كانت خروجة لطيفة،شكراً ع اليوم الجميل)"