اسكريبت

_مساء الخير ياأستاذة آيه ..

*مساء النور يامستر لطفي

_كنت عاوز أسأل حضرتك سؤال ومحرج منك

*اتفضل طبعا في ايه ؟

_سمعت إن حضرتك منفصلة

*شوف يامستر لطفي رغم إنك لسه جديد معانا في المدرسة بس عرفت إني منفصلة فمعنى كدا إنك شخص وِدَني

_نعم ؟!

*أيوة بتسمع من الناس كلامهم على الناس

_ لا لا خالص حضرتك فهمتي غـ......

*خليني أنا أفهمك الصح .. الصح إني أيوة منفصلة ودا مش معناه إني فشلت في إني أدير حياتي وبيتي أنا انفصلت عشان دي علاقة كانت غلط من البداية والحمدلله إنه مفيش بينا أولاد ..

_ أنا فعلا كنت جاي أسألك عن .......

*استناني أخلص كلامي لو سمحت .. ولا عشان إنت راجل فحقك إنك تاكلني في الكلام ؟ زي ما بتاكلوا حقوقنا في كل حاجة .. إنت متخيل إنه كان بيخلص الفرخة لوحده ومكنش حتى بيقولي تاكلي صدر ولا ورك دا كان بيلهفها مسافة ماأكون حضرت السفرة

_ أعوذ بالله ..

* شوفت بقى .. مجتمع ذكوري جدا حتى ف الأكل ..

_أنا أسف بس أنا كنت بسألك إنتي مرتبط....

*أيوة طبعا مرتبطة بشغلي وحياتي وصحابي ليه فاكرين دايما إن الارتباط لازم يكون براجل ؟

_إحنا مين ؟ أنا مش فاكر حاجة ..

*كلكم .. الرجالة كلهم .. نفس التفكير

_ياأستاذة اسكتي بقى شوية .. أنا كنت جاي أقولك سألت عليكي ولقيتك منفصلة وأنا كمان منفصل من أكتر من سنتين وكنت عااوز أ....

*أكيد كنت بتاكل الفرخة كلها لوحدك ؟! وهي اللي سابتلك البيت ورفعت عليك قواضي وبهدلتها في المحاكم منكم لله كلكم ..

_ياستي والله ما باكلها أنا نباتي أصلا

* يبقى كنت بتاكل صنية البطاطس لوحدك منكم لله ..

_ أنا باين غلطت في اللي فكرت فيه

*فكرت في إيه ؟!

_منا مش عارف أقولك من أول مادخلت المكتب .. أنا جاي أصلا أقولك إني معجب بيكي وسألت عنك وعاوز أتقدملك بس خلاص أنا أسف سلام عليكوو ..

*استنى يالوتفي .. لوتفيي .. استنى أنا جعانة بس ومفطرتش لسه تعالى هنتفاهم