محتوى قصصي مقالي

كلنا نفسنا ننجح ونحقق احلامنا , بس مش كله بيقدر يكمل , بس اللي كمل للآخر ساب علامات واضحة نقدر نتعلم منها ..

"حلم بيتحقق" رقم (1) :

" دي مش صفحة واحد متخصص في حاجه أو عالم أو مفكر أو شيخ أو اي انتماءات , دي صفحة مسلم مجتهد طموح بيغلط و مش مثالي ومش قدوة وانت مش مجبر تتابعه "

جملة قالها شاب اسمه " حسام هيكل " بيوصف بيها نفسه على بروفايله على "تويتر" بينفي بيها كل اللي الكلام اللي بيتقال عنه انه داعيه ديني او واحد بيدور على شهرة أو غيره .. محاضر في التنمية البشرية ; دا زي ما كتير من الناس بتوصفه بيه ...

حسام هيكل , 29 سنه .. واحد مدخلش طب ولا هندسة , دا خريج دبلوم صنايع , ومنها للجامعه العمالية ..

اشتغل في حاجات كتير في بداية حياته ; زي ويتر في مطعم كشري , عامل نضافة , ساعي بوسطه , سايس عربيات , ويتر على مراكب وكمان كان بيلبس دباديب في اعياد الميلاد ..

دخل في مجال المبيعات وفي بداية الطريق دا بقا مندوب مبيعات مفروشات وبعدها مندوب مبيعات عقارات

لحد ما بقا مساعد مدير تشغيل في مصنع من المصانع وبعدها اتعين كمدير تشغيل , بعدها بقا نائب مدير اقليمي لقطاع مبيعات الشرق الاوسط ومدير ادارة تطوير التسويق والمبيعات لحد ما بقا مدير البرامج التسويقية ... سافر ولف الوطن العربي كممثل للشركة , لف اوروبا كسياحة ..

بيقول في احدى تويتاته على "تويتر" : " سبت كل دا و ببدأ من جديد في عالم التدريب كأولى خطوات تحقيق حلم حياتي "

و بيقول كمان :" طيشت وعملت أقصى الاخطاء , رجعت عنها وبجاهد نفسي , بدرس علم شرعي وبحاول اتثقف بديني عشان انا مسلم على الاقل , بدرس لغات و بدرس علوم حديثه لتحقيق اهدافي , مبادر في نشر الوعي الوقائي في الجامعات ".

وبينهي التويته بجملة مشرفه , بيقول :" كل ده باختصار ومكمل عشان احقق حلمي في المستقبل القريب اني اقوم بتأسيس #مؤسسة_عيل_يشرف اللي هتساهم في تغيير مفاهيم الفشل لدى الجميع وازاي اقل فكر وظروف ومناخ ينتج عنه اقوى نهضة ".

في فترة قصيرة جدا , "حسام هيكل" بقا حديث مواقع التواصل الاجتماعي و وصل متابعينه على "تويتر" ل 29.8 الف لحد دلوقتي , و 545.483 الف على "فيسبوك".

حسام هيكل بجد المعنى الحقيقي لعيل يشرف .. و مثل اعلى و قدوة لشباب كتيرنفسها تحقق احلامها ..

العيب مش في الظروف ولا في المكان ولا في الكلية .. اشتغل على نفسك وخليك واثق انك هتوصل..

#عيل_يشرف

#حلم_بيتحقق

#ابدأ_مع_انسيبشن