مراجعة كتاب " سوف تراه عندما تؤمن به "

_ كل اللي قرأو روايتي " زائر الحلم " عنوان الكتاب هيبقى مألوف بنسبالهم، واللي مقرأش فكان في جزء من الرواية بيتكلم عن الكتاب دا وإن عنوانه شبيه بفكرة فيلم " The polar express " واللي بتتلخص عن الإيمان بالشيء عشان تقدر تشوفه أو تحس بيه.

_ " الإيمان يكمُن من الحب ".

في عبارة قالها موظف القطر في الفيلم بتقول " أحياناً تؤمن بما تراه، ومعظم الأشياء الحقيقة في العالم لا يمكننا رؤيتها "، على عكس عبارة تانيه اتقالت في نفس الفيلم من حد تاني " الإيمان بوجود شيء هو رؤيته " ومع العمق الشديد هنلاقي إن الحب والإيمان حاجات داخليه مبنشوفهاش، مبنلمسهاش.

الكتاب بيحاول يخليك تدرك قوتك الداخلية والإيمان بيها للسيطره على شخصيتك وتنميتها لإتخاذ مسار في الحياة يكون أفضل ليها؛ إزاي؟

أول فصل بيتكلم عن التحول الذاتي، تغير المعتقدات السلبية للنفس والمؤثره عليها، ونبدأ الرحلة من نفسك لحياتك لحد الناس وحتى التعلق بالمديات واللي ممكن تدمجها أنت بالأشخاص كمان حسب دماغك فين هتوديك وتربطها ازاي.

_ " عدم الإيمان أن ترى الجميع سعداء إلا أنت ".

في الفصل الأخير اللي اتفقت واختلفت فيه في نفس الوقت بيتكلم فيه عن التسامح، مهما بلغت قوتنا في التحكم بتفلت مننا لما بيكون الألم أقوى منها ودا اللي اختلفت فيه، لإن الكاتب تعامل مع مشاعر الإنسان في الجزئية دي على أنها معدومة على عكس بقيت الكتاب اللي كان بيميزه إنه بيكلم العقل بأفكاره ومشاعره مش بيكلم جزء واحد بس فيه؛ لكن في فصل التسامح بالغ جداً وحسيت أنه بدأ يتعامل مع الإنسان بعد مرحلة النضج أنه خالي من المشاعر. ووجهة نظري إننا بنرتبط نفسياً باللي بيتفهم مشاعرنا أكتر من اللي بنشاركهم أفكارنا ومعتقدتنا..

_ كل كتب التنميه الذاتيه اللي قرتها أفكرها كلها واحده لدرجة تصيب الملل فأخدت قرار في النهاية بالتوقف عن قراءة نوعية الكتب دي وأكتفي بالقدر اللي عندي منها واللي أكيد كل ما هيعدي فتره هحتاج أرجع أطلع عليه تاني عشان أحس بتأثرها ودا عيب من عيوبها و لو عايزين تعرفه بقيت عيوبها الكاملة فعندكم زائر الحلم أقروها هتعرفوا

هختم بأقتباس من كتاب قوة عقلك الباطن لجوزيف ميرفي عشان يوضحلكم التشابه بين الأفكار ازاي مع اختلاف صيغة تقديم الفكرة.

" الثروات تحيط بك من كل جانب ولكي تحصل عليها اجعل عقلك منفتحًا ولاحظ الكنز الذي لا ينفذ بداخلك، و مهما كان الشيء الذي تبحث عنه فتستطيع ان تخرجه من داخلك ".