اسكريبت

لما الدكتور صارحني وقالي ان مراتي حامل في طفل متلازمة داون مكنتش مستوعب الصدمة... متخيلتش إن جه الدور عليا في الاختبار.. كنت راضي والله وعمري ما قولت ليه علشان مؤمن إن ده قدر ربنا ومحدش بيقول ليه لربنا ..بس المشكلة في دينا مراتي يا ترى هتستقبل الخبر ده ازاي ولا هيكون رد فعلها ايه .. أنا عارف حياة دينا اللي مولودة وفي بوقها معلقه دهب زي ما بيقولوا عمرها ما هترضى بحاجة زي كده

ساعتها قررت إني أطلب من الدكتور إنه ميقولهاش الحقيقة دي ويقولها إن الحمل تمام وطبيعي

عدينا فترة الحمل الحمد لله وانهاردة جه وقت ولادتها كنت قاعد مستني الدكتور يخرج يطمني عليها وعلى الجنين

وفي لحظة سمعت صوت صرخة ..قلب نط من مكانه الممرضه جابتهولي أول ما مسكته وبصتله ساعتها بس حسيت ان الدنيا حنت عليا وهتراضيني

مسكت ايديه صوابعه متساويه وصغيرة جدا...

عيونه كانت بتلمع وكأن فيهم الشمس ...

ضميته ناحيتي أذنت في ودانه وهمستله

_انت اسمك ملهم... من انهارده انا صاحبك وانت صاحبي مُتفقين ؟! سمعت صوت همساته ضحكت...يبقى مُتفقين ان شاء الله

طلبت منهم إني اطمن على مراتي... دخلت الاوضه لقيتها بتعيط كنت عارف إنها مصدومة

قعدت جمبها وانا شايل ملهم

_ إيه يا حبيبتي مش هتشيلي ابنك ولا ايه؟! بصي حلو إزاي وعيونه حلوة قد إيه تحسيهم كده بندقتين

كانت ساكته بتبصلي بألم وقالتلي بصوت كله عتب

- أنت كنت عارف إن ابننا معاق صح.. كنت عارف ومرضيتش تقولي ... أنا عمري ما هسامحك ع اللي عملته

_ايه اللي انتي بتقوليه ده يا دنيا.. وافرض ياستي عرفتي من أول الحمل كنتي هتعملي إيه يعني

_كنت هعمل الحاجة اللي بسببها مرضيتش تقولي يا كريم

بصتلها بصدمة ومكنتش مستوعب اللي بتقوله

_انت بتبصلي كده ليه أيوه كنت هنزله انا مش عاوزاه ده مسؤليه انا مش قدها

_انتي بتقولي إيه يا دينا ده قضاء ربنا..مينفعش حد ربنا يديله حاجة ويقوله انا مش عاوزها ... ده هديه من ربنا واحنا محتاجينها ... بصي شايفة ايديه الصغيرة دي هتطبطب عليكي في يوم من الأيام.. هي اللي هتمسح دموعك ..وهي اللي هتشيلك

_ أنت فاكر إني هصدق الكلام ده مثلا.. فوق يا كريم ده طفل مش طبيعي عاوز معاملة خاصة احنا الاتنين محدش فينا حمل المسؤلية دي.. فيه مؤسسات كتير بتحتضن الحالات دي احنا ممكن نسيبه هناك

في اللحظة دي حسيت الدم بيغلي في عروقي ... هو فيه أم في الدنيا ممكن يوصل بيها الجبروت لكده

انتبهت على صوتها وهي بتقولي

اسمع يا كريم انا واحدة ليا مكانتي ومش هقبل بحاجة زي دي تبوظلي كل اللي وصلتله ... أنا مش هرجع البيت والطفل ده معايا والاختيار ليك... ياأنا يا هو

معقول دي البنت الرقيقة اللي حبيتها وكنت عاوز أبني معاها بيتي ... أنا كريم 27 سنة دكتور اتخرجت واتعينت وفتحت عيادة... كنت بحب دينا زميلتي من أول سنة واحنا مع بعض كانت من عيلة غنية أوي وحياتها مترفة ومع ذلك اتجوزنا واتفاهمنا مع بعض واستحملنا كتير لحد ما كل حد فينا بقى ليه مكانته ... حبيتها اكتر من أي شيء في الدنيا مكنتش متخيل إن فيه يوم في حياتي متكونش فيه... بس فعلا الواحد مبياخدش كل حاجة

_انا مستعد أتخلى عن الدنيا كلها واتمسك بيه يا دينا ...

_خلاص احنا كده وصلنا لطريق مسدود آخره فراق.. أنا هخرج على بيت بابا وابعتلي ورقة طلاقي

....

بدأت حياتي من جديد ملهم كان كل حاجة ف حياتي .. ملحقتش أزعل على دينا لأنه هو كان مالي عليا كل أوقاتي..صحابي نصحوني أجيب مربيه تساعدني قللت ساعات شغلي علشان أبقاله أم وأب

كنت مؤمن جدا إن طيب الأثر بينول حلاوة طيبه

شوفت ده لما ملهم كان بيخطي خطواته الأولى ويضحكلي وقبل ما يوقع يترمي عليا ويفتح دراعاته ويحضني

حضنه صغير بس أمان العالم فيه

شوفت ده لما كان بيسنن سنة ورا سنة كان يمسك إيدي يعضها وأول ما أتظاهر بالألم يبوسهالي

شوفت ده في أول يوم مدرسه ليه أنا وبوصله حضني وقالي

بحبك قد العالم ....

في الحقيقة العالم كله مكانش سايعني وقتها

ملهم كانت هوايته السباحة اشتركتله في نادي عشان يطور من نفسه دايما كان بيتفوق على كل زمايله ... في كل مسابقة كان دايما هو المركز الأول .. تقريبا دي أكتر حاجة كانت بتبسطه

_ ازيك يا كريم عامل ايه

الصوت ده مش غريب عليا.. معقول نتقابل بعد ده كله

ايه مش هترد على سلامي ولا ايه

_لا طبعا أهلا وسهلا بس أنا مكنتش متخيل إن الدنيا لسه صغيرة كده .. اتفضلي اقعدي ... خير فيه حاجة يا دنيا

_ لا مفيش كنت بتمشى في النادي شوفتك قاعد لوحدك قولت أجي أسلم عليك .. هو أنت من امتى بتهتم بالنادي والكلام ده

_ لا أبدا ابني مشترك في السباحة هنا.. وأنا بفضل معاه لحد ما يخلص

_ معقول مندمتش ؟!

_ مفيش لحظة عدت عليا من غير ما أحمد ربنا على الهدية الجميلة اللي بعتهالي دي... تعرفي الجنة أنا بشوفها في عنيه هعوز إيه تاني

_طيب وشغلك وحياتك ؟!

_انتي عارفة ملهم في كفة وحبه في كفه والعالم كله بره الكفتين ... انا عمري ما هندم لان اللي عند ربنا مش بيضيع يا دنيا والله عمره ما بيضيع

مع السلامة بقى ملهم زمانه خلص تدريب

........

عدت السنين وأنا وملهم لبعض كل حاجة.. كنا نعمل كل حاجة مجنوونه .. نجري في الشارع... اشيله يقطف النجوم ونحطها في جيوبنا ...

_ بابا هو فيه إيه في السما

_فيه الجنة اللي فيها كل حاجة حلوة

_ طيب ما يلا نروح هناك ونشوف الحجات الحلوة

_ أنت صغير تقدر تطير وتروح بس أنا كبير مش هعرف أوصل هناك بسهولة

_لا تقلق... أنا هشيلك على كتفي واطير بيك لحد هناك

حضنته.. محستش غير ودموعي بتنزل وحسيت في حضنه بالجنة .... قلبه مبيعرفش غير الحب ... والحب مُعدي

عدت سنين وسنين ملهم كبر وبقى عنده 15 سنة وانهاردة حفلة تكريمه بطل الجمهورية في السباحة ... الفرحة مكانتش سيعاني وأنا بشوف الطفل اللي كله راهن على فشله حتى أمه بقي بطل

ملهم كريم .... الاسم بقى ليه صوت على الحياة وبقى ملهم لناس كتير

أول ما نادوا اسمه عشان يستلم الجايزة جري عليا وحضني وأصر إني انا اللي استلمها ونكون جمب بعض زي ما كنا دايما

انا دلوقتي واقف قدام العالم كله... وجمبي عالمي(ملهم)

من بعيد شوفتها وقفت بكل عزة نفس وكأني بقولها

_ شوفتي مش قولتلك اللي عند ربنا مش بيضيع..مش قولتلك إني عمري ما هندم .

" طيب الأثر سيتذوق حلاوة طيبه.... مهما طال "

#ايمآن_بنت_آمين

#متلازمة_الحب