سلام يا صاحبي

سلام يا صاحبي

سلام يا صاحبي من اكتر افلام السينما المصرية اللى معلمة فى دماغ اجيال ، ودة لأن كلنا واحنا عيال صغيرين كنا مبهورين اوى بآداء عادل امام وسعيد صالح وقد ايه كنا شايفينهم ابطال بجد وأصحاب رجالة ،بس لما تكبر هتكتشف ان الفيلم دة كان المفروض يتصنف بانه فيلم أطفال - دة طبعا بعد ما يتقص نُص مشاهد الفيلم اللى كلنا عارفينها - واللى بتصور بطل الفيلم على أنه أكتر راجل جذاب على وجه الكوكب ،معرفش بإمارة ايه بصراحة ،بس دة العادى فى كل افلام عادل امام ،واللى لازم قبل ما تتفرج عليها تفضى من دماغك حبة المنطق اللى فاضلين فيها فى أى كيس أو علبة تلاجة ،وابقى رجعهم تانى بعد ما تخلص الفيلم علشان تعرف تكمله لآخره ، ودة بسبب كمية الأحداث الغير منطقية فى أحداث الفيلم ،زى مثلاً ان البطل وصاحبه لوحدهم بيقدروا يضربوا مجموعة أكتر من 10 رجالة وهم بيبيعوا بطيخ على العربية مثلا ،أو انهم قدروا يتغلبوا على الكينج ورجالته ويكسروا احتكاره لسوق الخضار بفكرة جهنمية ،وهى انهم يجيبوا خضار من مكان تانى

فعلاً فكرة مكانتش تخطر على بال ابليس نفسه وتفكير برة القفص بجد .. قصدى برة الصندوق ،ودة يأكدلك أن الكاستينج في السينما المصرية بيتم على أساس الكفاءة وبس ،ومفيهوش وسايط خالص .

ومن الحاجات العجيبة اوى فى فيلم سلام يا صاحبي ان اتنين معندهمش خبرة غير فى السرقة والنصب يشتغلوا فى مجال جديد عليهم ويقدروا فى وقت قياسى جدا انهم ينجحوا ويعملوا فلوس ملهاش اول من اخر لدرجة تخلى اكبر حوت فى السوق يُعجب بدماغهم ويطلب منهم انهم يشتغلوا معاه وبعدها ينافسوه وياخدوا منه مزاد كبير اوى ويخربوا بيته ..

هى طبعا أرزاق اللهم لا اعتراض بس السؤال اللى بيطرح نفسه دلوقتى هو ليه احنا مبيحصلش معانا كدة فى شغلنا ???

جايز علشان بطة مش ليك يا مرزوق ..أو يمكن نيتنا وحشة .. الله اعلم

سامعك ياللى بتقول اتكلم عن قتل بطل الفيلم لكل أعداؤه فى نهاية الفيلم بدراع واحد ..

طيب بذمتك ينفع هنا ؟؟

القفلة دى عايزة موسم تلاتين حلقة لوحدها

روح بقى هات حبة المنطق اللى حطيتهم فى الكيس دلوقتى رجعهم دماغك تانى ،واما نعمل حلقة جديدة هنعرفك قبلها علشان تفضيهم .