سكريبت فيديو تاريخي

جزء من سكريبت لفيديو فيس بوك لصفحة احد المؤثرين على مواقع التواصل الاجتماعي

الشارع اللي لغاية النهاردة في مؤرخين بيعتقدوا إن وراه لغز كبير، و منهم اللي مصدق انه موجود تحتيه مقبرة الإسكندر الأكبر، طب هو فيه أغرب من شارع بيبلع الناس!

النهاردة هنحكي حكايته، أنا سميرة سعيد وده برنامج "معلومة"

شارع النبي دانيال واحد من أغرب وأشهر الشوارع في الإسكندرية،بتبدأ قصة الشارع لما الإسكندر الأكبر يأمر ببناء الإسكندرية القديمة و انها تكون على شكل رقعة الشطرنج بشارعين رئيسين متقاطعين،واحد منهم هو شارع النبي دانيال اللي وقتها كان اسمه شارع "الكاردو دي كومناس"

الشارع ده دلوقتي هو اللى بيوصل بين محطة مصر ومحطة الرمل، و هو وجهة لكل المثقفين وده بسبب وجود مكان كبير فيه أشبه بمعرض كتاب دائم.

كان ومازال شارع النبى دانيال ملتقى الحضارات و الأديان وده ظاهر بوضوح هنلاقي فيه دور عبادة للتلت ديانات المعبد اليهودي و الكنيسة المرقسية و مسجد دانيال.

طب مين النبي دانيال اللي الشارع باسمه ؟

في البداية اتقال انه الشارع على اسم النبي دانيال وهو من انبياء بني اسرائيل اللي اتردد كلام انه عاش و مات فى الاسكندرية، ومقبرته في الشارع ده، بس الكلام ده المتخصصين قالو انه مش صحيح لأنه ببساطة النبى دانيال اتوفى قبل ما الإسكندرية تتبني أصلا بـ ٣قرون!